علي حسين الخباز
30-05-2008, 10:15 AM
ملاحظة ... لغة فصحى + لهجة عامية عراقية)
مسرحية .. ( بين ـ بين )
( علي حسين الخباز )
الممثل1:ـ ( حاجب في زاوية من زوايا المسرح )
الحاجب :ـ مؤلف المسرحية ( موسيقى )
المؤلف :ـ ( وهو يحي الجمهور ) قبل ان نفتتح الستار
الحاجب :ـ مخرج المسرحية ( موسيقى )
المخرج :ـ ( وهو يحي الجمهور ) وقد نفتح الفتنة على حلم ـ يشع في كل نفس
الحاجب :ـ بطلة المسرحيه ( موسيقى )
الممثله:ـ ( تحي الجمهور ) قد نرفع مخملا من ظلال الرغبات
الحاجب :ـ السيد الممثل ( موسيقى )
الممثل :ـ ( يحي الجمهور) وقد نتقاطع او نتصارع من اجل ان نرسم الغواية حوارا
الحاجب :ـ كافي عاد
المؤلف :ـ أو قد نستل من جيوب التواريخ
المخرج:ـ ( مقاطعا ) المثقوبة وريقات رواية
المؤلف :ـ أذن هي فكرة ان نعيش لحظات مع النفس ....قد تطوينا الآهات والاحزان والالام والويلا ت تسلية
المخرج:ـ ( شعبي ) يمعود والله كلوبنه خلصانه ...... يا آهات يا حزن وكل واحد من عدنه صار بي الحزن تشريب ..
الجوقه :ـ( وكانها تاكل ) طعم لذيذ
المؤلف :ـ انطونه فكه ...........والله كريم
الراوي :ـ( باللغة الفصحى) يروي التاريخ ان الخليفة هشام بن عبد الملك قدم حاجا الى مكة ـ فلما دخلها قال
الخليفة:ـ أئتوني بما تبقى من الصحابة
الحاجب:ـ لم يبق منهم أحد فقد تفانوا جميعا
الجوقه :ـ هذا مخبل هو منو بقه منهم
الخليفة :ـ أئتوني اذن بالتا بعين
الحاجب :ـ مولاي الخليفه بقى منهم طاوس اليماني
الخليفة :ـ فآتوني به
الجوقه :ـ انلاصت
الرواي :ـ فلما دخل طاوس اليماني عليه
( يدخل طاوس اثناء كلام الراوي ويسترسل في تمثيله المشهد) الراوي :ـ خلع نعليه على حاشية بساطه ‘ ولم يسلم عليه با مرة المؤمنين كما يفعل الناس ولكنه قال
طاوس :ـ السلام عليك يا هشام
الراوي:ـ وتقدم وجلس بازائه وقال
طاوس:ـ كما انت يا هشام ؟
الجوقه :ـ والله مسيطر
الراوي:ـ فغضب هشام حتى هم بقتله
الجوقه:ـ موعرفناهه ..
طاوس :ـ أنت في حرم الله وحرم رسوله ولايمكن لك ذلك
الجوقه :ـ ذوله يعرفون حرم الله حرم رسوله
الخليفة :ـ يا طاوس ما الذي حملك على ما صنعت؟
طاوس :ـ وما الذي صنعت ؟
الخليفة:ـ ( وقد ازداد غضبا) خلعت نعليك بحاشية بساطي
الجوقه :ـ ويعني ؟
الخليفه :ـ ولم تقبل يدي
الجوقه :ـ وبعد ؟
الخليفه :ـ ولم تسلم علي بامرة المؤمنين
الجوقه :ـ وبعد ؟
الخليفه :ـ ولم تكنني
الجوقه :ـ وبعد ؟
الخليفه:ـ وجلست بازائي بغير إذن ..
الخليفه :ـ وبعد ؟
الخليفه :ـ وقلت كيف أنت يا هشام وكأنك تحدث رجلا عاديا من الناس
طاوس :ـ مهلك علي يا هشام
الجوقه :ـ سبع ..
طاوس :ـ اما في ما فعلت بحاشية بساطك ، فأني افعلها بين يدي رب العزة كل يوم خمس مرات فلا يعاتبني ولايغضب عليّ
الجوقه :ـ بطل
طاوس :ـ واما قولك لم تقبل يدي ّفاني سمعت أمير المؤمنين عليا عليه السلام يقول لا يحل لرجل ان يقبل يد أحد .. الا أمرأة من شهوة أو ولد من رحمة
الجوقه :ـ حلو
طاوس :ـ وأما قولك لم تسلم عليّ بامرة المؤمنين ، فليس كل الناس راضين بأمرتك ، وانا اكره ان اكذب
الجوقه :ـ ورده
طاوس :ـ وأما قولك لم تكني .. فان الله سبحانه وتعالى سمى انبياءه واولياءه فقال يا داود ويا يحي ويا عيسى وكنى اعداءه فقال جل وعلا ( تبت يدا أبي لهب )
الجوقه :ـ ( سكتّه)
طاوس:ـ واما قولك جلست بازائي فانا سمعتُ امير المؤمنين علي عليه السلام يقول أذا اردت ان تنظر الى رجل من اهل النار فانظر الى رجل جالس وحوله قوم قيام
الجوقه :ـ انخرس فدنوبه
الخليفة:ـ (لحظات صمت ) عظني يا طاوس
طاوس :ـ سمعتُ امير المؤمنين عليا عليه السلام يقول ان في جهنم حيات كالتلال وعقارب كالبغال يلدغن كل امير لا يعدل في رعيته (يخرج ويتركه لوحده)
الجوقه :ـ أكلب
المخرج :ـ ( بنفرزة ) كافي
المؤلف :ـ هاي شبيك ؟مشهد مقدمه يخبل شنو التريده بعد ..؟
المخرج :ـ هيج مشهد ميمثل مجتمع بي مليون هشام وما بي ولا طاوس
المؤلف :ـ انت غلطان... لأن المطلوب من المسرحي الحقيقي ان يعتني بتنمية الخير والقوة بالمجتمع وعليه ان يكبر مفاهيم انسانية قد تكون ضاعت ـ اندثرت لكن عليه ان يعتني بيهه لانها موجودة داخل كل روح
المخرج:ـ صدكني هذا الكلام يمثل واقع نظري قد يكون هو أمل بقلب كل انسان لكنه ميشكل ولايمثل الواقع الحقيقي اللي نعيشه
المؤلف :ـ طيب راح اراويك مشهد آخر شوفه هو هذا اللي يمثل المجتمع
( موكب والي يتقدم عبد الله بن غيلان ليعرف نفسه )
عبد الله بن غيلان :ـ ( رجل معتني بمظهره وبلباقته)( بلهجة شعبية) انا مولاي الوالي عبد الله بن غيلان خادمكم المطيع ولي الشرف كل الشرف ان اصحبكم بجولة لتتعرفوا على مدينتنه اللي تشرفت بولايتكم
الجوقه:ـ لك هذا لبلبان
المؤلف :ـ ويسير عبد الله مع الوالي الجديد ويوصلون قرية اسمهه قرية ام عبد الله ويشوف نهر بنص البيوت ويسئل الوالي
الوالي :ـ هذا النهر اهواي بي نفع لاهل القرية
عبد الله بن غيلان :ـ طبعا سيدي الوالي اعزكم الله فهذا النهر يساعد الاهالي على نقل الميرة ويعلم اولا د هذه القرية على السباحة ويفيدهم بارزاقهم لصيد السمج
المؤلف :ـ وعدد عبد الله بن غيلان اكثر من عشر فوائد للنهر
الجوقه :ـ أيا لكلك
المؤلف:ـ لكن بالرجعة وهمه راجعين مروا بنفس القرية وباوع الوالي على النهر وكال
الوالي :ـ لكني اشوف هذا النهر ايضا اله اضراره وهو مؤذي اهوايه اهل القرية
عبدالله بن غيلان:ـ طبعا سيدي الوالي اعزكم الله... اولا.. هو غرك اهوايه من اولاد هذه القرية بعدين هدم اساسات اهواي من بيوت الصيادين والمشكلة كثر عليهم البق بشكل مو طبيعي
المؤلف :ـ وعدد عبد الله بن غيلان اكثر من عشر نقاط يكون بيه النهر مصدر ضر مو نفع
الجوقه :ـ لك هذا لوكي اصلي ( يضحكون )
المخرج :ـ دوكف يمعود هو هذا هم نص نقدمه للناس وبيهج ظروف .. يعني احنه لو انروح للتاريخ انقدم شخصيات خيالية اصبحت الان تبعد عن مجتمعنه بالف سنة من العادات والتقاليد والنفوس البيضة لو... لو نحجيلهم عن بعض امور اللكلكية بايام كبل وعبالك احنه ناقصين لوكية هسه
المؤلف : لحظه لتستعجل
( مشهد غنائي ) وان ولد الفطيم لنا خرت له الجبابر صاغرينا
( وفي الطرف المقابل ممرضة تحمل طفلا تقربه الى ابيه )
الممرضة :ـ مبروك على الخير الحمد لله على سلامة المره هليوم آني اهوايه تعبت وياهه رايحه جاييه
وكلش اهوايه داريته المرتك رايحه جاييه
( تنظر الى الولد) الله شوفه اشلون يخبل اشسميتوه على الخير او بالاحرى شناوين تسموه
الاب :ـ ناوي انسمي عراقي
الممرضة :ـ الله اسم يخبل عراقي اسم وطني يمثل وطنية ابوه وحرصه على وطنه الله شوفه اشكد عيونه حلوه آنه هليوم هوايه تعبت على امه رايحه جاييه
هواي جنت قلقه عليهه الله شلون حلو الله يخليه يخبل وآنه هليوم خلصته يم امه رايحه جاييه
جنت قلقه عليه مريت اكعدت يم راسهه رايحه جايه
الحمد على سلامتها وسلامة الولد الله شلون يخبل شوف عيونه شوف حلقه شوف ايديه اديه يا عيني عليه تخبل وآنه كضيت اليوم يم امه رايحه وجاييه
وانه هوايه فرحانه لامه الله سبحانه تعالى كومهه بالسلامه وآنه ما قصرت وياهه رايحه جايه
الاب :ـ ( يبالغ متعمدا) شوفي هذا الرضيع اللي بين اديج تدرين هذا اشكد عمره ؟
الممرضة :ـ اشكد غير توه اجه للدنيه؟
الاب:ـ لايابه هذا ثلثطعش سنه كضاهه بس جندي مكلف
الممرضه:ـ انته لو...؟
الاب :ـ هوه بابه هوه ولمن اتسرح اخذوه ثلث مرات احتياط
الجوقه :ـ وبعدين؟
الاب :ـ اخذوه جيش شعبي
الجوقه :ـ وبعدهه؟
الاب :ـ لبسوه بجيش القدس
الجوقه :ـ وبعدهه ؟
الاب :ـ سجلوه بجيش النخوه
الجوقه :ـ وبعدهه ؟
الاب :ـ جندوه بيوم النداء
الجوقه :ـ وبعدهه؟
الاب:ـ اخذوا بعقرب الصحراء
الجوقه :ـ وتالي ؟
الاب :ـ طلع افرار وحكموا خمس سنوات سجن
الجوقه :ـ وهاهيه ؟
الاب :ـ لايابه وبعدهه طلع مو عراقي
الممرضة:ـ (باستغراب) وانتوا شسويتوا
الاب :ـ قررنه منوقع دفتره ولا نسرحه من بطن امه ولذلك اجيتي بوقت متأخر
الممرضة :ـ اشوفه لعد تعبان ووجهه اصفر ولا عبالك شكل بشر دخذه يمعود هم فرحان جايلك ولد ؟
المخرج:ـ هذا نص مال امخابيل مو مال عقال
المؤلف :ـ رجال بقال وهوه يعيرلي البضاعة حدثني عن امور النزاهه والعداله والانسانية والطيبةوالعدل والتساوي الانساني وعن ظلم المهجرين والمهاجرين وعن ..وتاليهه طلع بايك من الميزان وغاش بالبضاعة وشفط من عندي الباقي
الجوقه:ـ( تضحك)
المؤلف:ـ رجل سياسي
السياسي :ـ ( يتحدث )احنه لابد ان ننقل للعالم الصورة الصادقة عن هذا الشعب في طريقة تعامله الانسانية الحقيقية وفي مفهوم السلام وخاصة بعد مرحلة التخلص من الطغاة ولابد منا نصرة المظلومين
المؤلف :ـ تالي طلع أكبررئيس عصابة
الجوقه:ـ والرزق على الله
المؤلف :ـ رجل دين
المخرج :ـ ها .. يمعود؟
المؤلف :ـ حقيقة... رجل دين ويصعد منبر خطابة على منبر رسول الله
المخرج :ـ بعدين ؟
المؤلف :ـ هاي صعبه ؟
الجوقه :ـ هسه ننطرد
المؤلف :ـ اذن هي دعوة ان يلتفت يمين يسار دائما اخاف اكو من اهله واقاربه من يستغل اسمه وسمعته بين الناس ويطعن بيهم ويبوك ويسرق ويظلم باسمه .. فيضيع الجهد بلاش للاسف وتنتهي الثقة اللي بينه وبين الناس
المخرج :ـ لكن كل ذني اللي ذكرتهن لايمكن صياغتهن ضمن عمل مسرحي وبعد هذني السوالف الصغار ميكدرن يمثلن مجتمع بقيمه واخلاقة هذني اسوالف صغار
الجوقه :ـ ( باستغراب ) اصغار ؟
المؤلف:ـ مو احنه انخاف يكبرن
المخرج :ـ انه ابحث عن شيء يهز مشاعر الناس شي يعيش وياهم ويكبر وياهم عليك ان تفكر فعلا كيف تدك على هذه الصدور اللي اجتك شايله هموم الدنية وتريد ترّوح عن نفسهه شويه وما اعتقد مشكلة ان احنه نقدم الفرحه الهم رغم كل هذه الصعاب اللي يعيشون بيهه رغم التفجيرات والتفخيخات ومثل هذه الامور ..
المؤلف:ـ ( مقاطعا .. يواجه الجمهور ) ياايها الناس الاعزاء اني راح احمل لكم في نصي المسرحي حجاب (بازبند) يطرد عنكم الهم ويزيح الالام ويفرحكم كلش اهواي راح اعبرلكم عن روح السلام والمحبة وانسيكم كل هذه التفجيرات والتهجيرات والمفخخات والغي وجود عصابات القتل وميليشيات الدم و الدمار وراح اكتبلكم عن الكثير من القيم اللي نسيانهه او كدنه ننساهه وبقينه بس انسولف بيهن سوالف وهذه لمة العشاير العظيمة
الجوقه:ـ اشبيهه؟
المولف :ـ اللي صرنه ما نشوفهه غير بس بمشاكل الفصل وسوالف الفصاله.. وهذه الشعارات العظيمة
الجوقه :ـ شبيهه ؟
المؤلف:ـ صرنه نشاهدهه بس باللافتات و بالتلفزيون ونقراهه بالصحف وانه راح ادور داخل نفسي عن كل فرحة وحتى لو ماتت اجيبهه وانشرهه كدامكم علمود نضحك.. نضحك ونبقة نضحك(يضحك) ونبقة نضحك من اجل ان يصير نص يخرب ضحك والحمد لله ماكو كتاب مسرحيين يتعينون بالواسطة علمود نخاف ونكول يجيبون غيرنه يكتب النصوص واله جان من زمان ( ايماءة الطرد) رفسونه .. آني راح اقدملكم شخصية آني نفسي ما اعرفهه لأن كل الناس اللي اعرفهم همه ناس تعبانيين ولا واحد منهم يصلح ان اجيبه علمود ترتاحون وتفرحون وتضحكون وتكولون والله عدنه كتاب كموديا يخبلون اشلون راح انقل الكم الفرحة وانه ابن رصيف عانه ما عانه من الم وتعب ونزف جروح عمره سنوات من ضيم .. ضحكوا ضحكوا وياي ( يضحك)
الجوقه :ـ ( تضحك)
المؤلف:ـ وخلي ننسه كلشي علمود نقدم عمل جميل تره حتى الاحزان هي نوع من انواع الضحك واهلنه يكلون شر البلية ما يضحك ...لكن مشكلتنه احنه العراقيين منقبل واحد يضحك علذقون ضحكوا وخليني اسولفكم عن ربعي المتصعلكين والمشردين والجوعانيين والعريانين وراح اسولفلكم سوالف تطكك من الضحك .. فاني المؤلف اللي عليه ان امثل تعبكم واحمل الامكم وهواجسكم وان اجلب الكم الابتسامة والفرحة ربما جانت البداية ضعيفة لأني متعودت ان اكون بيوم من الايام وهم من هذه الاوهام الهوايه الترست البلد والي تمر بحياتنه يوميه اريد ان اكون حقيقة ورغم كل هذي الالام الا انه راح اقدملكم عالم جميل بعيد عن التعسف والظلم والارهاب راح انقل الكم حياة مرفهه سعيده واروايكم شوارع نظيفه
الجوقه :ـ مابيهه اوساخ ؟
المؤلف :ـ ولا كومات زباله، شوارع مابيهه طسات كل طسه تاخذ الروح
الجوقه :ـ لعد شلون راح نمشي ؟
المؤلف وراح اروايكم مدينتكم ولاخرابه بيهه واشجارابد مو ميته ولانخل يبجي من الدوباس راح اجيبلكم قمر بس مو اعور ولا هو مثلوم راح اقدملكم انسان أبيض مثل الحليب ميعرف يجذب ولا يغش ولا يخدع أحد ولا يعرف ينبح
الجوقه :ـ ( تصفق )
المخرج :ـ يا به بشرفي انته تخبل ....اشويه دمع وطاسه ويامحسنين بالله وسنتين اتطك اكبر تاجر بالبلد
الجوقه:ـ ( جميعها تأخذ دور المتسولييين) ياالله
ممثل :ـ بشرفي خوش شغله ؟
المخرج :ـ اخي من حقك كانسان ان تحلم مثل ما تريد لكن هذا مسرح يريد شخصيات تتحرك شخصيات من دم ولحم وحوارات نشطه وجديه تعبر عن تكوين الانسان والامه وطموحاته نريد ديكور وموسيقه وتمثيل آنه اريد مسرحيه مسرحيه مو رايح تحجيلي عن كومة مجانين
ممثل:ـ (يخرج راسه من بين الستار ):ـ احنه عزلنه ومخابيلنه اليوم عدهم اعتصام
الجوقه :ـ أي نعم اعتصام لعد ربنه وحد
الممثل:ـ اعتصام ضد سياسة المحتل
الجوقه :ـ تسقط امريكا
الممثل :ـ محد يجيب طاري المجانين زين الا ان ناخذ كامل حقوقنه الماديه والمعنويه احنه احرار نتخبل بكيفنه ونعقل بكيفنه واللي عنده اعتراض وين يروح يشتكي خل يشتكي
الجوقه :ـ يلله
الممثل:ـ واحنه نطالب السلطات العراقية باجور ( اوفر تايم) وبعد سنتين او ثلاثة يصير خبالنه نموذجي ويتقلد من قبل اغلب المؤسسات والمواطنين الاوربيين والاجانب والعرب المرفهين يصير اخبالنه عمله نادرة ومنبيع ولا نصدر مخبل واحد الا بالدولار زين( فقره اعلانيه ) روحوا لعبوا بعيد عنه .. اهناك يلله ماما تدور عليكم .. بالمناسبه عندي الكم اقتراح كلش حلو
المخرج ( بسخرية) اقتراح
الجوقه:ـ أي اقتراح اشبيكم ما نعرف نقترح شني
الممثل:ـ مو هذا العالم كله كاعد يقترح واقتراحات ما ينطلع بيهه .. تصور اكو عاقل يصدك وزير الشؤون الدينية بدوله عربيه مسلمه يطالب حكومته بشن حرب اباده على الحجاب لأنه يمثل مظهر من مظاهر الطائفية .. هسه لو جان وزيردوله اجنبيه .. كلنه معليش ..لوجان وزير الداخليه .. وزير الثقافه والفنون جان كلنه بيهه باب وجواب ويردونه ..بس بابه هذا وزير الشؤون الدينيه .. تعرف شنو وزير الشؤون الدينية بشرفكم هاي لو مسولفهه مخبل موجان فشختوه .. فانا اليوم كطعت بعقلي ولازم اقترح ..( فقره اعلانيه)
المخرج:ـ أي دقترح وفضنه
المجنون :ـ فلشوا الفرقة
الممثلين:ـ نفلش الفرقه ؟
المجنون :ـ أي فلشوا الفرقة
الممثلين :ـ وبعد؟
المجنون :ـ وعيفوا التمثيل
الممثلين :ـ ونعيف التمثيل ؟
المجنون :ـ أ..ي عيفوا التمثيل فد مشكله
الممثلين :ـ وبعد ؟
المجنون :ـ وجم وصله بالخصر
الممثلين :ـ وبعد ؟
المجنون :ـ ـ وجم هزه... وشعرـ شعر.. وانتم ما عليكم تتلكاكم الفضائييات بشهرين احسن فرقة بالعالم تصيرون و تصيرون زناكيل كلش وهاهيه
الممثلين:ـ امداك
المخرج :ـ (يضحك)
المؤلف :ـ وانا شسوي ؟
المجنون :ـ اشتغل محلل سياسي
ممثل :ـ (فقره اعلانيه... يمسك المايكرفون ليجري لقاءا مع المؤلف ) ما رايك باكلة الباكله ودهن وهي تشهد تباعد المواطن عنها بسبب الغلاء الدهنوي ؟
المؤلف :ـ شو ديعفنه وخلي انشوف المشهد
( عدة جنود يلبسون ملابس الجند القديمةوهم يقرعون الطبول دون استخدام المايكرفونات )
المنادي :ـ ايها السادة اهالي مدينتنا الكرام
الممثلين :ـ أي نعم
المنادي :ـ امر صادر من حضرة مولانا الامير
الممثلين :ـ حفظه الله ورعاه
المنادي :ـ يمنع اكلة الشلغم
الممثلين:ـ يعيش مولانا الاجير
المنادي :ـ والشوندر
الممثلين :ـ يعيش مولانا الاسير
المنادي :ـ ويمنع فتح النوافذ ليل نهار خشية ان تتلصص بناتنا على الشوارع والطرقات
الممثلين :ـ يعيش مولانا البعير
المنادي :ـ وقرر الامير غلق جميع المدارس وخاصة خاصة مدارس البنات
الممثلين :ـ يعيش مولانا الصرير ..توهه انضبطت
المنادي :ـ وقرر مولانا الامير عدم السماح للمواطنين الذهاب الى الصلاة جماعة في جوامعنا الا لمن يحمل الكلاشنكوف
الممثلين :ـ طططط ططططط
المنادي :ـ ويقف في الطابور الاول من الصلاة حملة القاذفات والهاونات ويزيد الله في اجر اهل الصواريخ ويمنع شرب الماي البارد والجاي الحار واكل الفلفل ومن يخالف اوامر الامير نحرك ابو ابوه نذبحو بالسيف ذبح النعاج واعذر منم انذر .. عاش مولانا الامير
الممثلين :ـ عاش عاش عاش
ممثل :ـ ( باللغة الفصحى) قبل سنوات كنت انظر الى بلدي فلا اراه الا ميدان قتال يغص بجثث القتلى والشهداء كنت حينها لااجيد سوى الضحك ( يضحك )
الجوقة :ـ (يضحكون) اضحك اضحك كلما كنت اسمع ان خندقا ما يحمي المظلومين ويأوي انفاس المرعوبين كنت اكثر الناس خوفا وعشت عمري كله خائفا لكن لا ـ كان عليّ ان اخدع نفسي واخوتي وبيتي ومدرستي وأضحك مرعوبا اضحك حزينا اضحك باكيا أضحك ثلاث رصاصات في جسد لن تعرف بندقيته سوى خرقة الادامة وربما كنت ارمي فيها احيانا آهاتي وأنيني وحسراتي ـ ودخلت ذات يوم للخندق فوجدته كبطن أمي وكنت اصرخ في حينها أين أنا ومن أنا الآن صرت ( باللهجة الشعبية)اسمع صوت الرصاص بباب الحلم يختصر اهوايه من المسافات ـ هسه كل زفة عرس (طاق طاق ) واتخيل هجوم كلما يصير العيد و(طاق طاق) واتخيل هجوم كلما يفوز الفريق العراقي بلعبة طوبه (وطاق طاق )( فقرة أعلانيه) وكلما يبوكني بقال اتخيله عدو وكلما يكذب عليه عطار اتخيله جاسوس وكلما يسولفلي واحد عن الهم اتخيله من الطابور الخامس
المؤلف:ـ عظيم لابد اذن ان نخلع الاقنعة كي نرى انفسنا ويرانا الناس (بالشعبي) ولازم نتعره عن ذواتنه يلله نكدر نقدم مسرح حقيقي للناس لابد نوكف على اعتاب كل آهه وكل حسره وكل ابتسامة عاشق رسمتهه اله احلامه ونصيح بعالي الصوت تعالوا خلي نمزق كل الستائر المزيفة تعالوا( فقره اعلانيه) خلي نضحك احنه على الامير وسوالف الامير اللي يريد يحرمنه الضوه والهوه والماي واحنه نعيش عام 2006م تعالوا خلننهض علمود ينهض ويانه هذا العراق
المخرج :ـ ليش متصعد منصه فدنوب
المؤلف :ـ خلصنه العمر نحجي بهدؤءواخيرا اكتشفنه ان الهدوء ما يكدر يواجه صوت البنادق والرصاص ولايكدر بيوم يهز ضمير مو ظف يختلس من اموال شعبه ولا يكدر يهز وجدان حرامي
المخرج:ـ والله لوتوذن ما تكدر تهز شعره من احد قبل ان يمشي بطريق اعوج وعن اختياره
المؤلف :ـ لكني بطلت اريد ان احافظ على العدل من اجل ان لايعوج
الجوقه :ـ( تهزج) بطلنه منريدالعنب نريد سلتنه
المؤلف:ـ ( وكأنه يتذكر) بالمناسبة عندي صديق محامي أخذ اتعاب اكثر من اموال القضية المتنازع عليه ـ اليوم الكل تسولف عن العدل والمساواة والانسانية والحرص على الوطن اليوم سموا الرشوه هديه وقسموا الجذب الى ابيض واسود واحمر وتسولفلك عن الحرام وتشتم اللصوص الكل يشتم اللصوص غريب لعد منو اللي ديبوكنه منو ؟..
الممثل :ـ ( يطرق احد الابواب )
الممثله منو ؟
الممثل :ـ حجيه الله يساعدج
الممثله اهلا عيوني
الممثل :ـ كوليلي البارحه موانتو انباكيتوا
الممثله :ـ أي نعم احنه نباكينه الله لينطيهم هو احنه اشعدنه وباكونه
الممثل :ـ حجيه هم شفتوا فردة حذاء علسطح
الممثله :ـ أي عيني هذا لازم مال واحد من مضروبين الجلوه انزع من رجله
الممثل :ـ أي حجيه رحملله والديج ناوشينيا لأن هذا حذائي
المؤلف:ـ اعزائي سادتي الحضور حين تكون الحياة بسيطة تقدر اتباوع من النوافذ وتشوف الصبح اشكد جميل وتكدر تطلع الى عملك وانت مرتاح علمود تقدم وتبدع وانت مرتاح الضمير من دون ان تتحسس جيبك علساع اخاف ينباك وحتى لوجان ينباك كبل اكو من يدوره من جوه الكاع ويجيبه اكومن ياخذ القصاص طك بطك وهو حار لأن الشغلات جانت بسيطه حتى السوالف جانت بسيطه ودائما مال الحرام يروح للحرام ودائما الحرامي ياكل من روحه من روح غيره
ممثل :ـ الله يساعدك
العطار:ـ اهلا وسهلا تفضل
بيش كيلو الدهن حجي
العطار بربع دينار
الممثل :ـ خلينه فد نصف كيلو
الممثل 2:ـ ( مع العطار ) حجي هذا دا ياكل باللبن
العطار :ـ عيفه ابني ما عليك بي الف عافيه
الممثل :ـ (ياكل من اللبن بسرعه )
الممثل 2:ـ حجي مو هذا راح يخلص اللبن
العطار :ـ عيفه وليدي انت ليش حارك كلبك هذا دياكل من الدهن ماله
المؤلف :ـ اثاري العطار كلما ياخذ المشتري من اللبن هو ياخذ من الدهن فلا تصدكون حق يضيع نريد نطلع دون ان نسمع في الحافلات من يشتم السياسة والسياسين والوطن والوطنيين وبدون ان يعرف شي عن الواقع اللي يعيشوا هؤلاء الناس دون ان نخلي فارق بين اللي عشنا كبل واللي شفتا كبل من ظلم وتعسف وسجونات وحروب وكأن احنه بالعجل نسيناهن واليوم صرنه بس نعترض بس نحتج دون ان نفعل شيءواحنه الان صاحبين قرار والمشكله احنه انفسنه نحجي بشي ونفعل عكسه وتضاده
( مشهد خطوبه)
الممثل الاب :ـ انت شتشغل وليدي ؟
الممثل 2:ـ اشتغل ويه خالي
الاب :ـ وخالك شيشتغل ؟
الممثل2:ـ عطال بطال ..عاطل عن العمل
الممثل الاب:ـ والمطلوب
الممثل 2:ـ جاي اطلب القرب من عندكم واريد اخطب بنتك
الممثل الاب :ـ والطلبات اشلون ؟
الممثل 2:ـ بسيطه عمي تهون
الممثل الاب :ـ واحنه ايضا ناس على كد حالنه منطلب اهوايه ـ انريد بس خمسه مليون للعروس وثلاثة لابوهه واثنين لامهه ومليون لاخوتهه الصغار ونريد نص كيلو ذهب وبيت يسجل بسمهه
الممثل2:ـ وبس؟
الممثل الاب :ـ اكو شغلات صغيره كلش
الممثل2:ـ واني حاضر
الممثل الاب :ـ الاخشاب منريدهه جاهزه وعدنه نجار محترم يصير ابن خالتهه والاحذية منريدهه جاهزه عدنه ابن عمتهه يشتغل بالاحذية النسائية والملابس منريدهه جاهزه عدنه عمتهه خوش خياطه والمطعم والصالون والفندق اقاربنه موجودين انت بس عليك تدفع وهاي هيه
الممثل 2:ـ هذا مهر لو طلع مشروع تجاري ؟
المذيع :ـ ولهذا السبب وتداركا للواقع المؤلم الذي يعيشه شبابنا قرر المجاهدون تفجير جميع مواكب الزفاف بواسطة المفخخات ومنع اقامة الافراح والاعراس حفاظا على طوبغرافية المجتمع وقد اعذر من انذر.. والله اكبر وليخسأ الخاسئون
الممثل :ـ ( مع الممثله ) أنا أحبج
الممثل2:ـ هذا حرام وليدي
المخرج :ـ اعتقد المشاهد بدت تتصاعد نحو الجيد لكن عليك اشويه اتخلي رافة وخشوع
المؤلف :ـ تريد رأفة
المخرج :ـ اشوية رافة
المؤلف :ـ اشكد تدفع ـ ورّق
( مشهد تمثيلي أمرأة تبكي ـ رجل يضحك )
المرأة :ـ أي كتلك عمك مريض بس ما كتلك ودي للطبيب (تبكي)
الرجل :ـ ( يضحك)
المرأة :ـ هاي انته موتت ابويه
الرجل :ـ هاي فوك ما ردتله الزينه
المرأة :ـ منو كايلك توديه للطبيب
الرجل :ـ بابا هو كلي وديني للطبيب لو ما مودي هم جان كلتوا محد دايرله بال ــ وشو آنه بس وديته للطبيب ـ نيمه على السرير ـ وفحصه عدل ـ حط السماعه على صدره ـ كله كح هو هم الرجال كح كحه اصليه ـ كله الدكتور تنفس هو الرجال هم اتنفس كلشي مابي وكله الطبيب كلشي ما بيك اشوية استبراد وصرفتلك دوه بس تشربه تطيب
المرأة :ـ لعد ليش شبيه ؟
الرجل :ـ اشو ابوج كله للطبيب شتأمر دختور ـ كاله الطبيب ما يأمر عليك ظالم ـ بس الراجيته بثمن تالاف دينار ـ وابوج ماعت روحه ولاحس ولا نفس
المرأة :ـ يعني ما حجه شي ما كال شي؟
الرجل :ـ لا بس سمعت روحه تكول شدعوه ذوله اطباء لو حرامية
المؤلف :ـ انتهت الحروب وانتهى زمن الطغاة فلم نعد كما كنا وقودها لكن بقيت بعض مفردات التعب بقى لدينا ذلك البين بين الذي يشغلنا به العتاة يوم يفتعلون النه ازمة بانزين ويوم يخربون الن الكهرباء ويوم ازمة ما ادري شنو
المخرج :ـ كلهه بسيطه لكن المهم ان ما تكون هناك ازمة اخلاق
المؤلف :ـ الازمة الاخلاق وان انوجدت فهي فعلا من بقايا السلطة ولكن يبقه علينه اللي لابد ان نتعلمه هو كيف نتصرف بقيمنه الاصيله كيف نتحد علمود بعثهه من جديد بداخل نفوسنه اللى تعبت ..علينا ان نعيش حياتنا ما دام اكو شمس واكو هوه واكو ماي وعدنه حكمة رجالنا علينه ان نتعلم فقط اشلون نبعث بحمله وطنيه لهذ ي الاخلاق اللي ربينه عليه
( مشهد تمثيلي )
ممثل 1:ـ استادي الكيت الك حصان يخبل احصان يافع وسريع واصيل ورخيص احصان مال واحد محتاج واكطعت وياي السعر بثمانين درهم بس
ممثل 2:ـ ( مع الثالث ) بيش بعته
الممثل3:ـ بعته بثمانيين درهم
الممثل 2:ـ ( وهو يتفحص الحصان) جميل ورائع هذا الحصان اصيل وحلو تقبل تبيعه بمية درهم
الممثل 3:ـ سيدي اذا انه بعته بثمانين درهم اشلون ما بيعه بميه
الممثل 2:ـ حلو هذا الحصان اصيل جميل (مع الاول) أنطيه ميه وعشرين درهم)
الممثل 1:ـ أي مو آني حصلته بثمانين درهم افلوسك زايده
الممثل 2:ـ آني لمن اوكف كل يوم واصلي خمس مرات امام الله واكول اشهد ان لااله الا الله غير عليه ان احمل معنى هذه الشهاده وان ابعد نفسي عن المساهمه في استغلال الانسان حتى لو كان هو قابل ومستسلم وراضخ لمثل هيج استغلال ..الحصان يسوه ميه وعشرين درهم بعد عليمن هلشطاره
المؤلف:ـ ولت الحرب اللي جانت تحمل نتانة التاريخ ,, لكنها بقت تعيش بنفسيات الكثير من عدنه فهي تحتاج من عدنه ان نساعدهم على بعث هذه القيم النبيله بيهم فنشوفهه صارت حرب نفسيات ومصالح وحرب اخلاق ومطامع شي غلفوهه بسم الدين وشي غلفوه بسم الوطنية وهناك صراع بعده موجود ليهسه داخل كل انسان ـ ومهما كبرت الموائد بعد لسه اكو جوع نهم ياكل باجسادنه وهناك ضعف بالرحمة بقلب كل انسان وهناك مساحات حاولوا ان يكبروهه بين كل انسان وانسان وبدت تكبر علمود تصير المساحة الفارقه بين كل بيت وبيت وعلمود تبتعد كل محله عن المحلات الباقية وعلمود تكبر كل مدينة بعيدا عن باقي مدنه وعلمود يتفرق الوطن داخل الوطن
( مشهد)
ممثل :ـ ( ياللغة الفصحى ) هل عليّ ان ابقى داخل هذا الجوع الذي يغتالني بصمت هل علي ان ابقى تحت ظل هذا الحزن الذي يغتالني كل لحظة ـ هل علي ان احذر من نفسي ومن أخي ومن العدو في آن واحد بينما الذاكرة تتزدحم وتتشابك باشياء لها طعم الحلم
المخرج :ـ هناك شعور ساحق بداخل كل انسان من عدنه علينه ان نتخلص منه وجميل لحد الان شغلنه اللي اشتغلناه فقط نحتاج الى ان نعرف هوية القاتل الحقيقي والجاني الحقيقي بحق شعبنه وكل ما تحتاجه الان المسرحيه هو بعض الحوارات الناضجه
المؤلف :ـ نعم انا الخالق الواهب للحياة داخل هذه المسرحية انه الان اكدر اوكف بباب أي مسؤول واكله انته اشلون صرت مسؤول وشلون وصلت واكدر اكله انته ليش دائما تكرر مصطلح الضرورة الضرورة ان نعمل وضرورة ان نبني أي متبني وتعمل هو منو منعك لويش كل واحد يتشبث علمود يصير قائد الضرورة
المخرج :ـ ما اعتقد احنه نريد ان تتحول الخشبه الى مقصله
المؤلف :ـ الصحف تكذب الفضائييات تكذب المسؤولين السياسين الكتاب اغلبهم بعتمدون على المبالغة والكذب أحنه نريد فقط ان نحتفظ بهذه الحسنه ومنجذب
الممثل1:ـ طلعنا
الممثل 2:ـ من ملح الارض ومن كل ذرة رمل ومن كل درس تعلمناه الحزن، الفرح ،الصلاة
الممثل1:ـ طلعنا
الممثل 2:ـ من المقابر الجماعية ومن السجون التي اكتضت برائحة الالم .. وطلعنا كالرعد كالصرخة كزغرودة عرس بقيت تبحث في كفن الزمان سنوات من الضيم فتعلمنا كيف ننام على الارض نلتحف الارض
الممثل3:ـ وشبعنا من الجوع وشبعنا من الخبز الاسمر الملتصق برائحة الطين
(مشهد)
الممثل 4:ـ نقدم اليكم السيد ال..... الذي يشغل خمس وعشرين منصبا ويمثل سبع احزاب وله راتب تقاعدي بكذا مليار وله خمس وعشرين عماره وثلاثين محال تجارية واورزدي باك وفيليقين حماية
الممثل 1:ـ نطالبه اذن
الممثل 2:ـ باعادة الحياة لكل نخلة ذبحوها ـ وباعادة الفجر الذي صلبوه .. فالسياسة لاتعني الضعف والقوة لاتعني القتل
الممثل 1:ـ نطالبه اذن
الممثل 2:ـ رأيت أمس وطني يجلس على مصطبة خارج البيت
الممثل 1:ـ نطالبه اذن
الممثل 2:ـ ان يكون انسانا اولا
الممثل 1:ـ وان يلحق ما تصدع من الارض ـ ويبعد بأسها كي لايموت الشجر .. والانسان
الممثل2:ـ وان لايتقرب الغرباء الى نخلنا وماءنا ونفطنا
الممثل 2:ـ ( يضحك ) لوتيه آخر زمن باكوا النفط وفجروا المستودعات وضربوا وسائط النقل ونادوا الله اكبر ازمة البانزين متنحل وذبحوا الطاقة وكصوا رؤوس الاسلاك وصاحوا الله واكبر كهرباء ماكو رادوا تستفحل ازمة الخبز ذبحوا ثمانين خباز بس ببغداد
الممثل 1:ـ هاي اشبيك مو السيد المخرج عنده ضيف يريد يقدمه للناس
الرجل السياسي :ـ اطمئنوا تماما فبعد قرنين سنستيقظ من النوم ان شاء الله ونشرب شاي الحنين الى الوطن سنعود ان شاء الله لنبني العراق فانا شخصيا قد سجنت لمدة سبعة قرون وهربت بعدها لاخدم في بيوت الطغاة وعملت لخدمة وطني كمشخص في الانتفاضة وحين عدت الى بلدي لم اجد الا البطالة والعطالة التي تذبح عرق التعابنين فهربت ثانيا الى وطني الجديد
الممثلون :ـ (ينشدون)
كاعدة على الشط ـ كاعدة تمشط ـاجاهه نومي ـ كللهه كومي ـ سكركب البرية لتبجين عليه ابجي على رجولج رجولج الف وميه
الرجل السياسي :ـ ( بلهجة الخطابة ) سنعمر هذي البلاد
المؤلف :ـ يروي احد المفكرين ـ انه جان اكو فد رجل مصلح يعبد الله ويخاف على اهل قريته وناسه وجان هذا الرجل ليل نهار مفرغ نفسه يحل مشاكل الناس ـ ويفكر ليل نهار باصلاح حال قريته وفجاة بأحدى الليالي طلعله فد شي مرعب ..
خاف هذا المصلح خاف هوايه لكن فجأة كلله :ـ لتخا ف اني صديقكم الشيطان أجيت عليك اريد اسوي وياك عقد عمل
المصلح :ـ (وهو خائف ) عقد عمل
الشيطان :ـ نعم عقد عمل .. فاني مستعد ان اسوي وياك اتفاق
المصلح:ـ اتفاق على شنو؟
الشيطان :ـ أني مستعد ان اعمرلك القرية .ان احوله الى جنه واعدلك احوال الناس افقر واحد بيهم اخلي ازنكل العالم شوف العرباين
المصلح :ـ أي شبيهه ؟
الشيطان :ـ اخليهه تتحول الى سيارات آخر موديلات شوف هذي الخرايب
المصلح :ـ اشبيهه هي قريتنه كلهه عباره عن خرايب
الشيطان :ـ اخليهه تتحول الى عمارات شاهقه شوف هذه المزابل التارسة القرية
المصلح:ـ أي شبيهه ؟
الشيطان :ـ اسويهه الك حدايق جميله وزاهيه بالوانهه وبرائحته الزاكيه.. وبعد اني مستعد ان انفذ الكم كلشي تريدونه
المصلح:ـ والمطلوب ؟
الشيطان :ـ شي بسيط مجرد تفهم الناس ان هذا العمران هو بسببي اني الشيطان مد ايده وياكم وهو الي بناها وعمرهه وهو اللي سوه حالكم بهذا الشكل الحلو وتفههم انه الفقر اللي كنتم اتعانون منه الشيطان هو اللي حوله الى غنى وخليهم يفهمون انه انه الشيطان اللي بعث بهذا الجمال اللي يتمتعون بي وصدكني بس توافق ما هي الا غمضة عين واخلي هذه القرية اجمل مدينة بالعالم وهي فرصة ولا تضيعه من ايدك
المؤلف:ـ وقبل المصلح قبل هذه الشروط واتوصل باتفاقه مع الشيطان بفكره انه راح يقدم خدمه جبيره للناس قبل بالاتفاق علمود ناسه واهله وان كلفه هذا الاتفاق ان يفقد ايمانه وتم الاتفاق وغمض عينك ـ غمض عينك وفتحهه ـ واذا بالقرية اجمل مدينه بالعالم عمارات واسواق ضخمة ومحال رحبه جبيره وبيه اشكال الوان وهذه القريه اللي جانت قبل اشويه قذره تتحول الى شوارع مبلطه ونظيفة والخرايب صارت قصور فارهه وضخمه وماكو عرباين حمير وحصن اكو سيارات وسيارات عينك ومتشوف .. لكن المشكله بعد ايام اكتشف المصلح انه يعيش بمدينه عامره بالفساد وطياحين الحظ قمار ودعاره وسكر وعدم مسؤوليه كل انسان ملتهي بملذاته وميهمه حتى عرضه ميسئل عنه وبدت الناس تشكي بعضه البعض وتبجي على ايام كبل وانعرفت هذه المدينة باستهتارهه بكل قيم الدين والانسانيه فادرك المصلح حينهه
المصلح :ـ ( يبكي ) العمران الحقيقي هو العمران اللي يبدأ من ذات الانسان اولا
المؤلف :ـ فهي دعوة جادة ان نسعه سوه لبناء الانسان العراقي وهي دعوه لعمران الانسان العراقي اولا وبعدهه انشوف اشلون راح يستقر البلد واشلون راح تزدهي اراضينه الزراعيه بخير واشلون يعله دخان مصانعنه وننتج الزهو والبركه واشلون اتخضر هالكاع بخيرات الله سبحانه وتعالى
المخرج :ـ ( ساخرا)كل اللي نحتاجه فد دبل طابوق وسيارة جص بباب روح كل واحد من عدنه وانشوف بنّه بي حظ وانتهت المشكله
المؤلف :ـ لاتستهزأ لأن فعلا احنه بحاجه الى بنه يعرف اشلون يبنيلنه الانسان علمود تستنهض بي قيم الخير اني كبل ايام شفت ابن تاجر جبير وهو عضو ( ههههههههههه) واذا بي واكف سره ويه العوائل المتعففه يريد ياخذ اشوي عدس ودهن وشكر صدكني هذا الرجل التاجر والمسؤول لو جان يعرف قيمة نفسه جان اعترف ما منحه الله سبحانه تعالى من خيرات وجان ساهم هو بزيادة هذه البضاعه اللي اتبرعوهه ناس يجوز اقل منه غنى لكن اكثر منه انسانيه جان عرف ان يخلي قيمه لمنصبه ولوضعه ولانسانيته موبس يحسب بالربح حتى لو جان شوية تمن وعدس
.. اني مؤلف المسرحيه آني اللي عليه ان يفرش اليوم الكم قلبه وسفرة احزانه بس بعد ما يحولهه الى شي جميل يحمل الكثير من هواجسه بعد ما يشحنهه بالامل الجميل والنبؤات السعيده أنه عليه كانسان ان احمل المعنى الابهى للناس قد اكون اني ملاك وقد اكون اني شيطان لكن يبقه شي لذاتي فانا ارفض ان اكون القاتل والقتيل بنفس اللحظه آني
المخرج :ـ يا أخي كافي آني وأني مودمرت المسرحيه والله
المؤلف :ـ آني غصبن عليك قبلة (بوسة ) هذه الفرقه لعيون الناس الجايه تشوف المسرحيه
المخرج :ـ وهاي الاغلبتني بيهه
المؤلف :ـ وانه اريد هذه القبله اتصير بمستوى محبة هاي الناس
الممثل 1:ـ والله راح تنسونه ادوارنه
الممثله:ـ (تطلع رافعة يدها احتجاجا ) انا اطالب بدور اكبر يليق بمركزي كامرأة في هذه المسرحية وامثل المركز الاجتماعي لكل امرأة ومالها من دور اجتماعي فعال في الواقع السياسي الجديد واطالب المؤلف بان ينظر ابعد من قدميه وباعادة النظر في هرطقته التي يسميها مسرحية واعتقد ان على المخرج كان ان يرفض هذا العمل منذ البدايه
المخرج :ـ وكعت براسي اني المسكين العلي ان أحمل كل هذه الهرطقه لأخرجها الى الناس بشخوصها بدمهه ولحمهه بامانيهه الحلوه وانا اللي عليه ان احمل هذه الاحزان بماعون من ترافه وامل واقتحم بيه وجوم الناس ، اكو فارق جبير بين الكلام والفعل بين البين الاول وبين البين الثاني والمشكله الجبيره والوحيده على ما اعتقد هو هذا الفارق الجبير بحياتنا واللي اكو اهواي مثل المؤلف يفتخرون بي وينسون انه بينه وبين الفعل الجوهري اللازم يتقدم للناس ـ الفارق جبير بين ان نكول وبين ان نعمل ـ السياسي حين يخون الوطن ما تشفع اله كل كلمات الكون ولا انتماءاته الفرعية تكدر ترد اله هيبته بنظر الوطن والمواطن ـ وحتى الوطني اللي يعتمر القهاوي وبس يسولف عليه ان يعرف ان الكلام عمره ماجاب الوطنه الهيبه والعز منريد كلام كافي بعد منريد حجي ونصوص واقوال نريد فعل عمل انتاج نريد شغل
الممثله :ـ اقحمتونه بصراع احنه في غنه عنه حاصرتونه واحنه عمرنه كله عشنه محاصرين من كل جهه ـ خيول خيول تقتحمنه دائما خيول من حجي وخيول من تصريحات وخيول من مواعيد وخيول من فتنه وفرقه وخيول ـ خيول الحروب وخيول الحصارات وخيول الشعارات وخيول التهجيرات وخيول التفجيرات وخيول الطمع اللي يلعب بالسوك وبسفرة الفقراء وخيول الجشع وخيول تقتحم شي حامله سموم افكار مسمومة وصحف مسمومة وفضائييات مسمومة وبعدكم ليهسه تتصورون الامنه وهمومنه وحسراتنا وبجينه ممكن تصير لعبه بمسرحيه ،، اتشوف اليوم زادوا الشعراء كثروا الكتاب والصحفيين والمحللين لكن قل العمل اتشوف كثرت الجرايد والفضائييات وقلت المعامل وكثرت البطاله وتغيرت لغة الانسان اعتصام بالمستشفيات علمود اشوية فلوس وخلي يموت الناس المهم الزيادة حصلوهه وجانوا فعلا مغدوريين لكن الغلط بالصيغة اللي تجاهلت انسانية هذا المريض واضراب عند الشرطة والحراس وعيفوا الليل مفتوح للحرامية علمود زيادة في الرواتب وعيفوا الارهاب يستفحل وخلننشغل بمناصبنه ورواتبنه ـ صحيح آني امرأة يشوفهه الزمن ضعيفة لكن ابقه بعمق هذي المآساة... اول مرة بحياتي اسمع من يفتخر باختطاف امرأة والله عيب وابقه آني أم واخت وزوجه وحبيبه
وكافي واله من العار واحنه بقرن الواحد والعشرين من يتوضه بدمنه ــ الحاضر يريد سعي جاد علمود يحله مستقبله خلي كل شخص ينظر الى ماضييه اذا جان حلو يحافظ على جماله واذا جان سيء خلي يغيره بدون قتل وعصابات وتهجير بدون شوشرة احزاب وفئات
المؤلف :ـ آنه
الممثلة :ـ كافي يمعود نريد واحد يكول احنه كثرت الاحزاب وقلت المواطنه كثرت الندوات وقل الوعي وكثرت الاحزاب والتكتلات ووزارات الامن وقل الامان
المؤلف ( يسحب المخرج خائفا من لوم الممثله) هاي تذكرني بحجايه حلوه يكلون فديوم زادت السرقه ببغداد وهاي القصه بزمن الاتراك كل يوم يصبحون واذا بيت بيتين مبيوكه وسوه الوالي اجتماع وجمع كبار اهل بغداد والناس
الوالي :ـ يا اهل بغداد آنه جمعتكم اليوم واريد ان نضع حل المشكلة البوكات والسرقات اللي زادن ببغداد
ممثل :ـ سيدي الوالي عليك ان تكثر الحراس
المؤلف :ـ وكثر الحراس وماكوفايده
الممثل :ـ وعليك تزيد رواتبهم علمود ميشتغلون الصبح
المؤلف :ـ وزيد رواتبهم وماكو فائده
الممثل :ـ وعليك ان تخلي عله الحراس حراس
المؤلف :ـ وهم ماكو فايده .. وجمعهم فد يوم الوالي واذا فد مواطن صاح
المواطن :ـ سيدي الوالي آني عندي الحل
الوالي :ـ شنهوه ؟
المواطن :ـ سيدي الوالي انته لاحظت كلما تزيد الحراس يزداد البوك ـــ سيدي الوالي الحل الوحيد ان تشيل الحراس خلو بغداد وحدهه بلا شرطة وبلا حراس وشوف الدنيه اشلون تصير حلوه
المؤلف :ـ واصدر الوالي فرمان يلغي الحراسه الليلية ومن يومهه بعد محد شاف حرامي من اهل بغداد ولا سمعوا ببيت ينباك
المخرج :ـ هذا خوش حجي حلو مو احسن من آني وآني
المؤلف :ـ بس يبقه من حقي ان اكول آني والاني اعني بيهه كلمن جاع وما صفك للظلم ـ من حقه يكول آنه كلمن بجه من لوعة المقابر الجماعية والسجون ما من حقكم باسم أي شفافيه ان تصادرون مني ونتي وبجايه وقهري وذبولي مامن حق أي انسان مهما كان يفكر بديمقراطية ان يبعد عن دربة العيون الذبلت من البجي وان ينسه الروس الجماجم الجماعيه الي وهبتكم المناصب واعطت المسؤوليه على رؤوسكم آنه الشفت الظلم والجوع والجور وما بعت يوم ومدحت طاغيه آني وحرام ان نساوي بين القاتل والمقتول وهذي في كل الاحوال مودعوة للقتل والحرق والتهجير لكن هذا حق ولابد ان ما يننسي احنه كنه نتأمل وثبة ضمير من اللي كانوا السبب والحضن. لكن المآساة لما هذا الحضن يروح يحضن طواغيت بدال طاغية
ممثل:ـ ( في زاوية من زوايا المسرح مع الممثله) آني احبج اموت عليح
ممثل 2:ـ حرام بابا
المخرج:ـ كافي سوالف حب رفعوا الستاره.. مشهد البرامكة
( مشهد سجن )
الممثل 1:ـ يا ابتي ارى الزمان قد انقلب علينا ـ بعدما كنا في عز ومنعه وكانت الامثال تضرب في عز البرامكة واذا باخي فضل يقتل وانا وانت في السجن ما الذي جرى للزمان يا ابي
الاب:ـ هي دعوة مظلوم سرت بليل لم نكن نسمعها لكن كان الله سامعها
الجوقه :ت يصفقون
المخرج :ـ جميل مشهد مؤثر
المؤلف :ـ ( يضحك ) يمعود الاف المشاهد المؤثرة بهذا الزمان شو ما أثر ولا واحد من عدهن وصار عبرة ودرس للناس وجان بطل الانسان ان يفكر بنفسه وفلوسه وملكيته وعماراته والتفت اشويه الاهله وناسه والفقراءه والمشكله الف عبره ودرس بين ادينه توضح انه ماكو أي فرق بين الزنكيل والفقير
الممثل 1:ـ ( مع الممثله ) اني احبج
الممثل 2 :ـ يمعود حرام
الممثل 1:ـ لعن الله من حرم حلال الله
المؤلف :ـ دخلي نكمل شخبصوتنه بالحب
المؤلف:ـ روي ان الاسكندر المقدوني حين دخل مصر استقر فترة في المنصورة فسال الناس
الاسكندر :ـ جم ملك حكم المنصورة ؟
الممثل :ـ سيدي سبع ملوك
الاسكندر :ـ منو بقة من اولادهم ؟
الممثل :ـ سيدي ولا واحد عفوا سيدي بقه واحد مخبل
الاسكندر :ـ اكدر اشوفه ؟
الممثل :ـ ( يضحك بخوف ) سيدي وين تكدر تشوفه ، كتلك مخبل ، هذا دائما تلكاه بالمقبره يفلش بقبور الاموات ويلعب بالاعظام جعب ؟
الاسكندر :ـ شيسوي
الممثل :ـ يلعب بالاعظام سيدي
الاسكندر :ـ لازم اشوفه
الملف :ـ وراح الاسكندر للمقبرة وشافوا المجنون قالب الدنيه وداير مدايره الاعظام يباوع بيهن ويشمرهن على كتر
الاسكندر :ـ هاي دشسوي ؟
المجنون:ـ ( ينظر لحظات الى الاسكند يقلب عينيه فيه ) أى هيج ماكو شي
الاسكندر:ـ ( يغير لهجة الكلام) هاي دشسوي ؟
المجنون :ـ بهاي المقبرة اكو سبع ملوك مدفونين
الاسكندر :ـ أي
المجنون :ـ والباقي ناس فقره .. فانه ردت اشوف اكو فرق بين عظم الملك والحمال والعربنجي الفقير
الاسكندر :ـ وشفت ؟
المجنون :ـ ( يؤمي بيديه عبارة اللا ) لا ماكو ابد ماكو فرق فعرفت الملوك والسلاطين مخابيل
الاسكندر :ـ ( برهة صمت ) تجي وياي واسويك ملك ؟
المجنون:ـ ( يستغرب الامر ـ يبتسم)بشرط
الاسكندر :ـ ( يندهش ) وتتتشرط ؟
المجنون :ـ نعم
الاسكندر:ـ صار شنو شرطك ؟
المجنون:ـ اريد عرش انه اصير ملك بي ان يمنحني السعادة والفرحه دوم يعني ولا يوم كون يمر عليه وانه حزين وهاي طبعا بمسؤوليتك لازم انت تضمنهه اليه
الاسكندر :ـ وبعد ؟
المجنون :ـ واريد عرش أنه اصير بي ملك ان يمنحني الغنى الدائم دائما اصير انه زنكيل ولا لحظة تمر وانه فقير وهاي طبعا بمسؤوليتك لازم تكفلهه
الاسكندر :ـ وبعد ؟
المجنون :ـ واريد عرش انه اصير بي ملك ان يبقى الي دائما موباجر عكبه يجي ملك الموت وياخذ روحي وينتهي كلشي وهاي طبعا تبقه بمسؤوليتك
الاسكندر:ـ هي هاي اني اكدر اوفرهه الروحي علمود اوفرهه الك
المجنون:ـ لعد انته اكبر مخبل شفته بحياتي
الاسكندر :ـ واني هم اكلك انته المخبل اكبر عاقل شفته بحياتي
الممثل :ـ مع الممثلة :ـ انه احبج
المؤلف :ـ لك والله خبصتنه
الممثله :ـ آني هم أحبه لو مو من حقي كانسانه ان احب واعشق لو هذا حرام علينه وحلال عليكم
المخرج :ـ هذا الحجي صار بي احراج انهيه
المؤلف :ـ اسمع اني وياك اعتيادي بعد المسرحيه لامين جويلاتنه .. وهذا المشهد بي دسومه مهم جدا مهم وهذا تساؤل سمعته من زمان من احدى الطالبات وجانت تطرحه بالشارع
المخرج :ـ وجاوبته ؟
المؤلف :ـ لا
المخرج :ـ وشسويت لعد؟
المؤلف :ـ قررت ان اجاوبهه هسه
المخرج :ـ اخاف القضية صعبه ؟
المؤلف :ـ عزيزتي الحجي اللي تكوليه هو حقج لكن مو بهذا الشكل اللي تصوريه الحب اله حرمه وبيوت مو اله شوارع ودرابين ما بيهه احد . والحب اليجي من الباب هو الصدق والحب اليجي من الشباك هذا لعب جهال وصعب الحب الصدك هو الحب اليرفع راس اهلج واخوتج والحب الصدك هو الحلم الدايم للمرة والحب الصدك هو الحب اللي ينعلن امام الله والناس بلا مستحة وهذا هو الحب الصادق والجميل وهو حلال الله
المخرج :ـ يلله بدل بسرعة طلعنه فد مشهد
المؤلف :ـ اعزائي المشاهدين وروح أمي آني ادري الملل أخذكم ولكن شسوي والفرح اهواي والعاقل يفهم ومنين ما ملتي غرفتي
الممثل :ـ المشهد جاهز
المؤلف :ـ انطلق
الممذيع:ـ وضع اليوم السيد (ميم) مسؤول ال..ال من الحكومة الحجر الاساسي لسبعة مليون وسبعة الاف وسبعة مائة وسبعة وسبعين مجمعا سكنيا ( تصفيق)
الممثل1:ـ هاي المن ؟
الممثل 2:ـ هاي الاخوانكم المهاجرين والمهجريين
الممثل 1:ـ على راسي
المذيع:ـ وضع اليوم السيد (جيم) مسؤول ال .. ال في الحكومة ( مشهد وضع حجر الاساس ) الحجر الاساس لبناء ثمانيه مليون و ثماني الاف وثمان مائة وثمانية وثمانين مجمعا سكنيا ( تصفيق )
الممثل 1:ـ وهاي المن؟
الممثل 2:ـ وهاي الى اخوانكم المهاجرين والمهجرين
الممثل1:ـ على راسي
المذيع:ـ وضع السيد نون مسؤول ال .. ال من الحكومة ( مشهد آخر لوضع الحجر الاساس )الحجر الاساس لبناء تسعة ملايين وتسعة الاف وتسع مائة وتسع وتسعين حجرا اساسيا لتسعة ملايين وتسعة الاف وتسع مائة وتسع و تسعين مجمعا سكنيا ( تصفيق )
الممثل1:ـ وهاي المن؟
الممثل 2:ـ هاي لاخوانكم المهاجرين والمهجرين
الممثل 1:ـ على راسي
الممثل 3:ـ هاي شبيكم هو شقابضين الله وكيلكم لي هسه بس حجر اساس وماكو كلشي
ممثل 1:ـ نداء من مواطن عراقي .. حاول الطغاة تصنيف المواطنة الى درجات مواطنة أ مواطنة ب مواطنه ج ولحد الدرجة العاشرة
ولذلك نحن ندعوا الحكومة وجميع الاحزاب والمؤسسات وال.. ال عدم السماح لأي جهة تريد تقسيم المواطنة الى درجات من جديد.. مواطنة أ مواطنة ب مواطنة ج ،،
كلما تكبر احلامنه تنهض محنتنه ـ وآنه مهاجر من المهاجرين هاجرت لمدة ثلاثين سنة داخل وطني ـ يومية مهزوم ـ يوميه متهجول من مكان المكان ولحد الآن كاعد بالايجاروالمؤجر يريد يطردني من البيت
ممثل :ـ الله يعوظك
المواطن :ـ بشنو؟
الممثل :ـ ببيت ايجار غير
المواطن :ـ هم بالايجار الله لايوفقك
( مجموعة من الممثلين يجلسون على الارض ـ ويلعبون) ديه بديه ناصر ديه ـ شد الكور علزنبور ـ جتي ابنية من البحر ـ جنهه شكر جنهه مكر ـ جنهه عيون التفتكر ـ يا ايدي دليني عله الخوخ والعنب والتين ) ( تصفيق )
المؤلف :ـ أكو فد حكمه
الممثلة :ـ يابه انت شخبصتنه ـ هي أكو فد حكمه بقت بالعالم متعلمناهه
ممثل :ـ عتيك للبيع
ممثلة :ـ شوف هذا شكد قديم
ممثل1:ـ ها اشلونك اشلونهه جانت الندوه
ممثل 2:ـ حلوه تخبل
الممثل 1:ـ ليش شطرحوا بيهه ؟
ممثل2:ـ حجي كلش حلو
ممثل 1:ـ أي يعني مثليش ؟
الممثل1:ـ والله ما أدري مو آني جنت نايم
المؤلف :ـ ومن أجل ان ندرك فوارق البين ـ بين علينه ان نعرف ان البقال حين يغش بالكيل
المخرج:ـ هسه شجلبت .. المسكين تورط وخيسله طماطتين
المؤلف :ـ أكيد انت تستغرب لمن تسمع واحد فجر مدرسة لو سوك لو جامع ؟
المخرج:ـ أي طبعا
المؤلف:ـ أي انسان عندما يخون الكيل يخون الامانه واليخون الامانه ممكن كلش يخون وطنه وناسه وامته ومن هاي السوالف اللي انته سميتهن اصغار ولدن اشياء جبيره لازم ننتبه الهن من هاي السوالف الصغيره مثل
ممثل:ـ (يطرق الباب ) ابوك موجود ؟
الاب :ـ( يؤميء لابنه ) قله مو اهنا
الممثل 3:ـ عمو ابويه موبالبيت
المؤلف :ـ تعلم ابنك الكذب .. وكلما يكبر يكبر وياه الجذب والفخر للابو
ممثل :ـ ماما شراح اكله للمعلم؟
الممثله :ـ أي مامه كله جنت مريض
المؤلف :ـ وكلما يكبر الطفل يكبر وياه حبه للجذب والخديعه والحيله والمكر وكل الفخر يعود لامه
المخرج :ـ اهلنه يكلون بين الصدك والجذب اربع اصابع ورغم ما حاولوا اهوايه ان يخلون المسافة ما بين الحقيقة وغيرهه مسافه مموهه
المؤلف :ـ جان اكو برنامج يعرض بالستينيات اسمه الشرطة في خدمة الشعب جانوا الحراميه يتعلمون منه اشلون يبوكون
الممثله:ـ البين بين الغوا الفرق بين الرشوه والهديه
المخرج :ـ شرطي مرور يوكف بباب كراج المخيم ـ شاف اجت زفة عرس من بعيد , واه واه ركص ورمي وطوط طوط خابصين العالم ونص الشبان مطلعه اجسامهه من السيارات ورمي ( طاق ـ طاق ) واشرألهم الشرطي .. واجازتك
.. وأخذ اجازة السايق مال سيارة الزفه.. والتموا الشباب داير مداير الشرطي وابو اسماعيل الله يخليك وابو اسماعيل الله يحفظك .. واحد عود صار شاطر وشاله حفنة فلوس وخلاهه بيد شرطي المرور ... وابو اسماعيل باوع عليهن شافهن يسوون .. وماقصر ابو اسماعيل شالهن وخلاهن بجيبه وغير لهجة صوته
الشرطي :ـ اكول هي الزفه منين ؟
ممثل :ـ ابو اسماعيل هاي الزفه من حي الحر
الشرطي:ـ اخاف زفة ..
الممثل :ـ أي ابو اسماعيل هاي زفة حجي عباس العطار
الشرطي :ـ فاضل ؟
الممثل :ـ ( بفرحه) طلع عرف
الشرطي :ـ عيب لازم اروح اهني
المخرج:ـ الله يساعدك فاضل .. على الخير ومبروك
العريس :ـ الله يخليك ابو اسماعيل الله يحفظك
الشرطي :ـ اكول فاضل ومر تك الاوليه على ذمتك ..طل.. قت؟
المخرج:ـ وبعد ما كال شي ابو اسماعيل والدنيه علكت
والناس هنوبه اجو يتعاركون
ممثل :ـ يمعود ابو اسماعيل مدكلي انت شسويت ؟
الشرطي :ـ شسويت :ـ هسه احلهه الكم بس بشرط بعد تمشون عدل سياره وره سياره ومتخربطون ومتخبصون الشارع
الممثلين :ـ والله ابو اسماعيل توبه بس حلهه النه
الشرطي :ـ ومدكون بالشارع هورن عالي طوط طوط خابصين الدنيه هاي اذا انتو بالولايه هيج لعد بالاحياء شراح شسوون
الممثلين:ـ توبه ابو اسماعيل متسمع بعد ولا هورن نمشي خرساوي حتى الهلاهل ممنوعه بعد
الشرطي :ـ ومتطلعون راسكم من السيا ره
الممثلين :ـ ابد والله وهذا عهد
الشرطي :ـ يالله امشوا خلي احلهه .. وينهه العروس ـ عمي سمعي والله انا لااعرف فاضل ولا ابو فاضل بس اكو عدكم اهوايه اخطاء بالزفه وردت اعاقبكم الكم العروس والعريس لن العريس اذا جان ماراضي جان ذوله ميخربطون ـ هسه هاج هاي الرشوه اللي انطونياهه تسوه بيه اريوك قوي وبس سكتي يمعود ضحكي عليج العباس
المخرج :ـ وضحكت العروس بس جذابين ما التزموا وبعدهم ما وصلوا السعديه واشتغل الطاق الطاق والطوط والطوط .. زين ..(ولا تكول استهتار هذا عرسنه )
المؤلف:ـ ردنه في هذا العمل البسيط انكلكم لازم تتوضح المسافة بين خفايا الانسان وعمله
المخرج:ـ ولابد ان نعرف حجم البين بين في كل تصرفاتنه والفارق بين هذا البين بين كل الامور اللي لابد ان نعرفهه ويعرفوهه الناس ما يصير نسمع بالقهوه شكل وبالبيت شكل بالتلفزيون والصحف شكل وبالشارع شكل ونرفع هذا البين الوضوح والعتمه وبين ان نكلكم شكرا وبين ان انكلكم مودعين اكوا باب راح يطلعنكم ويطلعنه
( انتهت المسرحيه )
مسرحية .. ( بين ـ بين )
( علي حسين الخباز )
الممثل1:ـ ( حاجب في زاوية من زوايا المسرح )
الحاجب :ـ مؤلف المسرحية ( موسيقى )
المؤلف :ـ ( وهو يحي الجمهور ) قبل ان نفتتح الستار
الحاجب :ـ مخرج المسرحية ( موسيقى )
المخرج :ـ ( وهو يحي الجمهور ) وقد نفتح الفتنة على حلم ـ يشع في كل نفس
الحاجب :ـ بطلة المسرحيه ( موسيقى )
الممثله:ـ ( تحي الجمهور ) قد نرفع مخملا من ظلال الرغبات
الحاجب :ـ السيد الممثل ( موسيقى )
الممثل :ـ ( يحي الجمهور) وقد نتقاطع او نتصارع من اجل ان نرسم الغواية حوارا
الحاجب :ـ كافي عاد
المؤلف :ـ أو قد نستل من جيوب التواريخ
المخرج:ـ ( مقاطعا ) المثقوبة وريقات رواية
المؤلف :ـ أذن هي فكرة ان نعيش لحظات مع النفس ....قد تطوينا الآهات والاحزان والالام والويلا ت تسلية
المخرج:ـ ( شعبي ) يمعود والله كلوبنه خلصانه ...... يا آهات يا حزن وكل واحد من عدنه صار بي الحزن تشريب ..
الجوقه :ـ( وكانها تاكل ) طعم لذيذ
المؤلف :ـ انطونه فكه ...........والله كريم
الراوي :ـ( باللغة الفصحى) يروي التاريخ ان الخليفة هشام بن عبد الملك قدم حاجا الى مكة ـ فلما دخلها قال
الخليفة:ـ أئتوني بما تبقى من الصحابة
الحاجب:ـ لم يبق منهم أحد فقد تفانوا جميعا
الجوقه :ـ هذا مخبل هو منو بقه منهم
الخليفة :ـ أئتوني اذن بالتا بعين
الحاجب :ـ مولاي الخليفه بقى منهم طاوس اليماني
الخليفة :ـ فآتوني به
الجوقه :ـ انلاصت
الرواي :ـ فلما دخل طاوس اليماني عليه
( يدخل طاوس اثناء كلام الراوي ويسترسل في تمثيله المشهد) الراوي :ـ خلع نعليه على حاشية بساطه ‘ ولم يسلم عليه با مرة المؤمنين كما يفعل الناس ولكنه قال
طاوس :ـ السلام عليك يا هشام
الراوي:ـ وتقدم وجلس بازائه وقال
طاوس:ـ كما انت يا هشام ؟
الجوقه :ـ والله مسيطر
الراوي:ـ فغضب هشام حتى هم بقتله
الجوقه:ـ موعرفناهه ..
طاوس :ـ أنت في حرم الله وحرم رسوله ولايمكن لك ذلك
الجوقه :ـ ذوله يعرفون حرم الله حرم رسوله
الخليفة :ـ يا طاوس ما الذي حملك على ما صنعت؟
طاوس :ـ وما الذي صنعت ؟
الخليفة:ـ ( وقد ازداد غضبا) خلعت نعليك بحاشية بساطي
الجوقه :ـ ويعني ؟
الخليفه :ـ ولم تقبل يدي
الجوقه :ـ وبعد ؟
الخليفه :ـ ولم تسلم علي بامرة المؤمنين
الجوقه :ـ وبعد ؟
الخليفه :ـ ولم تكنني
الجوقه :ـ وبعد ؟
الخليفه:ـ وجلست بازائي بغير إذن ..
الخليفه :ـ وبعد ؟
الخليفه :ـ وقلت كيف أنت يا هشام وكأنك تحدث رجلا عاديا من الناس
طاوس :ـ مهلك علي يا هشام
الجوقه :ـ سبع ..
طاوس :ـ اما في ما فعلت بحاشية بساطك ، فأني افعلها بين يدي رب العزة كل يوم خمس مرات فلا يعاتبني ولايغضب عليّ
الجوقه :ـ بطل
طاوس :ـ واما قولك لم تقبل يدي ّفاني سمعت أمير المؤمنين عليا عليه السلام يقول لا يحل لرجل ان يقبل يد أحد .. الا أمرأة من شهوة أو ولد من رحمة
الجوقه :ـ حلو
طاوس :ـ وأما قولك لم تسلم عليّ بامرة المؤمنين ، فليس كل الناس راضين بأمرتك ، وانا اكره ان اكذب
الجوقه :ـ ورده
طاوس :ـ وأما قولك لم تكني .. فان الله سبحانه وتعالى سمى انبياءه واولياءه فقال يا داود ويا يحي ويا عيسى وكنى اعداءه فقال جل وعلا ( تبت يدا أبي لهب )
الجوقه :ـ ( سكتّه)
طاوس:ـ واما قولك جلست بازائي فانا سمعتُ امير المؤمنين علي عليه السلام يقول أذا اردت ان تنظر الى رجل من اهل النار فانظر الى رجل جالس وحوله قوم قيام
الجوقه :ـ انخرس فدنوبه
الخليفة:ـ (لحظات صمت ) عظني يا طاوس
طاوس :ـ سمعتُ امير المؤمنين عليا عليه السلام يقول ان في جهنم حيات كالتلال وعقارب كالبغال يلدغن كل امير لا يعدل في رعيته (يخرج ويتركه لوحده)
الجوقه :ـ أكلب
المخرج :ـ ( بنفرزة ) كافي
المؤلف :ـ هاي شبيك ؟مشهد مقدمه يخبل شنو التريده بعد ..؟
المخرج :ـ هيج مشهد ميمثل مجتمع بي مليون هشام وما بي ولا طاوس
المؤلف :ـ انت غلطان... لأن المطلوب من المسرحي الحقيقي ان يعتني بتنمية الخير والقوة بالمجتمع وعليه ان يكبر مفاهيم انسانية قد تكون ضاعت ـ اندثرت لكن عليه ان يعتني بيهه لانها موجودة داخل كل روح
المخرج:ـ صدكني هذا الكلام يمثل واقع نظري قد يكون هو أمل بقلب كل انسان لكنه ميشكل ولايمثل الواقع الحقيقي اللي نعيشه
المؤلف :ـ طيب راح اراويك مشهد آخر شوفه هو هذا اللي يمثل المجتمع
( موكب والي يتقدم عبد الله بن غيلان ليعرف نفسه )
عبد الله بن غيلان :ـ ( رجل معتني بمظهره وبلباقته)( بلهجة شعبية) انا مولاي الوالي عبد الله بن غيلان خادمكم المطيع ولي الشرف كل الشرف ان اصحبكم بجولة لتتعرفوا على مدينتنه اللي تشرفت بولايتكم
الجوقه:ـ لك هذا لبلبان
المؤلف :ـ ويسير عبد الله مع الوالي الجديد ويوصلون قرية اسمهه قرية ام عبد الله ويشوف نهر بنص البيوت ويسئل الوالي
الوالي :ـ هذا النهر اهواي بي نفع لاهل القرية
عبد الله بن غيلان :ـ طبعا سيدي الوالي اعزكم الله فهذا النهر يساعد الاهالي على نقل الميرة ويعلم اولا د هذه القرية على السباحة ويفيدهم بارزاقهم لصيد السمج
المؤلف :ـ وعدد عبد الله بن غيلان اكثر من عشر فوائد للنهر
الجوقه :ـ أيا لكلك
المؤلف:ـ لكن بالرجعة وهمه راجعين مروا بنفس القرية وباوع الوالي على النهر وكال
الوالي :ـ لكني اشوف هذا النهر ايضا اله اضراره وهو مؤذي اهوايه اهل القرية
عبدالله بن غيلان:ـ طبعا سيدي الوالي اعزكم الله... اولا.. هو غرك اهوايه من اولاد هذه القرية بعدين هدم اساسات اهواي من بيوت الصيادين والمشكلة كثر عليهم البق بشكل مو طبيعي
المؤلف :ـ وعدد عبد الله بن غيلان اكثر من عشر نقاط يكون بيه النهر مصدر ضر مو نفع
الجوقه :ـ لك هذا لوكي اصلي ( يضحكون )
المخرج :ـ دوكف يمعود هو هذا هم نص نقدمه للناس وبيهج ظروف .. يعني احنه لو انروح للتاريخ انقدم شخصيات خيالية اصبحت الان تبعد عن مجتمعنه بالف سنة من العادات والتقاليد والنفوس البيضة لو... لو نحجيلهم عن بعض امور اللكلكية بايام كبل وعبالك احنه ناقصين لوكية هسه
المؤلف : لحظه لتستعجل
( مشهد غنائي ) وان ولد الفطيم لنا خرت له الجبابر صاغرينا
( وفي الطرف المقابل ممرضة تحمل طفلا تقربه الى ابيه )
الممرضة :ـ مبروك على الخير الحمد لله على سلامة المره هليوم آني اهوايه تعبت وياهه رايحه جاييه
وكلش اهوايه داريته المرتك رايحه جاييه
( تنظر الى الولد) الله شوفه اشلون يخبل اشسميتوه على الخير او بالاحرى شناوين تسموه
الاب :ـ ناوي انسمي عراقي
الممرضة :ـ الله اسم يخبل عراقي اسم وطني يمثل وطنية ابوه وحرصه على وطنه الله شوفه اشكد عيونه حلوه آنه هليوم هوايه تعبت على امه رايحه جاييه
هواي جنت قلقه عليهه الله شلون حلو الله يخليه يخبل وآنه هليوم خلصته يم امه رايحه جاييه
جنت قلقه عليه مريت اكعدت يم راسهه رايحه جايه
الحمد على سلامتها وسلامة الولد الله شلون يخبل شوف عيونه شوف حلقه شوف ايديه اديه يا عيني عليه تخبل وآنه كضيت اليوم يم امه رايحه وجاييه
وانه هوايه فرحانه لامه الله سبحانه تعالى كومهه بالسلامه وآنه ما قصرت وياهه رايحه جايه
الاب :ـ ( يبالغ متعمدا) شوفي هذا الرضيع اللي بين اديج تدرين هذا اشكد عمره ؟
الممرضة :ـ اشكد غير توه اجه للدنيه؟
الاب:ـ لايابه هذا ثلثطعش سنه كضاهه بس جندي مكلف
الممرضه:ـ انته لو...؟
الاب :ـ هوه بابه هوه ولمن اتسرح اخذوه ثلث مرات احتياط
الجوقه :ـ وبعدين؟
الاب :ـ اخذوه جيش شعبي
الجوقه :ـ وبعدهه؟
الاب :ـ لبسوه بجيش القدس
الجوقه :ـ وبعدهه ؟
الاب :ـ سجلوه بجيش النخوه
الجوقه :ـ وبعدهه ؟
الاب :ـ جندوه بيوم النداء
الجوقه :ـ وبعدهه؟
الاب:ـ اخذوا بعقرب الصحراء
الجوقه :ـ وتالي ؟
الاب :ـ طلع افرار وحكموا خمس سنوات سجن
الجوقه :ـ وهاهيه ؟
الاب :ـ لايابه وبعدهه طلع مو عراقي
الممرضة:ـ (باستغراب) وانتوا شسويتوا
الاب :ـ قررنه منوقع دفتره ولا نسرحه من بطن امه ولذلك اجيتي بوقت متأخر
الممرضة :ـ اشوفه لعد تعبان ووجهه اصفر ولا عبالك شكل بشر دخذه يمعود هم فرحان جايلك ولد ؟
المخرج:ـ هذا نص مال امخابيل مو مال عقال
المؤلف :ـ رجال بقال وهوه يعيرلي البضاعة حدثني عن امور النزاهه والعداله والانسانية والطيبةوالعدل والتساوي الانساني وعن ظلم المهجرين والمهاجرين وعن ..وتاليهه طلع بايك من الميزان وغاش بالبضاعة وشفط من عندي الباقي
الجوقه:ـ( تضحك)
المؤلف:ـ رجل سياسي
السياسي :ـ ( يتحدث )احنه لابد ان ننقل للعالم الصورة الصادقة عن هذا الشعب في طريقة تعامله الانسانية الحقيقية وفي مفهوم السلام وخاصة بعد مرحلة التخلص من الطغاة ولابد منا نصرة المظلومين
المؤلف :ـ تالي طلع أكبررئيس عصابة
الجوقه:ـ والرزق على الله
المؤلف :ـ رجل دين
المخرج :ـ ها .. يمعود؟
المؤلف :ـ حقيقة... رجل دين ويصعد منبر خطابة على منبر رسول الله
المخرج :ـ بعدين ؟
المؤلف :ـ هاي صعبه ؟
الجوقه :ـ هسه ننطرد
المؤلف :ـ اذن هي دعوة ان يلتفت يمين يسار دائما اخاف اكو من اهله واقاربه من يستغل اسمه وسمعته بين الناس ويطعن بيهم ويبوك ويسرق ويظلم باسمه .. فيضيع الجهد بلاش للاسف وتنتهي الثقة اللي بينه وبين الناس
المخرج :ـ لكن كل ذني اللي ذكرتهن لايمكن صياغتهن ضمن عمل مسرحي وبعد هذني السوالف الصغار ميكدرن يمثلن مجتمع بقيمه واخلاقة هذني اسوالف صغار
الجوقه :ـ ( باستغراب ) اصغار ؟
المؤلف:ـ مو احنه انخاف يكبرن
المخرج :ـ انه ابحث عن شيء يهز مشاعر الناس شي يعيش وياهم ويكبر وياهم عليك ان تفكر فعلا كيف تدك على هذه الصدور اللي اجتك شايله هموم الدنية وتريد ترّوح عن نفسهه شويه وما اعتقد مشكلة ان احنه نقدم الفرحه الهم رغم كل هذه الصعاب اللي يعيشون بيهه رغم التفجيرات والتفخيخات ومثل هذه الامور ..
المؤلف:ـ ( مقاطعا .. يواجه الجمهور ) ياايها الناس الاعزاء اني راح احمل لكم في نصي المسرحي حجاب (بازبند) يطرد عنكم الهم ويزيح الالام ويفرحكم كلش اهواي راح اعبرلكم عن روح السلام والمحبة وانسيكم كل هذه التفجيرات والتهجيرات والمفخخات والغي وجود عصابات القتل وميليشيات الدم و الدمار وراح اكتبلكم عن الكثير من القيم اللي نسيانهه او كدنه ننساهه وبقينه بس انسولف بيهن سوالف وهذه لمة العشاير العظيمة
الجوقه:ـ اشبيهه؟
المولف :ـ اللي صرنه ما نشوفهه غير بس بمشاكل الفصل وسوالف الفصاله.. وهذه الشعارات العظيمة
الجوقه :ـ شبيهه ؟
المؤلف:ـ صرنه نشاهدهه بس باللافتات و بالتلفزيون ونقراهه بالصحف وانه راح ادور داخل نفسي عن كل فرحة وحتى لو ماتت اجيبهه وانشرهه كدامكم علمود نضحك.. نضحك ونبقة نضحك(يضحك) ونبقة نضحك من اجل ان يصير نص يخرب ضحك والحمد لله ماكو كتاب مسرحيين يتعينون بالواسطة علمود نخاف ونكول يجيبون غيرنه يكتب النصوص واله جان من زمان ( ايماءة الطرد) رفسونه .. آني راح اقدملكم شخصية آني نفسي ما اعرفهه لأن كل الناس اللي اعرفهم همه ناس تعبانيين ولا واحد منهم يصلح ان اجيبه علمود ترتاحون وتفرحون وتضحكون وتكولون والله عدنه كتاب كموديا يخبلون اشلون راح انقل الكم الفرحة وانه ابن رصيف عانه ما عانه من الم وتعب ونزف جروح عمره سنوات من ضيم .. ضحكوا ضحكوا وياي ( يضحك)
الجوقه :ـ ( تضحك)
المؤلف:ـ وخلي ننسه كلشي علمود نقدم عمل جميل تره حتى الاحزان هي نوع من انواع الضحك واهلنه يكلون شر البلية ما يضحك ...لكن مشكلتنه احنه العراقيين منقبل واحد يضحك علذقون ضحكوا وخليني اسولفكم عن ربعي المتصعلكين والمشردين والجوعانيين والعريانين وراح اسولفلكم سوالف تطكك من الضحك .. فاني المؤلف اللي عليه ان امثل تعبكم واحمل الامكم وهواجسكم وان اجلب الكم الابتسامة والفرحة ربما جانت البداية ضعيفة لأني متعودت ان اكون بيوم من الايام وهم من هذه الاوهام الهوايه الترست البلد والي تمر بحياتنه يوميه اريد ان اكون حقيقة ورغم كل هذي الالام الا انه راح اقدملكم عالم جميل بعيد عن التعسف والظلم والارهاب راح انقل الكم حياة مرفهه سعيده واروايكم شوارع نظيفه
الجوقه :ـ مابيهه اوساخ ؟
المؤلف :ـ ولا كومات زباله، شوارع مابيهه طسات كل طسه تاخذ الروح
الجوقه :ـ لعد شلون راح نمشي ؟
المؤلف وراح اروايكم مدينتكم ولاخرابه بيهه واشجارابد مو ميته ولانخل يبجي من الدوباس راح اجيبلكم قمر بس مو اعور ولا هو مثلوم راح اقدملكم انسان أبيض مثل الحليب ميعرف يجذب ولا يغش ولا يخدع أحد ولا يعرف ينبح
الجوقه :ـ ( تصفق )
المخرج :ـ يا به بشرفي انته تخبل ....اشويه دمع وطاسه ويامحسنين بالله وسنتين اتطك اكبر تاجر بالبلد
الجوقه:ـ ( جميعها تأخذ دور المتسولييين) ياالله
ممثل :ـ بشرفي خوش شغله ؟
المخرج :ـ اخي من حقك كانسان ان تحلم مثل ما تريد لكن هذا مسرح يريد شخصيات تتحرك شخصيات من دم ولحم وحوارات نشطه وجديه تعبر عن تكوين الانسان والامه وطموحاته نريد ديكور وموسيقه وتمثيل آنه اريد مسرحيه مسرحيه مو رايح تحجيلي عن كومة مجانين
ممثل:ـ (يخرج راسه من بين الستار ):ـ احنه عزلنه ومخابيلنه اليوم عدهم اعتصام
الجوقه :ـ أي نعم اعتصام لعد ربنه وحد
الممثل:ـ اعتصام ضد سياسة المحتل
الجوقه :ـ تسقط امريكا
الممثل :ـ محد يجيب طاري المجانين زين الا ان ناخذ كامل حقوقنه الماديه والمعنويه احنه احرار نتخبل بكيفنه ونعقل بكيفنه واللي عنده اعتراض وين يروح يشتكي خل يشتكي
الجوقه :ـ يلله
الممثل:ـ واحنه نطالب السلطات العراقية باجور ( اوفر تايم) وبعد سنتين او ثلاثة يصير خبالنه نموذجي ويتقلد من قبل اغلب المؤسسات والمواطنين الاوربيين والاجانب والعرب المرفهين يصير اخبالنه عمله نادرة ومنبيع ولا نصدر مخبل واحد الا بالدولار زين( فقره اعلانيه ) روحوا لعبوا بعيد عنه .. اهناك يلله ماما تدور عليكم .. بالمناسبه عندي الكم اقتراح كلش حلو
المخرج ( بسخرية) اقتراح
الجوقه:ـ أي اقتراح اشبيكم ما نعرف نقترح شني
الممثل:ـ مو هذا العالم كله كاعد يقترح واقتراحات ما ينطلع بيهه .. تصور اكو عاقل يصدك وزير الشؤون الدينية بدوله عربيه مسلمه يطالب حكومته بشن حرب اباده على الحجاب لأنه يمثل مظهر من مظاهر الطائفية .. هسه لو جان وزيردوله اجنبيه .. كلنه معليش ..لوجان وزير الداخليه .. وزير الثقافه والفنون جان كلنه بيهه باب وجواب ويردونه ..بس بابه هذا وزير الشؤون الدينيه .. تعرف شنو وزير الشؤون الدينية بشرفكم هاي لو مسولفهه مخبل موجان فشختوه .. فانا اليوم كطعت بعقلي ولازم اقترح ..( فقره اعلانيه)
المخرج:ـ أي دقترح وفضنه
المجنون :ـ فلشوا الفرقة
الممثلين:ـ نفلش الفرقه ؟
المجنون :ـ أي فلشوا الفرقة
الممثلين :ـ وبعد؟
المجنون :ـ وعيفوا التمثيل
الممثلين :ـ ونعيف التمثيل ؟
المجنون :ـ أ..ي عيفوا التمثيل فد مشكله
الممثلين :ـ وبعد ؟
المجنون :ـ وجم وصله بالخصر
الممثلين :ـ وبعد ؟
المجنون :ـ ـ وجم هزه... وشعرـ شعر.. وانتم ما عليكم تتلكاكم الفضائييات بشهرين احسن فرقة بالعالم تصيرون و تصيرون زناكيل كلش وهاهيه
الممثلين:ـ امداك
المخرج :ـ (يضحك)
المؤلف :ـ وانا شسوي ؟
المجنون :ـ اشتغل محلل سياسي
ممثل :ـ (فقره اعلانيه... يمسك المايكرفون ليجري لقاءا مع المؤلف ) ما رايك باكلة الباكله ودهن وهي تشهد تباعد المواطن عنها بسبب الغلاء الدهنوي ؟
المؤلف :ـ شو ديعفنه وخلي انشوف المشهد
( عدة جنود يلبسون ملابس الجند القديمةوهم يقرعون الطبول دون استخدام المايكرفونات )
المنادي :ـ ايها السادة اهالي مدينتنا الكرام
الممثلين :ـ أي نعم
المنادي :ـ امر صادر من حضرة مولانا الامير
الممثلين :ـ حفظه الله ورعاه
المنادي :ـ يمنع اكلة الشلغم
الممثلين:ـ يعيش مولانا الاجير
المنادي :ـ والشوندر
الممثلين :ـ يعيش مولانا الاسير
المنادي :ـ ويمنع فتح النوافذ ليل نهار خشية ان تتلصص بناتنا على الشوارع والطرقات
الممثلين :ـ يعيش مولانا البعير
المنادي :ـ وقرر الامير غلق جميع المدارس وخاصة خاصة مدارس البنات
الممثلين :ـ يعيش مولانا الصرير ..توهه انضبطت
المنادي :ـ وقرر مولانا الامير عدم السماح للمواطنين الذهاب الى الصلاة جماعة في جوامعنا الا لمن يحمل الكلاشنكوف
الممثلين :ـ طططط ططططط
المنادي :ـ ويقف في الطابور الاول من الصلاة حملة القاذفات والهاونات ويزيد الله في اجر اهل الصواريخ ويمنع شرب الماي البارد والجاي الحار واكل الفلفل ومن يخالف اوامر الامير نحرك ابو ابوه نذبحو بالسيف ذبح النعاج واعذر منم انذر .. عاش مولانا الامير
الممثلين :ـ عاش عاش عاش
ممثل :ـ ( باللغة الفصحى) قبل سنوات كنت انظر الى بلدي فلا اراه الا ميدان قتال يغص بجثث القتلى والشهداء كنت حينها لااجيد سوى الضحك ( يضحك )
الجوقة :ـ (يضحكون) اضحك اضحك كلما كنت اسمع ان خندقا ما يحمي المظلومين ويأوي انفاس المرعوبين كنت اكثر الناس خوفا وعشت عمري كله خائفا لكن لا ـ كان عليّ ان اخدع نفسي واخوتي وبيتي ومدرستي وأضحك مرعوبا اضحك حزينا اضحك باكيا أضحك ثلاث رصاصات في جسد لن تعرف بندقيته سوى خرقة الادامة وربما كنت ارمي فيها احيانا آهاتي وأنيني وحسراتي ـ ودخلت ذات يوم للخندق فوجدته كبطن أمي وكنت اصرخ في حينها أين أنا ومن أنا الآن صرت ( باللهجة الشعبية)اسمع صوت الرصاص بباب الحلم يختصر اهوايه من المسافات ـ هسه كل زفة عرس (طاق طاق ) واتخيل هجوم كلما يصير العيد و(طاق طاق) واتخيل هجوم كلما يفوز الفريق العراقي بلعبة طوبه (وطاق طاق )( فقرة أعلانيه) وكلما يبوكني بقال اتخيله عدو وكلما يكذب عليه عطار اتخيله جاسوس وكلما يسولفلي واحد عن الهم اتخيله من الطابور الخامس
المؤلف:ـ عظيم لابد اذن ان نخلع الاقنعة كي نرى انفسنا ويرانا الناس (بالشعبي) ولازم نتعره عن ذواتنه يلله نكدر نقدم مسرح حقيقي للناس لابد نوكف على اعتاب كل آهه وكل حسره وكل ابتسامة عاشق رسمتهه اله احلامه ونصيح بعالي الصوت تعالوا خلي نمزق كل الستائر المزيفة تعالوا( فقره اعلانيه) خلي نضحك احنه على الامير وسوالف الامير اللي يريد يحرمنه الضوه والهوه والماي واحنه نعيش عام 2006م تعالوا خلننهض علمود ينهض ويانه هذا العراق
المخرج :ـ ليش متصعد منصه فدنوب
المؤلف :ـ خلصنه العمر نحجي بهدؤءواخيرا اكتشفنه ان الهدوء ما يكدر يواجه صوت البنادق والرصاص ولايكدر بيوم يهز ضمير مو ظف يختلس من اموال شعبه ولا يكدر يهز وجدان حرامي
المخرج:ـ والله لوتوذن ما تكدر تهز شعره من احد قبل ان يمشي بطريق اعوج وعن اختياره
المؤلف :ـ لكني بطلت اريد ان احافظ على العدل من اجل ان لايعوج
الجوقه :ـ( تهزج) بطلنه منريدالعنب نريد سلتنه
المؤلف:ـ ( وكأنه يتذكر) بالمناسبة عندي صديق محامي أخذ اتعاب اكثر من اموال القضية المتنازع عليه ـ اليوم الكل تسولف عن العدل والمساواة والانسانية والحرص على الوطن اليوم سموا الرشوه هديه وقسموا الجذب الى ابيض واسود واحمر وتسولفلك عن الحرام وتشتم اللصوص الكل يشتم اللصوص غريب لعد منو اللي ديبوكنه منو ؟..
الممثل :ـ ( يطرق احد الابواب )
الممثله منو ؟
الممثل :ـ حجيه الله يساعدج
الممثله اهلا عيوني
الممثل :ـ كوليلي البارحه موانتو انباكيتوا
الممثله :ـ أي نعم احنه نباكينه الله لينطيهم هو احنه اشعدنه وباكونه
الممثل :ـ حجيه هم شفتوا فردة حذاء علسطح
الممثله :ـ أي عيني هذا لازم مال واحد من مضروبين الجلوه انزع من رجله
الممثل :ـ أي حجيه رحملله والديج ناوشينيا لأن هذا حذائي
المؤلف:ـ اعزائي سادتي الحضور حين تكون الحياة بسيطة تقدر اتباوع من النوافذ وتشوف الصبح اشكد جميل وتكدر تطلع الى عملك وانت مرتاح علمود تقدم وتبدع وانت مرتاح الضمير من دون ان تتحسس جيبك علساع اخاف ينباك وحتى لوجان ينباك كبل اكو من يدوره من جوه الكاع ويجيبه اكومن ياخذ القصاص طك بطك وهو حار لأن الشغلات جانت بسيطه حتى السوالف جانت بسيطه ودائما مال الحرام يروح للحرام ودائما الحرامي ياكل من روحه من روح غيره
ممثل :ـ الله يساعدك
العطار:ـ اهلا وسهلا تفضل
بيش كيلو الدهن حجي
العطار بربع دينار
الممثل :ـ خلينه فد نصف كيلو
الممثل 2:ـ ( مع العطار ) حجي هذا دا ياكل باللبن
العطار :ـ عيفه ابني ما عليك بي الف عافيه
الممثل :ـ (ياكل من اللبن بسرعه )
الممثل 2:ـ حجي مو هذا راح يخلص اللبن
العطار :ـ عيفه وليدي انت ليش حارك كلبك هذا دياكل من الدهن ماله
المؤلف :ـ اثاري العطار كلما ياخذ المشتري من اللبن هو ياخذ من الدهن فلا تصدكون حق يضيع نريد نطلع دون ان نسمع في الحافلات من يشتم السياسة والسياسين والوطن والوطنيين وبدون ان يعرف شي عن الواقع اللي يعيشوا هؤلاء الناس دون ان نخلي فارق بين اللي عشنا كبل واللي شفتا كبل من ظلم وتعسف وسجونات وحروب وكأن احنه بالعجل نسيناهن واليوم صرنه بس نعترض بس نحتج دون ان نفعل شيءواحنه الان صاحبين قرار والمشكله احنه انفسنه نحجي بشي ونفعل عكسه وتضاده
( مشهد خطوبه)
الممثل الاب :ـ انت شتشغل وليدي ؟
الممثل 2:ـ اشتغل ويه خالي
الاب :ـ وخالك شيشتغل ؟
الممثل2:ـ عطال بطال ..عاطل عن العمل
الممثل الاب:ـ والمطلوب
الممثل 2:ـ جاي اطلب القرب من عندكم واريد اخطب بنتك
الممثل الاب :ـ والطلبات اشلون ؟
الممثل 2:ـ بسيطه عمي تهون
الممثل الاب :ـ واحنه ايضا ناس على كد حالنه منطلب اهوايه ـ انريد بس خمسه مليون للعروس وثلاثة لابوهه واثنين لامهه ومليون لاخوتهه الصغار ونريد نص كيلو ذهب وبيت يسجل بسمهه
الممثل2:ـ وبس؟
الممثل الاب :ـ اكو شغلات صغيره كلش
الممثل2:ـ واني حاضر
الممثل الاب :ـ الاخشاب منريدهه جاهزه وعدنه نجار محترم يصير ابن خالتهه والاحذية منريدهه جاهزه عدنه ابن عمتهه يشتغل بالاحذية النسائية والملابس منريدهه جاهزه عدنه عمتهه خوش خياطه والمطعم والصالون والفندق اقاربنه موجودين انت بس عليك تدفع وهاي هيه
الممثل 2:ـ هذا مهر لو طلع مشروع تجاري ؟
المذيع :ـ ولهذا السبب وتداركا للواقع المؤلم الذي يعيشه شبابنا قرر المجاهدون تفجير جميع مواكب الزفاف بواسطة المفخخات ومنع اقامة الافراح والاعراس حفاظا على طوبغرافية المجتمع وقد اعذر من انذر.. والله اكبر وليخسأ الخاسئون
الممثل :ـ ( مع الممثله ) أنا أحبج
الممثل2:ـ هذا حرام وليدي
المخرج :ـ اعتقد المشاهد بدت تتصاعد نحو الجيد لكن عليك اشويه اتخلي رافة وخشوع
المؤلف :ـ تريد رأفة
المخرج :ـ اشوية رافة
المؤلف :ـ اشكد تدفع ـ ورّق
( مشهد تمثيلي أمرأة تبكي ـ رجل يضحك )
المرأة :ـ أي كتلك عمك مريض بس ما كتلك ودي للطبيب (تبكي)
الرجل :ـ ( يضحك)
المرأة :ـ هاي انته موتت ابويه
الرجل :ـ هاي فوك ما ردتله الزينه
المرأة :ـ منو كايلك توديه للطبيب
الرجل :ـ بابا هو كلي وديني للطبيب لو ما مودي هم جان كلتوا محد دايرله بال ــ وشو آنه بس وديته للطبيب ـ نيمه على السرير ـ وفحصه عدل ـ حط السماعه على صدره ـ كله كح هو هم الرجال كح كحه اصليه ـ كله الدكتور تنفس هو الرجال هم اتنفس كلشي مابي وكله الطبيب كلشي ما بيك اشوية استبراد وصرفتلك دوه بس تشربه تطيب
المرأة :ـ لعد ليش شبيه ؟
الرجل :ـ اشو ابوج كله للطبيب شتأمر دختور ـ كاله الطبيب ما يأمر عليك ظالم ـ بس الراجيته بثمن تالاف دينار ـ وابوج ماعت روحه ولاحس ولا نفس
المرأة :ـ يعني ما حجه شي ما كال شي؟
الرجل :ـ لا بس سمعت روحه تكول شدعوه ذوله اطباء لو حرامية
المؤلف :ـ انتهت الحروب وانتهى زمن الطغاة فلم نعد كما كنا وقودها لكن بقيت بعض مفردات التعب بقى لدينا ذلك البين بين الذي يشغلنا به العتاة يوم يفتعلون النه ازمة بانزين ويوم يخربون الن الكهرباء ويوم ازمة ما ادري شنو
المخرج :ـ كلهه بسيطه لكن المهم ان ما تكون هناك ازمة اخلاق
المؤلف :ـ الازمة الاخلاق وان انوجدت فهي فعلا من بقايا السلطة ولكن يبقه علينه اللي لابد ان نتعلمه هو كيف نتصرف بقيمنه الاصيله كيف نتحد علمود بعثهه من جديد بداخل نفوسنه اللى تعبت ..علينا ان نعيش حياتنا ما دام اكو شمس واكو هوه واكو ماي وعدنه حكمة رجالنا علينه ان نتعلم فقط اشلون نبعث بحمله وطنيه لهذ ي الاخلاق اللي ربينه عليه
( مشهد تمثيلي )
ممثل 1:ـ استادي الكيت الك حصان يخبل احصان يافع وسريع واصيل ورخيص احصان مال واحد محتاج واكطعت وياي السعر بثمانين درهم بس
ممثل 2:ـ ( مع الثالث ) بيش بعته
الممثل3:ـ بعته بثمانيين درهم
الممثل 2:ـ ( وهو يتفحص الحصان) جميل ورائع هذا الحصان اصيل وحلو تقبل تبيعه بمية درهم
الممثل 3:ـ سيدي اذا انه بعته بثمانين درهم اشلون ما بيعه بميه
الممثل 2:ـ حلو هذا الحصان اصيل جميل (مع الاول) أنطيه ميه وعشرين درهم)
الممثل 1:ـ أي مو آني حصلته بثمانين درهم افلوسك زايده
الممثل 2:ـ آني لمن اوكف كل يوم واصلي خمس مرات امام الله واكول اشهد ان لااله الا الله غير عليه ان احمل معنى هذه الشهاده وان ابعد نفسي عن المساهمه في استغلال الانسان حتى لو كان هو قابل ومستسلم وراضخ لمثل هيج استغلال ..الحصان يسوه ميه وعشرين درهم بعد عليمن هلشطاره
المؤلف:ـ ولت الحرب اللي جانت تحمل نتانة التاريخ ,, لكنها بقت تعيش بنفسيات الكثير من عدنه فهي تحتاج من عدنه ان نساعدهم على بعث هذه القيم النبيله بيهم فنشوفهه صارت حرب نفسيات ومصالح وحرب اخلاق ومطامع شي غلفوهه بسم الدين وشي غلفوه بسم الوطنية وهناك صراع بعده موجود ليهسه داخل كل انسان ـ ومهما كبرت الموائد بعد لسه اكو جوع نهم ياكل باجسادنه وهناك ضعف بالرحمة بقلب كل انسان وهناك مساحات حاولوا ان يكبروهه بين كل انسان وانسان وبدت تكبر علمود تصير المساحة الفارقه بين كل بيت وبيت وعلمود تبتعد كل محله عن المحلات الباقية وعلمود تكبر كل مدينة بعيدا عن باقي مدنه وعلمود يتفرق الوطن داخل الوطن
( مشهد)
ممثل :ـ ( ياللغة الفصحى ) هل عليّ ان ابقى داخل هذا الجوع الذي يغتالني بصمت هل علي ان ابقى تحت ظل هذا الحزن الذي يغتالني كل لحظة ـ هل علي ان احذر من نفسي ومن أخي ومن العدو في آن واحد بينما الذاكرة تتزدحم وتتشابك باشياء لها طعم الحلم
المخرج :ـ هناك شعور ساحق بداخل كل انسان من عدنه علينه ان نتخلص منه وجميل لحد الان شغلنه اللي اشتغلناه فقط نحتاج الى ان نعرف هوية القاتل الحقيقي والجاني الحقيقي بحق شعبنه وكل ما تحتاجه الان المسرحيه هو بعض الحوارات الناضجه
المؤلف :ـ نعم انا الخالق الواهب للحياة داخل هذه المسرحية انه الان اكدر اوكف بباب أي مسؤول واكله انته اشلون صرت مسؤول وشلون وصلت واكدر اكله انته ليش دائما تكرر مصطلح الضرورة الضرورة ان نعمل وضرورة ان نبني أي متبني وتعمل هو منو منعك لويش كل واحد يتشبث علمود يصير قائد الضرورة
المخرج :ـ ما اعتقد احنه نريد ان تتحول الخشبه الى مقصله
المؤلف :ـ الصحف تكذب الفضائييات تكذب المسؤولين السياسين الكتاب اغلبهم بعتمدون على المبالغة والكذب أحنه نريد فقط ان نحتفظ بهذه الحسنه ومنجذب
الممثل1:ـ طلعنا
الممثل 2:ـ من ملح الارض ومن كل ذرة رمل ومن كل درس تعلمناه الحزن، الفرح ،الصلاة
الممثل1:ـ طلعنا
الممثل 2:ـ من المقابر الجماعية ومن السجون التي اكتضت برائحة الالم .. وطلعنا كالرعد كالصرخة كزغرودة عرس بقيت تبحث في كفن الزمان سنوات من الضيم فتعلمنا كيف ننام على الارض نلتحف الارض
الممثل3:ـ وشبعنا من الجوع وشبعنا من الخبز الاسمر الملتصق برائحة الطين
(مشهد)
الممثل 4:ـ نقدم اليكم السيد ال..... الذي يشغل خمس وعشرين منصبا ويمثل سبع احزاب وله راتب تقاعدي بكذا مليار وله خمس وعشرين عماره وثلاثين محال تجارية واورزدي باك وفيليقين حماية
الممثل 1:ـ نطالبه اذن
الممثل 2:ـ باعادة الحياة لكل نخلة ذبحوها ـ وباعادة الفجر الذي صلبوه .. فالسياسة لاتعني الضعف والقوة لاتعني القتل
الممثل 1:ـ نطالبه اذن
الممثل 2:ـ رأيت أمس وطني يجلس على مصطبة خارج البيت
الممثل 1:ـ نطالبه اذن
الممثل 2:ـ ان يكون انسانا اولا
الممثل 1:ـ وان يلحق ما تصدع من الارض ـ ويبعد بأسها كي لايموت الشجر .. والانسان
الممثل2:ـ وان لايتقرب الغرباء الى نخلنا وماءنا ونفطنا
الممثل 2:ـ ( يضحك ) لوتيه آخر زمن باكوا النفط وفجروا المستودعات وضربوا وسائط النقل ونادوا الله اكبر ازمة البانزين متنحل وذبحوا الطاقة وكصوا رؤوس الاسلاك وصاحوا الله واكبر كهرباء ماكو رادوا تستفحل ازمة الخبز ذبحوا ثمانين خباز بس ببغداد
الممثل 1:ـ هاي اشبيك مو السيد المخرج عنده ضيف يريد يقدمه للناس
الرجل السياسي :ـ اطمئنوا تماما فبعد قرنين سنستيقظ من النوم ان شاء الله ونشرب شاي الحنين الى الوطن سنعود ان شاء الله لنبني العراق فانا شخصيا قد سجنت لمدة سبعة قرون وهربت بعدها لاخدم في بيوت الطغاة وعملت لخدمة وطني كمشخص في الانتفاضة وحين عدت الى بلدي لم اجد الا البطالة والعطالة التي تذبح عرق التعابنين فهربت ثانيا الى وطني الجديد
الممثلون :ـ (ينشدون)
كاعدة على الشط ـ كاعدة تمشط ـاجاهه نومي ـ كللهه كومي ـ سكركب البرية لتبجين عليه ابجي على رجولج رجولج الف وميه
الرجل السياسي :ـ ( بلهجة الخطابة ) سنعمر هذي البلاد
المؤلف :ـ يروي احد المفكرين ـ انه جان اكو فد رجل مصلح يعبد الله ويخاف على اهل قريته وناسه وجان هذا الرجل ليل نهار مفرغ نفسه يحل مشاكل الناس ـ ويفكر ليل نهار باصلاح حال قريته وفجاة بأحدى الليالي طلعله فد شي مرعب ..
خاف هذا المصلح خاف هوايه لكن فجأة كلله :ـ لتخا ف اني صديقكم الشيطان أجيت عليك اريد اسوي وياك عقد عمل
المصلح :ـ (وهو خائف ) عقد عمل
الشيطان :ـ نعم عقد عمل .. فاني مستعد ان اسوي وياك اتفاق
المصلح:ـ اتفاق على شنو؟
الشيطان :ـ أني مستعد ان اعمرلك القرية .ان احوله الى جنه واعدلك احوال الناس افقر واحد بيهم اخلي ازنكل العالم شوف العرباين
المصلح :ـ أي شبيهه ؟
الشيطان :ـ اخليهه تتحول الى سيارات آخر موديلات شوف هذي الخرايب
المصلح :ـ اشبيهه هي قريتنه كلهه عباره عن خرايب
الشيطان :ـ اخليهه تتحول الى عمارات شاهقه شوف هذه المزابل التارسة القرية
المصلح:ـ أي شبيهه ؟
الشيطان :ـ اسويهه الك حدايق جميله وزاهيه بالوانهه وبرائحته الزاكيه.. وبعد اني مستعد ان انفذ الكم كلشي تريدونه
المصلح:ـ والمطلوب ؟
الشيطان :ـ شي بسيط مجرد تفهم الناس ان هذا العمران هو بسببي اني الشيطان مد ايده وياكم وهو الي بناها وعمرهه وهو اللي سوه حالكم بهذا الشكل الحلو وتفههم انه الفقر اللي كنتم اتعانون منه الشيطان هو اللي حوله الى غنى وخليهم يفهمون انه انه الشيطان اللي بعث بهذا الجمال اللي يتمتعون بي وصدكني بس توافق ما هي الا غمضة عين واخلي هذه القرية اجمل مدينة بالعالم وهي فرصة ولا تضيعه من ايدك
المؤلف:ـ وقبل المصلح قبل هذه الشروط واتوصل باتفاقه مع الشيطان بفكره انه راح يقدم خدمه جبيره للناس قبل بالاتفاق علمود ناسه واهله وان كلفه هذا الاتفاق ان يفقد ايمانه وتم الاتفاق وغمض عينك ـ غمض عينك وفتحهه ـ واذا بالقرية اجمل مدينه بالعالم عمارات واسواق ضخمة ومحال رحبه جبيره وبيه اشكال الوان وهذه القريه اللي جانت قبل اشويه قذره تتحول الى شوارع مبلطه ونظيفة والخرايب صارت قصور فارهه وضخمه وماكو عرباين حمير وحصن اكو سيارات وسيارات عينك ومتشوف .. لكن المشكله بعد ايام اكتشف المصلح انه يعيش بمدينه عامره بالفساد وطياحين الحظ قمار ودعاره وسكر وعدم مسؤوليه كل انسان ملتهي بملذاته وميهمه حتى عرضه ميسئل عنه وبدت الناس تشكي بعضه البعض وتبجي على ايام كبل وانعرفت هذه المدينة باستهتارهه بكل قيم الدين والانسانيه فادرك المصلح حينهه
المصلح :ـ ( يبكي ) العمران الحقيقي هو العمران اللي يبدأ من ذات الانسان اولا
المؤلف :ـ فهي دعوة جادة ان نسعه سوه لبناء الانسان العراقي وهي دعوه لعمران الانسان العراقي اولا وبعدهه انشوف اشلون راح يستقر البلد واشلون راح تزدهي اراضينه الزراعيه بخير واشلون يعله دخان مصانعنه وننتج الزهو والبركه واشلون اتخضر هالكاع بخيرات الله سبحانه وتعالى
المخرج :ـ ( ساخرا)كل اللي نحتاجه فد دبل طابوق وسيارة جص بباب روح كل واحد من عدنه وانشوف بنّه بي حظ وانتهت المشكله
المؤلف :ـ لاتستهزأ لأن فعلا احنه بحاجه الى بنه يعرف اشلون يبنيلنه الانسان علمود تستنهض بي قيم الخير اني كبل ايام شفت ابن تاجر جبير وهو عضو ( ههههههههههه) واذا بي واكف سره ويه العوائل المتعففه يريد ياخذ اشوي عدس ودهن وشكر صدكني هذا الرجل التاجر والمسؤول لو جان يعرف قيمة نفسه جان اعترف ما منحه الله سبحانه تعالى من خيرات وجان ساهم هو بزيادة هذه البضاعه اللي اتبرعوهه ناس يجوز اقل منه غنى لكن اكثر منه انسانيه جان عرف ان يخلي قيمه لمنصبه ولوضعه ولانسانيته موبس يحسب بالربح حتى لو جان شوية تمن وعدس
.. اني مؤلف المسرحيه آني اللي عليه ان يفرش اليوم الكم قلبه وسفرة احزانه بس بعد ما يحولهه الى شي جميل يحمل الكثير من هواجسه بعد ما يشحنهه بالامل الجميل والنبؤات السعيده أنه عليه كانسان ان احمل المعنى الابهى للناس قد اكون اني ملاك وقد اكون اني شيطان لكن يبقه شي لذاتي فانا ارفض ان اكون القاتل والقتيل بنفس اللحظه آني
المخرج :ـ يا أخي كافي آني وأني مودمرت المسرحيه والله
المؤلف :ـ آني غصبن عليك قبلة (بوسة ) هذه الفرقه لعيون الناس الجايه تشوف المسرحيه
المخرج :ـ وهاي الاغلبتني بيهه
المؤلف :ـ وانه اريد هذه القبله اتصير بمستوى محبة هاي الناس
الممثل 1:ـ والله راح تنسونه ادوارنه
الممثله:ـ (تطلع رافعة يدها احتجاجا ) انا اطالب بدور اكبر يليق بمركزي كامرأة في هذه المسرحية وامثل المركز الاجتماعي لكل امرأة ومالها من دور اجتماعي فعال في الواقع السياسي الجديد واطالب المؤلف بان ينظر ابعد من قدميه وباعادة النظر في هرطقته التي يسميها مسرحية واعتقد ان على المخرج كان ان يرفض هذا العمل منذ البدايه
المخرج :ـ وكعت براسي اني المسكين العلي ان أحمل كل هذه الهرطقه لأخرجها الى الناس بشخوصها بدمهه ولحمهه بامانيهه الحلوه وانا اللي عليه ان احمل هذه الاحزان بماعون من ترافه وامل واقتحم بيه وجوم الناس ، اكو فارق جبير بين الكلام والفعل بين البين الاول وبين البين الثاني والمشكله الجبيره والوحيده على ما اعتقد هو هذا الفارق الجبير بحياتنا واللي اكو اهواي مثل المؤلف يفتخرون بي وينسون انه بينه وبين الفعل الجوهري اللازم يتقدم للناس ـ الفارق جبير بين ان نكول وبين ان نعمل ـ السياسي حين يخون الوطن ما تشفع اله كل كلمات الكون ولا انتماءاته الفرعية تكدر ترد اله هيبته بنظر الوطن والمواطن ـ وحتى الوطني اللي يعتمر القهاوي وبس يسولف عليه ان يعرف ان الكلام عمره ماجاب الوطنه الهيبه والعز منريد كلام كافي بعد منريد حجي ونصوص واقوال نريد فعل عمل انتاج نريد شغل
الممثله :ـ اقحمتونه بصراع احنه في غنه عنه حاصرتونه واحنه عمرنه كله عشنه محاصرين من كل جهه ـ خيول خيول تقتحمنه دائما خيول من حجي وخيول من تصريحات وخيول من مواعيد وخيول من فتنه وفرقه وخيول ـ خيول الحروب وخيول الحصارات وخيول الشعارات وخيول التهجيرات وخيول التفجيرات وخيول الطمع اللي يلعب بالسوك وبسفرة الفقراء وخيول الجشع وخيول تقتحم شي حامله سموم افكار مسمومة وصحف مسمومة وفضائييات مسمومة وبعدكم ليهسه تتصورون الامنه وهمومنه وحسراتنا وبجينه ممكن تصير لعبه بمسرحيه ،، اتشوف اليوم زادوا الشعراء كثروا الكتاب والصحفيين والمحللين لكن قل العمل اتشوف كثرت الجرايد والفضائييات وقلت المعامل وكثرت البطاله وتغيرت لغة الانسان اعتصام بالمستشفيات علمود اشوية فلوس وخلي يموت الناس المهم الزيادة حصلوهه وجانوا فعلا مغدوريين لكن الغلط بالصيغة اللي تجاهلت انسانية هذا المريض واضراب عند الشرطة والحراس وعيفوا الليل مفتوح للحرامية علمود زيادة في الرواتب وعيفوا الارهاب يستفحل وخلننشغل بمناصبنه ورواتبنه ـ صحيح آني امرأة يشوفهه الزمن ضعيفة لكن ابقه بعمق هذي المآساة... اول مرة بحياتي اسمع من يفتخر باختطاف امرأة والله عيب وابقه آني أم واخت وزوجه وحبيبه
وكافي واله من العار واحنه بقرن الواحد والعشرين من يتوضه بدمنه ــ الحاضر يريد سعي جاد علمود يحله مستقبله خلي كل شخص ينظر الى ماضييه اذا جان حلو يحافظ على جماله واذا جان سيء خلي يغيره بدون قتل وعصابات وتهجير بدون شوشرة احزاب وفئات
المؤلف :ـ آنه
الممثلة :ـ كافي يمعود نريد واحد يكول احنه كثرت الاحزاب وقلت المواطنه كثرت الندوات وقل الوعي وكثرت الاحزاب والتكتلات ووزارات الامن وقل الامان
المؤلف ( يسحب المخرج خائفا من لوم الممثله) هاي تذكرني بحجايه حلوه يكلون فديوم زادت السرقه ببغداد وهاي القصه بزمن الاتراك كل يوم يصبحون واذا بيت بيتين مبيوكه وسوه الوالي اجتماع وجمع كبار اهل بغداد والناس
الوالي :ـ يا اهل بغداد آنه جمعتكم اليوم واريد ان نضع حل المشكلة البوكات والسرقات اللي زادن ببغداد
ممثل :ـ سيدي الوالي عليك ان تكثر الحراس
المؤلف :ـ وكثر الحراس وماكوفايده
الممثل :ـ وعليك تزيد رواتبهم علمود ميشتغلون الصبح
المؤلف :ـ وزيد رواتبهم وماكو فائده
الممثل :ـ وعليك ان تخلي عله الحراس حراس
المؤلف :ـ وهم ماكو فايده .. وجمعهم فد يوم الوالي واذا فد مواطن صاح
المواطن :ـ سيدي الوالي آني عندي الحل
الوالي :ـ شنهوه ؟
المواطن :ـ سيدي الوالي انته لاحظت كلما تزيد الحراس يزداد البوك ـــ سيدي الوالي الحل الوحيد ان تشيل الحراس خلو بغداد وحدهه بلا شرطة وبلا حراس وشوف الدنيه اشلون تصير حلوه
المؤلف :ـ واصدر الوالي فرمان يلغي الحراسه الليلية ومن يومهه بعد محد شاف حرامي من اهل بغداد ولا سمعوا ببيت ينباك
المخرج :ـ هذا خوش حجي حلو مو احسن من آني وآني
المؤلف :ـ بس يبقه من حقي ان اكول آني والاني اعني بيهه كلمن جاع وما صفك للظلم ـ من حقه يكول آنه كلمن بجه من لوعة المقابر الجماعية والسجون ما من حقكم باسم أي شفافيه ان تصادرون مني ونتي وبجايه وقهري وذبولي مامن حق أي انسان مهما كان يفكر بديمقراطية ان يبعد عن دربة العيون الذبلت من البجي وان ينسه الروس الجماجم الجماعيه الي وهبتكم المناصب واعطت المسؤوليه على رؤوسكم آنه الشفت الظلم والجوع والجور وما بعت يوم ومدحت طاغيه آني وحرام ان نساوي بين القاتل والمقتول وهذي في كل الاحوال مودعوة للقتل والحرق والتهجير لكن هذا حق ولابد ان ما يننسي احنه كنه نتأمل وثبة ضمير من اللي كانوا السبب والحضن. لكن المآساة لما هذا الحضن يروح يحضن طواغيت بدال طاغية
ممثل:ـ ( في زاوية من زوايا المسرح مع الممثله) آني احبج اموت عليح
ممثل 2:ـ حرام بابا
المخرج:ـ كافي سوالف حب رفعوا الستاره.. مشهد البرامكة
( مشهد سجن )
الممثل 1:ـ يا ابتي ارى الزمان قد انقلب علينا ـ بعدما كنا في عز ومنعه وكانت الامثال تضرب في عز البرامكة واذا باخي فضل يقتل وانا وانت في السجن ما الذي جرى للزمان يا ابي
الاب:ـ هي دعوة مظلوم سرت بليل لم نكن نسمعها لكن كان الله سامعها
الجوقه :ت يصفقون
المخرج :ـ جميل مشهد مؤثر
المؤلف :ـ ( يضحك ) يمعود الاف المشاهد المؤثرة بهذا الزمان شو ما أثر ولا واحد من عدهن وصار عبرة ودرس للناس وجان بطل الانسان ان يفكر بنفسه وفلوسه وملكيته وعماراته والتفت اشويه الاهله وناسه والفقراءه والمشكله الف عبره ودرس بين ادينه توضح انه ماكو أي فرق بين الزنكيل والفقير
الممثل 1:ـ ( مع الممثله ) اني احبج
الممثل 2 :ـ يمعود حرام
الممثل 1:ـ لعن الله من حرم حلال الله
المؤلف :ـ دخلي نكمل شخبصوتنه بالحب
المؤلف:ـ روي ان الاسكندر المقدوني حين دخل مصر استقر فترة في المنصورة فسال الناس
الاسكندر :ـ جم ملك حكم المنصورة ؟
الممثل :ـ سيدي سبع ملوك
الاسكندر :ـ منو بقة من اولادهم ؟
الممثل :ـ سيدي ولا واحد عفوا سيدي بقه واحد مخبل
الاسكندر :ـ اكدر اشوفه ؟
الممثل :ـ ( يضحك بخوف ) سيدي وين تكدر تشوفه ، كتلك مخبل ، هذا دائما تلكاه بالمقبره يفلش بقبور الاموات ويلعب بالاعظام جعب ؟
الاسكندر :ـ شيسوي
الممثل :ـ يلعب بالاعظام سيدي
الاسكندر :ـ لازم اشوفه
الملف :ـ وراح الاسكندر للمقبرة وشافوا المجنون قالب الدنيه وداير مدايره الاعظام يباوع بيهن ويشمرهن على كتر
الاسكندر :ـ هاي دشسوي ؟
المجنون:ـ ( ينظر لحظات الى الاسكند يقلب عينيه فيه ) أى هيج ماكو شي
الاسكندر:ـ ( يغير لهجة الكلام) هاي دشسوي ؟
المجنون :ـ بهاي المقبرة اكو سبع ملوك مدفونين
الاسكندر :ـ أي
المجنون :ـ والباقي ناس فقره .. فانه ردت اشوف اكو فرق بين عظم الملك والحمال والعربنجي الفقير
الاسكندر :ـ وشفت ؟
المجنون :ـ ( يؤمي بيديه عبارة اللا ) لا ماكو ابد ماكو فرق فعرفت الملوك والسلاطين مخابيل
الاسكندر :ـ ( برهة صمت ) تجي وياي واسويك ملك ؟
المجنون:ـ ( يستغرب الامر ـ يبتسم)بشرط
الاسكندر :ـ ( يندهش ) وتتتشرط ؟
المجنون :ـ نعم
الاسكندر:ـ صار شنو شرطك ؟
المجنون:ـ اريد عرش انه اصير ملك بي ان يمنحني السعادة والفرحه دوم يعني ولا يوم كون يمر عليه وانه حزين وهاي طبعا بمسؤوليتك لازم انت تضمنهه اليه
الاسكندر :ـ وبعد ؟
المجنون :ـ واريد عرش أنه اصير بي ملك ان يمنحني الغنى الدائم دائما اصير انه زنكيل ولا لحظة تمر وانه فقير وهاي طبعا بمسؤوليتك لازم تكفلهه
الاسكندر :ـ وبعد ؟
المجنون :ـ واريد عرش انه اصير بي ملك ان يبقى الي دائما موباجر عكبه يجي ملك الموت وياخذ روحي وينتهي كلشي وهاي طبعا تبقه بمسؤوليتك
الاسكندر:ـ هي هاي اني اكدر اوفرهه الروحي علمود اوفرهه الك
المجنون:ـ لعد انته اكبر مخبل شفته بحياتي
الاسكندر :ـ واني هم اكلك انته المخبل اكبر عاقل شفته بحياتي
الممثل :ـ مع الممثلة :ـ انه احبج
المؤلف :ـ لك والله خبصتنه
الممثله :ـ آني هم أحبه لو مو من حقي كانسانه ان احب واعشق لو هذا حرام علينه وحلال عليكم
المخرج :ـ هذا الحجي صار بي احراج انهيه
المؤلف :ـ اسمع اني وياك اعتيادي بعد المسرحيه لامين جويلاتنه .. وهذا المشهد بي دسومه مهم جدا مهم وهذا تساؤل سمعته من زمان من احدى الطالبات وجانت تطرحه بالشارع
المخرج :ـ وجاوبته ؟
المؤلف :ـ لا
المخرج :ـ وشسويت لعد؟
المؤلف :ـ قررت ان اجاوبهه هسه
المخرج :ـ اخاف القضية صعبه ؟
المؤلف :ـ عزيزتي الحجي اللي تكوليه هو حقج لكن مو بهذا الشكل اللي تصوريه الحب اله حرمه وبيوت مو اله شوارع ودرابين ما بيهه احد . والحب اليجي من الباب هو الصدق والحب اليجي من الشباك هذا لعب جهال وصعب الحب الصدك هو الحب اليرفع راس اهلج واخوتج والحب الصدك هو الحلم الدايم للمرة والحب الصدك هو الحب اللي ينعلن امام الله والناس بلا مستحة وهذا هو الحب الصادق والجميل وهو حلال الله
المخرج :ـ يلله بدل بسرعة طلعنه فد مشهد
المؤلف :ـ اعزائي المشاهدين وروح أمي آني ادري الملل أخذكم ولكن شسوي والفرح اهواي والعاقل يفهم ومنين ما ملتي غرفتي
الممثل :ـ المشهد جاهز
المؤلف :ـ انطلق
الممذيع:ـ وضع اليوم السيد (ميم) مسؤول ال..ال من الحكومة الحجر الاساسي لسبعة مليون وسبعة الاف وسبعة مائة وسبعة وسبعين مجمعا سكنيا ( تصفيق)
الممثل1:ـ هاي المن ؟
الممثل 2:ـ هاي الاخوانكم المهاجرين والمهجريين
الممثل 1:ـ على راسي
المذيع:ـ وضع اليوم السيد (جيم) مسؤول ال .. ال في الحكومة ( مشهد وضع حجر الاساس ) الحجر الاساس لبناء ثمانيه مليون و ثماني الاف وثمان مائة وثمانية وثمانين مجمعا سكنيا ( تصفيق )
الممثل 1:ـ وهاي المن؟
الممثل 2:ـ وهاي الى اخوانكم المهاجرين والمهجرين
الممثل1:ـ على راسي
المذيع:ـ وضع السيد نون مسؤول ال .. ال من الحكومة ( مشهد آخر لوضع الحجر الاساس )الحجر الاساس لبناء تسعة ملايين وتسعة الاف وتسع مائة وتسع وتسعين حجرا اساسيا لتسعة ملايين وتسعة الاف وتسع مائة وتسع و تسعين مجمعا سكنيا ( تصفيق )
الممثل1:ـ وهاي المن؟
الممثل 2:ـ هاي لاخوانكم المهاجرين والمهجرين
الممثل 1:ـ على راسي
الممثل 3:ـ هاي شبيكم هو شقابضين الله وكيلكم لي هسه بس حجر اساس وماكو كلشي
ممثل 1:ـ نداء من مواطن عراقي .. حاول الطغاة تصنيف المواطنة الى درجات مواطنة أ مواطنة ب مواطنه ج ولحد الدرجة العاشرة
ولذلك نحن ندعوا الحكومة وجميع الاحزاب والمؤسسات وال.. ال عدم السماح لأي جهة تريد تقسيم المواطنة الى درجات من جديد.. مواطنة أ مواطنة ب مواطنة ج ،،
كلما تكبر احلامنه تنهض محنتنه ـ وآنه مهاجر من المهاجرين هاجرت لمدة ثلاثين سنة داخل وطني ـ يومية مهزوم ـ يوميه متهجول من مكان المكان ولحد الآن كاعد بالايجاروالمؤجر يريد يطردني من البيت
ممثل :ـ الله يعوظك
المواطن :ـ بشنو؟
الممثل :ـ ببيت ايجار غير
المواطن :ـ هم بالايجار الله لايوفقك
( مجموعة من الممثلين يجلسون على الارض ـ ويلعبون) ديه بديه ناصر ديه ـ شد الكور علزنبور ـ جتي ابنية من البحر ـ جنهه شكر جنهه مكر ـ جنهه عيون التفتكر ـ يا ايدي دليني عله الخوخ والعنب والتين ) ( تصفيق )
المؤلف :ـ أكو فد حكمه
الممثلة :ـ يابه انت شخبصتنه ـ هي أكو فد حكمه بقت بالعالم متعلمناهه
ممثل :ـ عتيك للبيع
ممثلة :ـ شوف هذا شكد قديم
ممثل1:ـ ها اشلونك اشلونهه جانت الندوه
ممثل 2:ـ حلوه تخبل
الممثل 1:ـ ليش شطرحوا بيهه ؟
ممثل2:ـ حجي كلش حلو
ممثل 1:ـ أي يعني مثليش ؟
الممثل1:ـ والله ما أدري مو آني جنت نايم
المؤلف :ـ ومن أجل ان ندرك فوارق البين ـ بين علينه ان نعرف ان البقال حين يغش بالكيل
المخرج:ـ هسه شجلبت .. المسكين تورط وخيسله طماطتين
المؤلف :ـ أكيد انت تستغرب لمن تسمع واحد فجر مدرسة لو سوك لو جامع ؟
المخرج:ـ أي طبعا
المؤلف:ـ أي انسان عندما يخون الكيل يخون الامانه واليخون الامانه ممكن كلش يخون وطنه وناسه وامته ومن هاي السوالف اللي انته سميتهن اصغار ولدن اشياء جبيره لازم ننتبه الهن من هاي السوالف الصغيره مثل
ممثل:ـ (يطرق الباب ) ابوك موجود ؟
الاب :ـ( يؤميء لابنه ) قله مو اهنا
الممثل 3:ـ عمو ابويه موبالبيت
المؤلف :ـ تعلم ابنك الكذب .. وكلما يكبر يكبر وياه الجذب والفخر للابو
ممثل :ـ ماما شراح اكله للمعلم؟
الممثله :ـ أي مامه كله جنت مريض
المؤلف :ـ وكلما يكبر الطفل يكبر وياه حبه للجذب والخديعه والحيله والمكر وكل الفخر يعود لامه
المخرج :ـ اهلنه يكلون بين الصدك والجذب اربع اصابع ورغم ما حاولوا اهوايه ان يخلون المسافة ما بين الحقيقة وغيرهه مسافه مموهه
المؤلف :ـ جان اكو برنامج يعرض بالستينيات اسمه الشرطة في خدمة الشعب جانوا الحراميه يتعلمون منه اشلون يبوكون
الممثله:ـ البين بين الغوا الفرق بين الرشوه والهديه
المخرج :ـ شرطي مرور يوكف بباب كراج المخيم ـ شاف اجت زفة عرس من بعيد , واه واه ركص ورمي وطوط طوط خابصين العالم ونص الشبان مطلعه اجسامهه من السيارات ورمي ( طاق ـ طاق ) واشرألهم الشرطي .. واجازتك
.. وأخذ اجازة السايق مال سيارة الزفه.. والتموا الشباب داير مداير الشرطي وابو اسماعيل الله يخليك وابو اسماعيل الله يحفظك .. واحد عود صار شاطر وشاله حفنة فلوس وخلاهه بيد شرطي المرور ... وابو اسماعيل باوع عليهن شافهن يسوون .. وماقصر ابو اسماعيل شالهن وخلاهن بجيبه وغير لهجة صوته
الشرطي :ـ اكول هي الزفه منين ؟
ممثل :ـ ابو اسماعيل هاي الزفه من حي الحر
الشرطي:ـ اخاف زفة ..
الممثل :ـ أي ابو اسماعيل هاي زفة حجي عباس العطار
الشرطي :ـ فاضل ؟
الممثل :ـ ( بفرحه) طلع عرف
الشرطي :ـ عيب لازم اروح اهني
المخرج:ـ الله يساعدك فاضل .. على الخير ومبروك
العريس :ـ الله يخليك ابو اسماعيل الله يحفظك
الشرطي :ـ اكول فاضل ومر تك الاوليه على ذمتك ..طل.. قت؟
المخرج:ـ وبعد ما كال شي ابو اسماعيل والدنيه علكت
والناس هنوبه اجو يتعاركون
ممثل :ـ يمعود ابو اسماعيل مدكلي انت شسويت ؟
الشرطي :ـ شسويت :ـ هسه احلهه الكم بس بشرط بعد تمشون عدل سياره وره سياره ومتخربطون ومتخبصون الشارع
الممثلين :ـ والله ابو اسماعيل توبه بس حلهه النه
الشرطي :ـ ومدكون بالشارع هورن عالي طوط طوط خابصين الدنيه هاي اذا انتو بالولايه هيج لعد بالاحياء شراح شسوون
الممثلين:ـ توبه ابو اسماعيل متسمع بعد ولا هورن نمشي خرساوي حتى الهلاهل ممنوعه بعد
الشرطي :ـ ومتطلعون راسكم من السيا ره
الممثلين :ـ ابد والله وهذا عهد
الشرطي :ـ يالله امشوا خلي احلهه .. وينهه العروس ـ عمي سمعي والله انا لااعرف فاضل ولا ابو فاضل بس اكو عدكم اهوايه اخطاء بالزفه وردت اعاقبكم الكم العروس والعريس لن العريس اذا جان ماراضي جان ذوله ميخربطون ـ هسه هاج هاي الرشوه اللي انطونياهه تسوه بيه اريوك قوي وبس سكتي يمعود ضحكي عليج العباس
المخرج :ـ وضحكت العروس بس جذابين ما التزموا وبعدهم ما وصلوا السعديه واشتغل الطاق الطاق والطوط والطوط .. زين ..(ولا تكول استهتار هذا عرسنه )
المؤلف:ـ ردنه في هذا العمل البسيط انكلكم لازم تتوضح المسافة بين خفايا الانسان وعمله
المخرج:ـ ولابد ان نعرف حجم البين بين في كل تصرفاتنه والفارق بين هذا البين بين كل الامور اللي لابد ان نعرفهه ويعرفوهه الناس ما يصير نسمع بالقهوه شكل وبالبيت شكل بالتلفزيون والصحف شكل وبالشارع شكل ونرفع هذا البين الوضوح والعتمه وبين ان نكلكم شكرا وبين ان انكلكم مودعين اكوا باب راح يطلعنكم ويطلعنه
( انتهت المسرحيه )