المساعد الشخصي الرقمي

مشاهدة النسخة كاملة : خواطر فى المـاضى والحاضر

عبدالله عبدالرحمن
14-03-2009, 01:38 PM
نبع الفرح

خلقونى شان أفرح معاك

وانتَ الفرح خلقوهو ليك

حتى الحزن مسحة جمال

بِتخفى فى نور وجنتيك

خلقونى شان أحمل هواك

جوه القليب واتهنى بيك

وأغمس حروفك فى مِداد

قلبى البريدك واحتويك

انا شان بريدك بشتهيك

بتميل مشاعرى دوام اليك

ولاحتى فى لحظة فراق

تشتاق عيونى لغير عنيك

ما انت تستاهل غُناى

وأحلى القوافى بقولها فيك

انا ياملاك أسعد مُحِب

يهدينى ربى واصطفيك

حتى القمر منك بغير

خافت وباهت ومستجير

والروض بفتش للعبير

خليهو منك يستعير

ياأرقّ من مس الحرير

سواك الهك دون نظير

يالفيك براءة زول غرير

انا جد سعيد بهواك كتير
ليل حسن
14-03-2009, 01:42 PM
خيال أخي عيدالله
من الرائع ان نرى ابداعك يتجدد هنا
وان تكون لك زاويه نرتوي من نهرها
بإنتظار المزيد والجديد دائما
ازدهار الانصاري
14-03-2009, 01:47 PM
رائع اخي الكريم عيدالله عبدالرحمن

وبهي عطاؤك

زدنا من فضلك

مودتي

سلام
عبدالله عبدالرحمن
14-03-2009, 11:51 PM
مقدمة برنامج تلفزيوني

لو قلت أحاول أوصفك

وأحزم مشاعري واستهل

بدءاً أبادر وأسألك

عن بهجة فيكي بتستمر

قدام عيون كل البشوف

برنامجك الجد مُشتهر

هي الروعة أصلك وخِلقتِك ؟

والكاميرا مازايداك سحِر؟

أم للضيوف تتجملي

وفي البيت مزاجك مُعتكر؟

دي مُصيبة لو طبعك كِدا

حاشاك تكوني وما افتكر

*********************
ياسمحةمنك وليك سماح

لاديانة فيك لا توب وجل

يافرحة العاد من بعيد

من غربة جد ما بتتحمل

ياضحكة الجاهو الخريف

وراجيهو أيام ومنتظر

زرع التقاوي وكملو

ورصيدو من المال صفر

يافرحة الصايم وقام

وباكر عليهو العيد بِهل

ياضحكة الطفل الغرير

ويالهفة من أم لي طفل

يابسمة ريّانة وعبير

ويانسمة في صحراء وظل

مهما احاول اوصفك

ألقاهو بس وصف المُقِل
عبدالله عبدالرحمن
15-03-2009, 12:06 AM
مســـــــــاءالخير

مساء الخير علي الزينين

يا السمحين عُزاز بلحيل

صوتكم فيني بتسربل

يزين وجداني يشفي عليل

وِصالكم ديمة بفرحني

دوام مني الالم بيشيل

اماني الروح تلاقي ظلال

سراب احلامي يلقي مقيل

مساء الخير علي عينيك

وباقة ورد حِداك واكليل

******************
سلامتك والالم بمشي

وتمشي معاهو وحدة تزول

مساء الخير علي قليبك

نبض ساقي الاماني شتول

معاك قبل العمير يمسِي

وتمسِي وراهو وردة ذَبول

صباح الخير عليك إنتي

ويوم باكر صباح النور

بقدم ليك تحياتي

عميرك في حسابي يطول

بأخر بعض آهاتي

سُهادي صِبح نجِيمو أفول

وبرفل في نعيم حِنك

ولي منك وداد مكفول

ولما يجي العتاب منك

( ماسلمت ما معقول

******************
فقدت اليوم كِليماتك

ورنة صوتك المعسول

وهامت روحي في ذاتك

نبت ورد الاماني شُتول

حرمت الصوت وطلاتك

ولسه يادوب بدينا نقول))

********************
عفوا نفسي ما تأسي

بوضح لو ألاقي قبول

وكيف عاد يسعف المنطق

لو برح الغرام بي زول

وكيف يتمهل المفتون

يجاوب ردو يبقي مَهول

وكيف يتكذب الواقع

والقدر الكتب مشغول

بشوفكم من خلال عملي

وبحييكم تحية تقول

مساء الخير وهداة ليل

تناغم في الغد المامول
عبدالله عبدالرحمن
15-03-2009, 12:31 AM
قـلـبـك هفا..
... لي بوح عفيف
لامــس
شِـــغافو
و لاطـفـا

أسـعـدهـا
بالزين والعـديــل
شــاد الأمـانـي ووظـفــا

تستــاهـلِى
الزول الوفــى يرويك
بدل كـدرك صـفــا

يـطـوع معـاك المسـتـحيل

يســـقـيـك حـلـيـب الطـير وفا

***********

قــلـبك هــفــا .....

...شـــِن قلت ليك

شــايف طــــريف الحـــور غفا

عايشــت رعـــشــات الكلام

مالا المشـاعر المرهــفــــه...!!؟؟

تســتاهلــى

المــاقـالو زول

نثـــــراً

ولاشـــاعر قــفــا

ولا فــــى تعابــيـر الجـمـــال

داخـــل ضــــروب المعــــرفه
عبدالله عبدالباقي
16-03-2009, 11:19 AM
مبدعٌ
متألقٌ ومتمكن
كلما طالعت حروفك تبحرُ بي دمعة إلى حبي الأول و الأخير
وطني الممتد على امتداد قلبي في افق حبه
وطني الذي لا يشغلني عن تذكري لأرضه إلا ذكريات أهله الطيبين
وطن ينصب في قلبي أعمدة النور والطرقات والبسمات والبنايات و النيل
وطنٌ كلما ابتعدت عنه اقتربت منه
عبدالله عبدالرحمن
16-03-2009, 12:22 PM
الفاضلة ليل الحورية

توقيعك هُنا
بالنسبة لي هَنا
وغاية المُنى
دمتِ بخير
عبدالله عبدالرحمن
16-03-2009, 12:30 PM
فراشة الملتقى ازدهار الانصارى

سيدة الحرف والوجع اللذيذ
بكِ ازدانت نافذتى
وسمت للعلياء هِمتى
أسعدى بـتألقك ونشاطك
وأسعدينا بمرورك دوما

عبدالله عبدالرحمن
عبدالله عبدالرحمن
16-03-2009, 01:13 PM
أخى الكريم عبدالله عبد الباقى

نقِل فؤادك حيث شئت من الهوى

ما الحب الا للحبيب الاول

كم منزلٍ فى الأرض يألفه الفتى

وحنينه أبداً لأول منزل

نِعم الحب وطنك ( أحب مكان وطنى السودان )
نِعم الأهل أهلك( وا أسفاى لو ما جيت من زى ديل وأهل الحارة ما أهلى )
وبنوتاً تحاكى الخيل
شاربات عِز وموية النيل
نستفزك ونُبكيك بكتاباتِنا لِتُبدع وعندما تعود تعفر وجهك بتراب بلدك شكرا لله .... شكرا لادارة الملتقى التى اتاحت لنا التلاقى والتعارف

عبدالله عبدالرحمن عبدالله
عبدالله عبدالرحمن
16-03-2009, 11:15 PM
ياالمسيتى على ترنيمة

في زمن الفرح الـسـافر وعـدى

ياالبددتـي غيوم احزانـى

ياالطليتي فى وقت الشـدة

بشـارة خير من عـالم تانى

ملا وجدانـى وفيا امتدّ

وغنيت ليكى صباح واماسى

الزمن القاسي دريبو انسدّ

وعمري الضاع في تيه ايامو

لقى احلامو وفرهد جدّ

كيف لـى غيرك تانى تسـافر

الامـال يااعطر وردة

ووين من دونك ألقى سعادة

وكيف الروح تقوى وتشتدا

تاكدى لـو فى يـوم جافيتى

وطبع الدنيا رجع واحتدا

الهمـس الدافئ المنى سمعتى

تخيلى كيف يائس مرتدا

وورد الريـد الحاضـنو قليبـي

ذابل وزاوى إذا لابدّ

ياالرفيتى عليا فراشــة

وفرهد ليـك قليبـى الوردة

اسـعدى عيشي رحيق ايامـو

اسـتاذنتو اتفضلـى ردّ
عبدالله عبدالرحمن
16-03-2009, 11:18 PM
حقُو ناخد لينا وقفة
في التكافل والتراحم
في التآزر والتعاضُد
وكل شي يِقربنا زُلفي

حقُو ناخد لينا وقفة
في القوانين واللوايح
في التشرد والرِّعاية
ونِعتنِي بِي كُلِّ نُطفة

حقو ناخد ليناوقفة
للافق ننظر نخطٍط
ومانسيب حاضرنا تايه
وما يجينا الجاي صدفة
**************
تِسعة والوالد تَوفي
والرِّزق كان بيتو يِجفي
تسعة يوم ماضاقو إلفة
لا الطعام شبَّع وكفي
الوالدة واصلت المسيرة
صابرة مؤمنة ياحليلا
في ضرا الكرتون مقيلا
لا صديق بي لُُقمة يِلفي
ولا رفيق لي عطشة يَطفي

تسعة والوالد توفي
ووالدة بين كانون ومصفي
بس ياريت الشاي يصفي
والزباين تلقي وصفة
شاي مظبوط حالا يشفي

والقروش تُحسب كتيرة
وللعيال تنفكا حيرة
وللمؤجِر والمديرة
والقسط تدفع أميرة
والدكيكين يلقي خيرا
وتلغي صفحة وتبدا غيرا
والديون قاسية وعسيرة

الوالدة واصلت المسيرة
صابرة مؤمنة ياحليلا
للجمرة والكانون زميلة
الحاجة للاولاد كفيلة
ماهرة سِت شاي وقديرة
والسُلوك راقي وأصيلا
ما بتفكر في جريرة
وما بتهين شرف القبيلة

(وهل تذكرت القبيلة؟
تَحصِّن الأولاد تَعيلا)
لا صديق بي لقمة يَلفي
لا رفيق لي عَطشة يطفي

تسعة والوالد مُفارِق
والوالدة للاسواق تساسق
ولعنة الاسواق تلاحق
والرزق ممحوق وماحق
وللضرورات ماهو لاحق

واليتيمة قوامها شاهق
يومي للوالدة ابترافق
نظرة واغراءات تلاحق

ولسه بتقاوم أميرة
عام وعاشر ويوم وليلة
وللزباين ألف حيلة
ومرت السنوات تقيلة
والدة مشغولة وكسيرة
والقبيلة !
ما بتجيب خبر القبيلة !
ولينا مشروعات عليلة
وللزباين ألف حيلة
طرفة واغراآت تقيلة
والنفيس إنهدَّ حَيلا

خارت وانهارت أميرة
واختلت طايعة وهزيلة

وناس مكافحة الرزيلة
جاهزة تنقذ كل ضليلة
ليها معلومات غزيرة
وانتشار قوات كبيرة
وقبل ما تهلك أميرة
والجريمة تكون خطيرة
وأم تولول مستجيرة
قامو بي ضبط الجريرة
ورجعوا الانفس جميلة
إلا لسه الاُم كََسِيرة

دُنيا لما تشيل رفيقك
البآزرك والبِطيقك
الحزُن بزرع دريبك
والليالي تنوح تِشيبك

الصبر بِشفيك يطيبك
بيهو جلِد عنقريبك
وخلي عطر التقوي طيبك
]
عبدالله عبدالرحمن
16-03-2009, 11:40 PM
ســــــــــد مـــــــروى

خلِيني في كَنفـِك دوام
أنــا يا بلـــــــــد
مــن قلبي ليك منى احتـرام
ما لــيهو حَــد
أروينى مـن حُبـِك تمــام
وادينى من صبرك جَلـَـد
أرعينى زيدي الاهتمــام
خليهـو جَـــد
كــل الرسايـل المنى ليك
مـُـحتاجـه رد
يا أُم حنوُن بِتغني بيكى
بَلَحِنِك نِعـــم البلــــد
يا زينــة في كــل العصــور
ما إنتي لي في مَـــروِى سَد
شامـِـخ تحدِى وعُنفُوان
بي خير كثير شعبك وَعَــــد
الســــِّـر زَرَع وآدم حَصـَــــد
في كُـردُ َفان نَــوَّر حَمَـــد
ياربى تِمـُو وأحفَظُــو
وادِينـــا مِن فَيضَـك مَــدَد
نعــدِل ونبسِــط شِرعَتـَـك
يــا ربى يا فــرد يا صمد
دار فور تعـود نهضــة ومَسيــد
تبرا الجِــراح والخير وَرَد
أدروب تَعمُــو التنمِيـــة
ومُلوا ل صِبــِـح أَكبَر سَنـَـــد
يا مُلهِمَة يا رايعــة تاريـخ
الجُـدُود فيــكى اتوَلَـــد
جانــا الســـلام لي رِفعتِك
شِيبنا وشباب شعب إتحَـد
ليل حسن
16-03-2009, 11:49 PM
سآتي هنا دوما
فاعذر تطفلي وازعاجي
لكني لا استطيع مقاومة اغراء المكوث بين اجمل الكلمات
واروع الحروف وعذب المشاعر
استمر اكثر واكثر
عبدالله عبدالرحمن
18-03-2009, 01:23 PM
تفضلى بالمرور وقتما تشائين البيت بيتك او الدار دارك ويضيئنى مرورك وتواجدك ولو للحظة ايتها الفاضلة
لك منى الف تحية
عبدالله عبدالرحمن
18-03-2009, 01:24 PM
الدكتورة

ياقلبى مالك والهوى

العشتو فى ريدن كفا

سامرت أحلى الأمنيات

جناتو ليك كم شّوفا

ساهرت أشقاكا وبكيت

ماطل حياتك وسوفا

وسقاكا فى الآخر رِهاب

جفف رياضك ونشفا

*******
دكتورة بين إيديك عليل

يارب بايدكى الشِّفا

قلبى الفراشة يحيرك

زهرات ربيعك والفا

وما كل ولُوف

بلقى الولِيف

ولا كل عليل

طِبِك شفا

لكنى بهوى المُعجزات

وأنوار تقاكِى الكاشفه

*********
خصاك إلهك بالجمال

والرحمة فيك أجمل صِفة

قُربِك متيم من جديد

عارفِك عطوفة ومُنصِفه

ممدود على خيوط الأمل

والماضى مِنو البال صِفا

وراجيكى بدعو مع السََحر

بختم دُعاى بالمُصطفى

آمين يتم أملى ومُناى

فى جنة بالحُب وارفه
عبدالله عبدالرحمن
18-03-2009, 01:32 PM
بسم الله الرحمن الرحيم
الحمدلله والصلاة والسلام على رسول الله وعلى آله وصحبه أجمعين

كتبت بمناسبة قيام فرع جديد يعني يقضايا الطفولة والمراة بالسودان مؤخرا وسمي فرع حماية الاسرة والطفل




أُســرة آمنه ومسـتقرة*
اصطفت أحلـى الصفات *
وأســرة فى الشـر مستمرة*
ظاهره فيها الموبقات*
فـى سـفينه محيطا طامح*
خير وشــر متلازمات*

نحنا شـان للخيــر نبدر*
نكفـى شــر المهلكات *
والأمـل نــزرع نخضر*
شـوف حماية الأسرة جات*

دعــم معنوى للبريه*
بيها هـلــت بشـريات*
ودعـم نفـســى للضحيه*
يبعث الأمـــل الرُفات *
وفـى رحابا الجانــى بلقى*
وصفه تدمجو فى الحياة
*
وانت لو مهتم بطـفلك*
هانـى فى حضنك وحالم*
تـلقــى آخــر مابهمو*
طفلو جانح أو مســـالم *
طفل محتاج لــى رعايتك*
قرى عـلـم وانت غانـم*
************
وطـفلـة رائعة ونرجسـيه*
لو بتختن تبقـى ظـالـم *
ربـى خط الرحمه فينا*
وفى القلوب ضـوى المكارم*
والدمـــوع خليــها تنزل*
لونقص مكتـملة نــاقم *
اسـتاجرت بــى حنانـك*
باكية موجوعة وتناغــم *
والعيون مشــدودة فيكـى*
والخطــر لحظات وقادم *
وانتـى أمها وين امانك*
نفسـى أفهم ... انت فاهم؟*

ياحماية الاســرة جيتى*
أبنى للأســـر المعالـم*
أغرســـى القيم النبيله *
وضوى ليل مظـلم وباهم *
ذكرى الأنسان حضارتو*
وخلى ثغر أطفالنا باســم*
****************
ولـو حكالك طـفـل موقف*
والمواقف فيها مخــزى *
لـو تنامــى الشــك تعاظم*
إنو اسـتغلال وجنسى *
صــدقو وبادر وبلغ*
لـى حماية الأســرة امـشـى*
لا توبــخ أوتعاقب طفل *
محتاج دعم نفـســـــى*
التصــرف زيدو حكمه*
وتلـقــى فى صـبرك تأسى*
خلــى بالك من حمايتو*
بكرة راقب وبـرضو هســى*
فــى الامـانـى الحلـو زيدو
بالأمــل صّبح ومسىِ
**************
انت طفلك لســه يافــع
دابو قايم عودو اخضــر
لو بقيت أعنف وقاســى
يبقى عنفك فـكرو أخــر
والعواطف فيهو جفت
والســـلوك عـدوانى أكـتـر
والتبول لا إرادى والــكـلام
ممجـوج وأشــــتر
والقلق والـخـوف يلازمو
والحــزن لمزاجو عكــر
لاهـو يوم ارتاح فى نومو
ولاحصل لـى نفســو قدر
ديمه منقـاد غيرو وتابع
ماحصل بــى فكـرة بــدر
منسـحب فى نفـسو مطـوى
والخجل لمشـاعرو يقهر
****************

خلـى طفلك ينمو أفضل
هانــى مرتاح ليهو قـيمة
أوعـى تقــسى وتبقى قاهر
الســلوك الفظ ظليمه
جنبو النـقـد المدمـــر
والأهانة المســتديـمة
لو يشـاركك فكره أفضـل
أحذر الرفض والشـتيمة
ولـو مدحت جهودو بصعد
ومابخاف شـبح الهزيمة
خلى فى حسك حواسوا
ومشى نفسك مســــتقيمة
ازدهار الانصاري
18-03-2009, 01:40 PM
تدري

كلامك عذب

ولو اختلفت اللهجة

بيه رقة وحنان

وشوق

واحلام متوهجة

جميل حرفك هنا

اسمحلي اتوجه

بين مرة ومرة

اشوف الحرف فيه منجا

لكل محب حاوره زمانه

وخلاه تعبان

الاخ الكريم عيدالله عبدالرحمن

صفحات متوهجة

دافئة ورقيقة

جميل ما تسطر هنا

مودتي

سلام
عبدالله عبدالرحمن
22-03-2009, 03:39 PM
تدري

كلامك عذب

ولو اختلفت اللهجة

بيه رقة وحنان

وشوق

واحلام متوهجة

جميل حرفك هنا

اسمحلي اتوجه

بين مرة ومرة

اشوف الحرف فيه منجا

لكل محب حاوره زمانه

وخلاه تعبان

الاخ الكريم عيدالله عبدالرحمن

صفحات متوهجة

دافئة ورقيقة

جميل ما تسطر هنا

مودتي

سلام

ازازدهار

شكرا لمرورك هنا

تواجدك على صفحاتى أستمد منه الدفئ والحنان والرقة والتوهج لك ولمثلك أكتب يا نصفنا الآخر ويا ُكلَنا !
عبدالله عبدالرحمن
22-03-2009, 04:17 PM
أُمى

يمة جد مشتاق ازورك

وفى دريب وادينا أمــشى

وألقى خطوات الطفولة

كبرت والأيام بتمــشى

أحظى بالنبق والتبلدى

أشوف هشابنا وبعض غـرسي

وغنيماتى الرعيتن ..

بلقى فيهن باقى هِـسي ..!!!

ولا فاتن يمه رحلن
زى سواد شعرِى الفى أمــسى
:-
يمه ما مشتاق أشوفك

وانتى صليتي الرغيبة

واقفه بين ايدين الِهك

فى خشوعك للـفريضه

مستقيم دربك لربك

ربي حِيد الشر دريبا

انتى دعواتك حبيبه

للهموم تمسح تنسى

وانتى ما روحك شـفيفه

بى حواسـك سامعة همسي

أسال الله يطول عميرك

في رحابك بلقى نفسي
عبدالله عبدالرحمن
29-03-2009, 02:10 PM
بسم الله الرحمن الرحيم


غزة وعازة


عازة حبيناك عزيزة
وكنا في حبك رجال
عازة جرتقناك عروسة
وكنا فوق راسك هلال
مهرك الارواح رخيصة
وليكي يرخص كل غال
ولسه ليك ارواحنا ترخص
مرة ما صابنا الكلال
والوصيةالما نسينا
غزة ليك اقرب مثال

في اللهيب ياغزة انتي
وبرضو ترزحي في الحصار
بيني بينك الف مانع
وانتي جواي افتخار
انتي اقرب مني ليا
ونفسي لي نفسك جوار
انتي اقرب مني ليا
وانتي جواي انتصار

انتي جواي طفلة تصرخ
والحليب منعوا الحصار
انتي ام ولهانة ثكلي
والجروح نازفات غٌزار
انتي جواي صرخة يائسة
وكهلة هداها الدمار
وبرضي شايلك طفل ودمعة
وامة تاهت في الضلال
ويوم عشم لي بكرة جاي
هل بدوم فينا الهُزال؟

الجثث اشلاء بتنزف
والضماير ميتة عازة
المسيرات هادرة تزحف
والغضب اعصابنا هز
طفل ميت وام بتصرخ
وآهه من والد في غزة
الحصار مضروب عليها
والحدود قافلاها رزة
والصواريخ ليها تمطر
ربي يحمي سماكي غزة
وغضبة الحكام بيانات
والمواقف باهتة عازة
وين خمارك نفسى ارقص
الرقيص يمكن ألذ؟؟!!
عبدالله عبدالرحمن
02-04-2009, 11:03 AM
أنا
شمعة فى ليل الغلابة
ورشَّة الغيم والسحابة
وبسمة فى دنيا الكآبة
ونقطة فى حروف الكتابة
وضحكة في الفرحة ودعابة
ووردة فى عالم رتابة

نصرة للملهوف إجابة
كل طموحاتك حبابة
مني تلقى الاستجابة

عايز أبقي

ضُل وخضرة تقيك هجيرك
فُل ونسمة ترش عبيرك
في كل خطوة معاك نصيرك
ابقى في القاسيات مُجيرك
والدليل لِسموك وخيرك

عايز ألقي

غفوة في كنفك وراحة
ومن صحاري الماضي واحة
ومن أسي العمر استراحة
روحي تنسي أسي جراحا
وتلقي فيك ريدة وسماحة
عبدالله عبدالرحمن
03-04-2009, 06:46 PM
بكاني الحنين

لو قالوا
عذبني الغرام
جرعني
كاسات الضني
او قالوا
بكاني الحنين
والثانية
في بعدك سنة
او قالوا
بددتي الظلام
وحياتي
شعت بالسنا
كل البقولو
تمام وصاح
والله
جد ردتك انا

فيني الخيال
مرات بفوت
بسرح
في روضات المني
واتخيلك
مخلوقة لي
وبرضي ليك
مخلوق انا
وبكون في
قمة نشوتي
ارشف
كويسات الهنا
كل اللقالو
في حبي صاح
هايم
ومستنيك انا
وخايف الزمن
يقسى ويجور
يحرمني
من السوسنة
وكل الاماني
العشتها
تصبح
محال غير ممكنة
عبدالله عبدالرحمن
03-04-2009, 11:21 PM
للفرقة لا والانفصال

بهواكا ياوطنى العزيز
بهواك معزة ومقدرا
بهواك شمال وجنوب سوى
فيك المكارم مفخرا
ليه التشتت والفِصال
أفكاركئيبة نأصلا
والوحدة ليها الكل سعى
كل المشاها بحصلا
رغبة وقناعة والتزام
نبدأ المسيرة نواصلا
************
للفرقة لا والانفصال
بالوحدة مرحبتين هلا
انا أمى من أرض الجنوب
من منقلا
وابويا من أقصى الشمال
من دنقلا
سودانى جدي و جدتى
ليه الهوية احولا ؟؟!!
جنسية تانى جواز جديد
تأشيرة لابد اعملا ؟؟!!
***********
لما المشاعر تتولد
والبشريات نستقبلا
نسقيها من فيض الحنين
نشتل مداها نجمِلا
ولما المصالح تتحد
نحفظ نصون ونعمِرا
ولما الثقافات تمتزج
الروعة أجيال تغمُـرا
سودان فريد قوة وأمان
والوحدة تاج ومنورا
نلغى الفواصل والحدود
رغبة جدودنا نقدرا
مليار وعشرة على الوطن
كم حُبو( باع فينا وشرا)
سودانى نيلى هويتي
دعواتكم فِصالكم بهملا
فى الازرق العاتى العنيد
ببنى السدود واكتِّرا
والأبيض الهادى الوديع
بحرث جروفو واخضرا
وأصلح ضفاف بحر الجبل
وأبنى المشاريع واشتلا
وابسط سهول بحر العرب
للمرعى أحلاّ مشاكلا
بترولنا فاض كفانا زاد
كل الزيادة نصدرا
وبلدنا قوة وتنمية
وحدتنا أصلها مصدرا
وعشمنا نتسالم نعيش
طاقتنا كامنة نفجرا
عبدالله عبدالرحمن
04-04-2009, 02:19 PM
البنفســــــــــــج


الحرير وكتين تدلي
ونام علي صدر البنفسج
والعيون الهادية طلت زي
قمر علي ربوة ( لجلج)
فيني صِعبت كم حكاية
وكل شي قدامي (عصلج)

نار غرامك تاني بقت
جوة قلبي الريد تأجج
قلبي كان توبتو منك]
وليا استغفل و(عرج)
لي دريبك تاني عاود
بي سلاح الخوف مدجج

قلبي مجروح يا أميرة
شوفي كيف ساقط مضرج
لا حظيت بي نظرة منك
لا عذابي المولي فرج
عبدالله عبدالرحمن
06-04-2009, 02:21 PM
رغم الجفا

طاشت كليمات الغرام
ولا انتو يالسمحين هجرتو
سجعت حمامات الهُيام
وبالدم وفاى ليكم سطرتو
لو كان دلال سامحتكم
لكن دا ما الدل العرفتو
لو كان زعل صالحتكم
داويت وخاطركم جبرتو
ولو كان خصام عاتبتكم
حنيتو فى الآخر رجعتو
شايفانى بستاهل شقاى
وحرقتى بستانى الزرعتو
*********************
دنياكى ضاقت بى هواى
ولا زاد حنانى الليك وهبتو
تستاهلى رغم الجفا
كل الكلام الفيك كتبتو
******************
ولو تلقى زول يتغنى بيــك
يعزف غناي الفيــك عزفتـــو
ما كان ندمت على جفاك
والالــــــــم جوايا شلتــــو
مـــــــا كـــــان بكيت دمع
العــــذاب ما كان ذرفتــــــو
*** *** ***
لـــــو تلقى زول صــــــادق
امين يهواك في صمتـــــــو
ويغمرك بي فيض مشـــــــاعر
لي مقامك تسوى قيمتو
ما كـــــــان سهرت الليــــــــل
حزين والهم حملتـــــــو
ولا الوسط الفيهو عائش بي
مشاكل الريد شغلتــــــــو
*** *** ***
لو تلقى زولاً زي مخلص
البيني بينك كان كتمتو
ما القسمة اختارت فراقنا
ومافي زول فايت قسيمتو
لكن بخاف يا طيبة يخدعك
الزمن يديك محينتــــو
وتبقى أيـــــامك شقــــاوة
والنعيم كان عايشة تحتــــو
*** *** ***
ما كان هذيت يا سمحة يوم
لو تلقى زول يديكي قلبو
يديــــــــك حنان يديك
امـــــــــان صادق في حبـــــــــو
ويسعى لي خيرك وعزك
والصعاب تتحــــــاشــــــى دربو
وتبقى ليهو ويبقى لــــــــيك
وتبقى دنياك جنـــــة قـــــــربو
عبدالله عبدالرحمن
28-05-2009, 01:56 AM
أنــا مــالى والـهـم والشـــــجـــن
مـحـبـوبــى وردانـــــى ورزيـــن
فــارش دريبــــــى شذى وعبــيـــر
ســـــــــاقينى من قلبــو الحنـــين
لطّف قســــــــاوة المـفــــــردات
مســــــح الأســـى وجُور الســــنين
بشــــبه مــلاك فــى عِـفــــتـــو
ونــــور القــمــــر من نورو.... وين !!
******
لـوقلــت لـــى أخلــص حـــــبيـب
صــدقنى بـــس زولــــــى الأمــين
واجـمــــل عيـون قـالـت كــــــلام
دى عيــون حبيبــى الباهــــــى زيـن
غيــرك مـنــو بيـعــــرف يحــــب
والــــريــده فيهو بتـســتـكــيـــن
********
أنـا مــالـــى والهـــم والــعـــذاب
عــالـــى المقــام فـــى الــفرقــدين
ياالفـــى دواخلــى شــــعور نبـيـــل
فــى كــل لحـظـة وكــل حـيــــــن
مــاأحـلــــى دنيـــا تضــمـنــــا
نـهـــــديـهـا أجمـــل وردتــــيـن
وكـــم رائعــة عـشـــــه تلــــمنـا
وصـــغــارنــــا فيـهــا مغـــرديـن
عبدالله عبدالرحمن
06-06-2009, 04:17 AM
السفيرة

لمـــا تزوري يا روعة
بحس بى عمرى كلو فـرح
يدندن حاضرى يشدو سعيد
ولى دمعات شـقاى يمسح
أغنــى الفات نغم تمـتم
طفـولة قضيتها حب ومرح
وترقص فى حياتى ســنين
تشــع فى عمري لو يسـمح
*******************
وقبـال ما النسـيم يغشـى
وقبال قلبـــى يتفتح
جلسـت فى حضرة آلامي
أفســر فى الهوى وأشـرح
ويـامـا حكـيت ومثلـت
بـدون جمهـور ودون مسـرح
***************
كتمت الحب غلبنــى وزاد
صحِـى الكتمان حلو وأسـمح؟
ولاّ الشكــوى للعاشـــق بكون
فيـــها الأمــان وأريح
بدور أســـمع كــلام حلوين
ورأيهم فــى الهوى أرجـح
وانتـى ســفيرة السـمحـات
ومن كل واحـدة فيــك ملمح
شــايف فيـك جمـال الكـل
وفيكـى قلـوب تهيـم تسـرح
فهل دومــاً تزورينــي
ويبقـى عذابـى بيك روّح ؟
عبدالله عبدالرحمن
19-06-2009, 12:34 PM
راجياك تعود

راجياك تعود من يوم
عمل كلـى انتظـار
جملت بيتى وكل شئ
نظفت حميت الصغار
زانت دواخلــى مع
الوجية بيـك انبـهار
طبقك شـهى فـى
الحـلة كبيت البــهار

***** ****** ***
رتبت صــالون الرجــال
أتعبنــى جد
المرتبة عقــاب الســجار
ســـولا قد
المروحة الـمـا بتنطفــى
الحيـــل برد
حتـــى الملاية مكرفســـه
دايرالا شـد
***********
راجيــاك تعود دا البيت
معبـــق بالعطـور
ادخل تعــــال يمناك
ويســراك الزهـور
غرفة ملابســك طيب
,مـسك , عنبر, بخور
***** *****
من شـوقــى واللهفـه
العلـى قايلاكا جيت
مديت أيدى سـلام عليك
معسول كلامك اشتهيت
قلت وبديت ....
دى الجنة يــارب... ولابيت
فنانة يا أم العيال انا بيـك
فخــور للكل حكيت
ماليانى أحساس بالحياة
انتى الأمانى الاصطـفيت
بيتك مرتب وروعة فيك
هندامك الآســر هويت
**** *****
وكلامك الحانـى الحنين
فيض طبعك الهادى الحلو
أنا عشت عمرى معاك أمان
ياريت سـنينا يطولو
الدنيا بيك تحلــى وتروق
وأطفالنا بيتنا يجملـو
عبدالله عبدالرحمن
04-08-2009, 03:40 AM
اهدتنى وردة

إنتقيتى الــــورده كيــــف
وليـــه قلبيـــك أصطفاهـا

أتفتحت أسرت حـــــواسك
ولاشخصك إستبــــاهــــا

يامــا تاقــت وكــــم تمنت
لحظــة بيكى يتـــم لقاهــا

وتحظى بى لمسات أناملك
وأنتي عطرك مبتغاهــــا

ولما حــــان موعد لقاكــم
عبق الساحـــات شـذاهـــا

ورده أتلاشـــت فى ورده
روحهــا ذابت في نداهــا

ولما شفت الورده عنــدك
قلبي بالـــــغ وأشتهاهـــا

ما الورود رسل السعادة
للقلــوب تـــدى أنشراحـه

وكل قليب فتران ومضني
يلقى عندهـــا إستراحــــة

وردتــــك أمست معايــــا
وبت بيــن تغريــــد وآهة

للحروف أجمــــــع وأثنر
نفسي فـي نشـــوة مناهـــا

ولما نمتى هناك في خدرك

وردتك نومـــك غشاهــــا

ومنـــــك عرفـــت كيـــف
تعطربى حنان وكثرعطاها

أصلو قلبك ياجميلة فـــاح
وفاض بالحــــب رواهـــا
عبدالله عبدالرحمن
04-08-2009, 03:54 AM
الاخوة فى الادارة
السلام عليكم ورحمة الله وبركاته
قصيدة( نبع الفرح) تحتاج الى تعديل ارجو السماح لى بميزة التعديل لتعديلها
مع شكرى
عبدالله عبدالرحمن
04-08-2009, 03:59 AM
هل بتكتب؟

ايوه بكتب يا عزيزة
مرة للوالده البعيدة
وللصِحاب مرات برسل
كل يوم اشواق جديدة
وكل معارفى بخصهم
بالخطابات العديدة
وبرضى بكتب يا عزيزة
لكل طيبة سبانى ريدة
ولو بعيش ايام جديدة
لسه حا كتب للبريدة
ولو صارت الكلمات عنيدة
مامهم تطلع قصيدة
اى حاجة تكون شهيدة
انى ساهرت وكتبت
وفى هوى المريودة ذبت
وذكرى للتاريخ عملت
وعلى جدار الليل نقشت
أسمها واسمى ورسمت

هل بتكتب ؟
أيوه بكتب وانتى برضك
لوفى يوم جاتك رسالة
طويلة من انسان بحبك
شمعة ساهر يحكى ليكى
كيف حياتو ملاها شخصك
الامل عاد بيكى اخضر
والعمر ازدان وازهر
وكل شى فى حياتو نور
مش حتكتبى ياعزيزة
لا .......... بربك
الحبيب مستنى ردك
ايوه اكتبى انتى برضك
لى قريب او زول بحبك
فى البعاد اضناه حبك
راجى تصلو رسالة منك
فيها اى صغيرة عنك
ارتعاشاتك وظنك
اكتبى واعزفى لحنك
أملى كاسو وبرضو دنك
وغنى يا محبوبتو اصدحى
......... ورى فنك
مش حبيبك مش بريدك
اكتبى واختصرى اسمك
بكرة توصلو الرسالة
وفيها كم يتجلى رسمك
عبدالله عبدالرحمن
04-08-2009, 04:06 AM
نبع الفرح

تمّ المنى وفرحان معاك

وانتَ الفرح خلقوهو ليك

حتى الحزن مسحة جمال

بِتخفى فى نور وجنتيك

عايش عشان أحمل هواك

جوه القليب واتهنى بيك

وأغمس حروفَك فى مِداد

قلبى البريدك واحتويك

انا شان بريدك بشتهيك

بتميل مشاعرى دوام اليك

ولاحتى فى لحظت فراق

تشتاق عيونى لغير عنيك

ما انتَ تستاهل غناى

وأحلى القوافى بقولها فيك

انا ياحبيب أسعد مُحب

يهدينى ربى واصطفيك

حتى القمر منك بغير

خافت وباهت ومستجير

والروض بفتش للعبير

خليهو منك يستعير

ياأرقّ من مس الحرير

سواك الهك دون نظير

يالفيك براءة زول غرير

انا جد سعيد بهواك كتير
عبدالله عبدالرحمن
04-08-2009, 04:28 AM
نداء القلب الولهان

لو ذكروا الحب اناديكي
نـداء القلب الولهــان
فأنت الحب في عالمنا
وسواك العالم أحـزان
لا بسمة طفـل تضحكنا
لا ثمة فرح وأمـــان
*** *** ***
لو ذكروا البحر اناجيكي
يا طوق نجاة الغرقـان
لو ذكروا الجنة القاكي
روح الجنات وريحـان
يا بلبل شادي على فنن
وشواش الورق وطربان
يا هدية دهري يا عجبي
الدهر حباني الاحسان
*** *** ***
لو ذكروا الخمر اناديكي
قد بت بحبك سكـران
والانس الهامس يسكرني
يا وتر الحب الرنــان
شراني هواكي وعذبني
أسكرني خمر السلطـان
*** *** **
إلام الحب يعذبني
يا ذات اللحظ الفتـران
اشتاق ليوم ألقـاك
في ظـل الأمل المـزدان
والقلب بحبك مضطرب
مزداد خطو الخفقــان
وعطر الهمسة منســاب
يا ذات الخد الــوردان
ورحمـة ربـي واسعة
يـا ربي انت الرحمـن
رباه اتوق لتجمعنــــا
هـــلا جمعت الحبــان
في بيت حـــــلال يا ربي
هــلا ارشدت الحيران
عبدالله عبدالرحمن
14-08-2009, 11:27 PM
دموع الصبر

بعد مارق الخاطر وجيتك

راسـم ريدك أجمل لوحـة

وأيام عمـري المرت حسرة

فرحتيها ببسمة في لمحة

تجلت زانت سـطعت بانت

ومـنك اخـذت نفحــة

ليـه عاودت عنادك تانى

وليه حارمانى الكلمة السمحة!!

وليه احلامى معاك مجهولة؟!

والمعلومة صدودك يمحى


ليـه ضيعتي الحب العشـنا

سـنينو جميلة وسمحه؟!

وليـه بكيـتى الناس الكانو

معانا قلوب منــشرحه؟!

وليـه توهـت الأمـل

الكان جوانـا يغنى الفـرحه؟!

حـليـلا دمـوع الصبر

النايحات ثكلى وجــرحى
عبدالله عبدالرحمن
16-08-2009, 12:42 PM
أنا منكِ وأنتِ مني


أبعدي حزنك عني
وتعالي
نتساقي من حنين
ودعي ما فات
من همٍ
وآهاتٍ مضت
عبر السنين
أبعدي حزنك عني
وتعالي لنغني
لا تقولي مر
من عمري كثير
لا تقولي جئتِ
والقلب كسير
وافتقدتِ من شبابكِ
كل ماكان مثير
أبعدي حزنك عني
واملأي بالنغم
الباذخ دني
انتِ فيكي
لاتشيخ الامنيات
يشتهيكِ الهمس
والقول العفيف
يشتهيكِ الاُنس
والحرف اللطيف
انتِ فيكي
تلتقيني الذكريات
عذبة ريانة
ما فات آت
أبعدي حزنك عني
وتعالي نستقي
فيض الحنين
فأنا منذ احتويتك
في فؤادي
جزلا ظلَ أمين
غافرا ما كان
من ظلم
تجرعه لحين
غافلا قدرا
غشاكي صِرتِ
غيريا تعشقين
أبعدي حزنك عني
وتعالي لنغني
أنامنك وأنتِ مني
(لفائدتي أقبل التصويب في رسائل خاصة)


(http://www.dubaieyes.net/up/uplong/D3864460562899-1197623603.gif)
عبدالله عبدالرحمن
18-08-2009, 11:51 PM
كل لحظة مع عيالك
عمرك المحدود بزيد
لحظة مابتخطر ببالك
وتلقي نفسك مُستفِيد
بي محبة جِدُو ليكا
وابتسامات الوََلِيد
وحنان هاجر بعطر
كل جوانب بيتنا ريد
من شقاوة بكري تزهج
ويعتذر تلقاك سعيد
البشير يديك تفاؤل
وتعشق الفاروق شديد
انتَ راحل وديلا بعدك
إمتداد نفسك أكيد
بكرة في لحدك مصيرك
منَهم حيجيك بَريد
علمهم ديل بنفعوك
ربِّ كِد واتعب شديد
أزرع القيم النبيلة
وعلِم الدِين الفريد
شذِّب الوجدان ونمِّي
مخافة الرب المَجيد
والرسول صلوات وزيدو
رتِّل القرآن وزيد
http://www.alnahoodregion.net/forums/images/styles/smartblue/misc/progress.gif
عبدالله عبدالرحمن
03-09-2009, 05:10 PM
توبة وندم ورجاء

مثلي تذوق وبال ذنبك نادماً
ويظل يحدوك الرجاء
ها قد أتى مايحتويك شفاعةً
يرويك فيضا من هناء
صم واحتسب رمضان
شهر الله يعتق مايـــشــاء
رباه انى قد أثمت تغافلاً
وندمت يغلبنى البكاء
رباه انى قد عصيتك غفلة
فاغفر لعبدك ماتشاء
متعمداً ربى هلكت فاستجب
هل فيك ينقطع الرجاء !!
لامنكراً جبروتك اللهم
كم ذلت نواصى الكبرياء
ابداً ولامتحدياً سلطانك
اللهم لا فكرى خواء
لكنها الاهواء تعبث بى
وتوقفنى على باب الفناء
رباه انى جاثياً ادعوك
فى خوف ويصفعنى الحياء
اغفر لعبدك مامضى
والآتى اسألك النقاء
ومحمد صلى عليه وآله
يارب أسألك الشفاء
عبدالله عبدالرحمن
19-10-2009, 04:18 PM
أريج
يا حديقة جيتا راجع
كيف افوت نفسي وافارق
البلابل فيها تشدو
عمرى خضرغصنو وارق
القلوب منحتنى طيبة
والامانى ابت تفارق
المشاعر ليا غنت
والامل لاح ليا بارق
بسمة واشراقات جميلة
والحنان مفروش نمارق
ولو مشيت وانا ليها بهوى
ببقى فى احزانى غارق
وطيف اريج دايما معايا
الشجن والنوح يلاحق
والحنين بمنع خطايا
والحزن يغشانى ساحق

ياحديقة فيها بسعد
والعشم جوايا باسق
يشفى روحى عبيرشذاها
ولى اريج ورداتا عاشق
والدروب لوليها صِعبت
بى حِداها اظل اساسق
بى جمال نوارا احظى او
بى نورا اضوى غاسق
وبقا نورا وفاح زهورا
طيب ونفح الورد عابق...
عبدالله عبدالرحمن
19-10-2009, 04:22 PM
ياربى قدامى القمر!!
دا الكان بعيد طايع نزل
ولا ديل عوينات الجميل
نورن سطع ضوا وبهر
**************
غريبة يخدمنى القدر
يزرع على دربى الامل
ويهدهد الشجن الاليم
ويفوح فى قدامى الزهر
***************
لو دى الحروف النادتك
تسلم كليمات الغزل
ولو غشوة بس فى سكتك
يا بختى يو م السعد هل
ولو كنتى فى اطار مهنتك ..
على اى حال قلبى انشغل
ِ
عبدالله عبدالرحمن
19-10-2009, 04:28 PM
شرطى ولاية الخرطوم



انتَ يا شرطى الولاية
فيكَ معنى الانضباط
وفيك رضا مولاكَ غاية
كل ليلك فى رباط
عزة النفس الابية
وحب شعارك فى ارتباط
والمواطن هو القضية
يحيا آمن دا المناط
يزدهى السودان ويزهر
لازم الامن اشتراط
وترتقى الخرطوم وتعمِر
الجريمة بدون نشاط


يا مواطن انتَ قِيمة
ليها رسخنا المعانى
فى حماية الاسرة طفلك
يلقى عندها صدر حانى
ولو يمسك أمر طارئ
النجدة قدامك ثوانى
وباهتمام دورية تعمل
ليها يحذر كل جانى
وتلقى فى الاقسام رعاية
ورحمة تنسيك ماتُعانى
والفصايل جاهزة تردع
كل متآمر وجانى
والمرور منساب منظم
خدمة ممتازة وتفانى
والدفاع لو الله قدر
بيهو بلطف ربى تانى
والسجون اصلاح وتوبة
للنزيل تهب الأمانى
ومنشآتك فى حماية
شرطى مسكون بالمعانى
ولو تروّح نفس كلت
أو تقول الهم غشانى
فى السياحة الشرطة راكزة
تبقى آهاتك أغانى
فوت لمحميات بلادك
روعة ما حتقول كفانى
أو حضارات فيها سادت
تلقى تاريخ احتوانى
وباهتمام امنية تعمل
ترمى كل شرا رمانى
وبالمباحث كل مجهول
يبقى معلوم دون توانى


يا مواطن انت قيمة
ليها رسخنا المعانى
لأجل مجتمع الفضيلة
النظام العام رعانى
وكل ناكر للرزيلة
مستريح آمن وهانى
عبدالله عبدالرحمن
21-10-2009, 01:30 AM
بسم الله الرحمن الرحيم
المزارع

يا مزارع انت ثروة
ليها نتعلم نطور
شان ضمان نهضة بلادنا
للشباب نبعث نسفر
نكتسب خبرات وننتج
نكتفى وللغير نصدر
نصنع آلات الزراعة
وعملة صعبة كمان نوفر
كل سياساتنا القديمة
التملى دوام تأخر
تحبط آمال المزارع
وديمة للانتاج تخثر
نستعيضا بأخرى أجود
تزحم الميناء وتعمر



http://64.22.101.244/~al7osh/vb/mwa2009/mwa03/misc/mwa/bak/mwa03-post.gif http://64.22.101.244/~al7osh/vb/mwa2009/mwa03/misc/progress.gif
عبدالله عبدالرحمن
21-10-2009, 01:34 AM
الحبوبة
يا حبوبة نغمة حنينة
كل اطفالنا يتناجوبا
حبيناكى كم جيناكى
تايهين والنفس معطوبة
قالدتينا فضلتينا لاطفتينا
بى روحا زكية طيوبة
زالت بيك همومنا البينا
ضحكت نفسنا المغلوبة
روحنا فداكى وبنحميكى
من لفحة شمس ورطوبة
والبرد البهب تالاكى
بنغطيكى عندنا توبا
و يوم عطلتنا جبنة معاكى
نشرب فى ضليل راكوبة
ونلاعب حفيد ماسكاه فرحان
بيكى اتعلم يقول حبوبة
حلاوة الدنيا وانتى معانا
ما هماناولو جات الامور مقلوبة

يا حبوبة نغمةحنونة
كل اطفالنا يتنادوبا
كم تشقيكى ما هماكى
تفرح بيكى طفلة لعوبة



http://64.22.101.244/~al7osh/vb/mwa2009/mwa03/misc/mwa/bak/mwa03-post.gif http://64.22.101.244/~al7osh/vb/mwa2009/mwa03/misc/progress.gif
عبدالله عبدالرحمن
21-10-2009, 02:11 AM
أهملتنى

اهملتنى... حتى
السؤال عنى اختفى
كأنى ما كنت الدوا
لا بلسم ايام الوفا
لاسلسبيل منو ارتويت
لا دوزنة ساعة صفا
خليتنى بين آهات وغم
واطلال رياض حب ناشفة
والوردة لو فاتا الربيع
هبت عليها العاصفة
والريدة لو فقدت حنان
نسقيها من وين عاطفة
اهملتنى وسبت الحروف
الجاتنى منك الاطفا
عساها تتلطف تقول
الكان خلاص كُدرة وصِِفا

اهملتنى .......
واصبحت ما بترسل عتاب
وكأنى ما كنت الحبيب
البيهو ليل الوحدة طاب
يا هدأة العمر اللِفات
وسكون ليالى الاغتراب
ولحظات سعادة فقدتها
يا حسرة ديل كانن قُراب
كل الامانى العشتها فى
غفلة بس صارت سراب
عبدالله عبدالرحمن
21-10-2009, 04:00 PM
عرفتك

لقيتك من زمن طول
خيال فى سوحو بتجول
لا فيك القديم ببلى
وجديدك ببدا من اول
دهشة بتلجم الدهشة
مشاعرى حنان بتتمول
ولفتك قبلما اعرفك
وعرفتك .. تانى بتحول ؟؟!!ِ
عبدالله عبدالرحمن
17-11-2009, 12:13 AM
بسم الله الرحمن الرحيم



الشرطى عنوان



انتَ عُنوان لى بلادك

وقِبْلة للجاييك يزوركْ

جَمِّلْ القول والتعامل

وابقى اجْمل فى حضوركْ

مظْْهَركْ عنوان حَضَارتك

ابقى ممتاز فى ظهوركْ

أبسط القانون وروحو

للبعاديك والبدورك

التعامل زِيدو حِِكْمة

وللسلام رفت طُيُورَكْ

واى اخلال بالسلامة

والامان أركبْ خُيُولكْ

للنفيس الشاردة رجع

تلقى ينجبرن كسورك

والورع خليهو زادك

بيهو يتزايد سرورك

واحترامك للمواطن

يرضى ربك يزيد حُبُورَكْ

وفى التكافل والتراحم

امشى ثابر زيد ثبورك

للخطأ أوعاكَ تألف

اجتهد رتب أمورك

ولو تعايش غلطة تفشل

ويبقى من كسبك قصورك

كلْ مواطن جاكَ مُحْبطْ

ضوى فى جواهو نورك

والمتاح من عُدة جَوِّد

للمهام وظِّفْ ..دا.. دورك

انتَ واجبك حق لآخر

واى تقصير فيهو جورك

همة تصطحب النوايا

وانتظر تحسين اجورك

والتحقق من مكاسب

قطرة من فيضان بحورك
عبدالله عبدالرحمن
09-02-2010, 01:47 AM
هُو.. عمرك كم؟!

.....................
صدمْتِك.... ....صاح؟!
حنين واللّه ما بقدر
أسيِّلْ دمعة الإفْصاح
ولا بكتم شعور بالريد
اصارحك بيهو... شان ارتاح
ولو أهديكى( لالوبى )
ونفسك تشتهى التفاح
بكون ياروحى دا العندى
وطالبك لو سمحتى... سماح

هو عمرك كم ؟!!
دا روّح راح
سواد الراس تركتو وراى
ألم فى جسمى ظل مُتاح
وآهات من قلب مُغرمْ
يغالب جرحك النتّاح
عذابات كم.......
تعانق طرفِك اللمّاح
ويرتد العشم يندم
وطالب لو سمحتى ..سماح

هو عمرك كم ؟!!
دا روّح راح
ولو اهديكى تجربتى
دى محرومة ربح وفلاح
وغير الريدة ما فيها
الا سطور اغانى فُصاح
ودريب للجنة مُتعثر
يقيلو هواكى يلقى نجاح!!!!
عبدالله عبدالرحمن
21-02-2010, 02:55 PM
عصافيرالأمانِى شَدُو


سلام لى احلى زول جواى
بنظم للقليب نبضو
كلام هامس بحسو براى
يجيك من قلبى من بعضو
صباح الخير على زولاً
ملك فى قلبى اغلى عضو

صَحَيتِى الغرام جُواى
عصافيرالأمانِى شَدُو
واتفيأت ظِل ريدك
دا ما بشبه ظلالو شَدْو
وحتى الحبو من قبلى
مشتاقين يحبو غدَُو

لاهم بالقديم قِنْعُو
ولا العايشِنُو هسى رضو
يحدِقُو صارُو فى الآفاق
وحالهُم كلو من بعضو

واستنيت عويناتِكْ
سؤال فى خاطرِى ماردُّو
لابرقت بريق الحب
ولا الحال انقلب ضدُّو

سنينك لسه يادابا
دى عِقْدين فيها دوب عدُّو
وانا الفوق اربعين عديت
طموح والله فات حدُّو
وحيرة ناس على المرفأ
شراعم لسه ما شدُّو
ًوتانين ضاقو شهد الحب
كَوَتْهُم برضو نار صدُّو
ذهول اجتاح ملامح ديل
مكافين الهوى ببعدو
عبدالله عبدالرحمن
21-02-2010, 03:02 PM
علـــــى مهلِك


على مَهلِك تمهلى
إنتِى بى مهلك
دا حبل المَهَلة ماقصر
ولازادوهو يوم بسِلِِك
ولا حتى انقطع مرة
ولا اتسجل حِكِر ومِلِكْ
ولا تشريع بِجِيزوهو
ولا بنستجدى فيهو مَلِكْ


على مهلِك.. تمهلِى
إنتِى بين أهلِكْ
وانا الجُواى هوى اتمدد
وإحساس التعاسة هِلِكْ
عميرى بحسو اتجدد
هواك مُشعرنى انى مَلِكْ


بخاف لو يسألوك فجأة
هل فى الدنيا خاب أملِك؟!
تأشِرى إنتِى بس بِصُباع
وكم ولهان يكون وَصَلِكْ
لاكى كبرتى عمرك ضاع
ولا ليل الأمانى حِلِكْ
معاك بغمرنا ديمة شعاع
وعاطفة رقيقة من وَصْلِكْ
ولو شدَّ الزمن لشراع
بنبحر نحنا فى أثرك
ونستبقيكِ فى الخاطر
فراشات الامانى ترِكْ
تذود عن كل حظ عاثر
زى حظا قريب وصلك
وارخى سُدُولُو مُتْنَاثِر
وعن مستقبلك شَغَلِكْ
وكنا معاكى بِنْذاكر
معا نمشيها كُل قِبلِكْ
وكنا الماضى والحاضر
وسِرِكْ جَهْر و لينا مِلِكْ
وشايفين حالك اتغير
وسامرنا الهموم بدَلِكْ


على مهلِك.. تمهلِى
إنتِى بين أهلِكْ
وانا الجُواى هوى اتمدد
وإحساس التعاسة هِلِكْ
عبدالله عبدالرحمن
21-02-2010, 03:05 PM
الى زوجتى الأولى
حظِك كِدا

مكتوب علـى اللوح المَجِيـد

أفرد حياتي واعــدِدا

واضْحِكْ عيون باكيات شديد

وامسح دِميعات سُهدَدا

والباكى عندى بشِيلو ريد

بَصبُر.. مشاعرو بهدهِدا

وازهر على المعنى البعيد

تملأ زِهيراتِى المدى

أرويها من نبع الإله

خاشعات سُجود مُتهجدا

واحفظ سماح نُبْل العهود

ومشاعرى مسموح اجددا
***** ***** *****
حـظـِــك كِدا............

أهواك وســـــيرتِك أمجِـدا

وأطــراكْ وصية زول بِموت

أُســـوة ومحبَّة ومَحْـَمــدَا

ســهــرِِكْ على عـُـش الصِغار

وتنظيم حياتــى المُجهدا

وتـرتِيب شـــؤون بيتِك نهار

خدمـــاتْ مُكابـِر يجحـدا

***** ***** *****
أمـونه يـــاأم الشباب

نفســــِــك أبية مُـــــهـذبا

تـغشــاك عــواتى الريح غِضــابْ

تلقاك شـموخ مُتجلدا

ويـعبر عليك ســـيل العذاب

يلقاك صبـــورة مُـوحِدا

إخضّــــر بيك عـُمــرى اليباب

وأضحت حياتــى مرتبا

**** ******* *****
قــــدر الـله مابِقبَل عِتــــاب

واقــدارناما بنحاسـبا

نخضع نعيـــش الإحتِـســــاب

وحرام نفوســـنا نعذبا

والقســــمــة ما بتجـيب خراب

والتبرِ حاشـــاهُ الصدأ

*** ***** *****
أمونه لــو ظـلـمِــك بشــر

ماكلو شَــرالـنــاس كدا

لو مـّـس إحســـــاسـك كـدر

باكر بِزُول زىمابـدا

ولــوحتَّ صيـــف صفق الزهـــر

برجع ربيع شـايل الندا

ياالفــــى ملامحك نور وقار


ريـدتك أصــــيلة مؤكـــدة
عبدالله عبدالرحمن
26-02-2010, 12:01 AM
بسأل عليك راحة ضمير
من صبحو قام صلى الضُحى
وبنادى ليك تجينى
من بستان زهورى المشتهى
وبمرق عليك رزاز مطر
وريحة دعاش جد مفرِحة
انا حِته فيك مهما يكون
ما بفوت مشاعرك ابارحا
عبدالله عبدالرحمن
08-03-2010, 12:20 AM
رســــــــالة

يا رسالة ضليتى الطريق
او بس كدا الحاصل شنو
انا فى انتظارك ما بطيق
غيرك يصلنى واوصلو
اسبوع تمام وانا فى جوى
انسج كلامى وافصلو
راجييك تجى وحالا برد
الفى قليبى بوصلو

سمحات خصالك يارزين
يا راقى يا ام طبعا حِلو
باين دلالك بس حنين
وكتين حروفك يوصلو
يا كاتم السر يا امين
كيف السنين واياك حِلو
لو تبقى لى ..دا المستحيل !!
هو المستحيل بنحصلـــــــو؟؟!!
عبدالله عبدالرحمن
08-08-2010, 09:32 AM
كتبتك
ولسه معايا همسة ريد
مرفرفة فى المدى الدانى
كتبتك فى الحنايا قصيد
ومابارحتِ وجدانى
عزفتك فى مشاعرى نشيد
وغنيتك نغم حانى
وناديتك وانتِ بعيد
وطيفك معتذر جانى
واستنيت ولهفى شديد
معاى آمالى راجيانى

عصيفير الهوى الغريد
كلما نمتَ صحانى
وكلما اعاود التنهيد
يعاودنى الامل تانى
عساها الفرحة بيا تمر
تفوت تتلاشى أحزانى
عبدالله عبدالرحمن
06-08-2011, 02:26 AM
عليك يسهِّل

من رياض حسنك مغادر
رغم انك زاهى مذهل
عشت فى وجدانى حاضر
كل يوم فى ايكى تهدل
كنت بى حسنك بفاخر
لما فى ساحاتى تقدل
**********
يا قليب بالريده ذاخر
لما تتواضع وتنزل
ما افتكرتك تبقى هاجر
والمشاعر الطيبة تهمل
ياللقيتك مره فاتر
كان ياريت احساسى تمهل
********
الزمان ماليهو عندك
قيمة لما تدور تقرر
المكان مالِيهو جندك
قوة احتليت مكشر
كان ياريتك كنت شاطر
حجة تسمع ليك أفسر
***********
عليك يسهل
وعلى يمهل
*******
لو وصفت زمانى غادر
ببقي ظالمو وبعضو مزهر
من نعيم حبك بسافر
وفى جحيم هجرك بعسكر
خوفى مثلى كتير تسفر
لى مراسى الهم تأشر
عليك يسهل
وعلى يمهل
******
قلبى من شدة غرورو
السنين رجَّع يجهِّل
وخاطرى فى غمرة سرورو
فى قوافى الحب يِصهِّل
والامل غامرنى نورو
ونفسى ريدك عاد يؤهِّل
********
عليك يسهل
وعلى يمهل
لما احكى البينى بينو
دمعى يتسابق نزولو
ليهو رسلت المشاعر
كنت بحكى الليل بطولو
اصلو ما كان بيا شاعر
ودمعى متزايد هطولو
*********
ربى سهِّل
عليهو مهِّل
اصلو قاسى
وبرضو مُذهِّل
ما بلومك قلبى حاشا
لو بقيت مهزوم جمالو
حتى لو ريدك تلاشى
وسِّبتَ محبوبك فى حالو
دارى نفسك وارتعاشا
ربى ما بمنع حلالو
الدنيا ما بتحرم دعاشا
الله بقسم ليك (بدالو )
عليهو سهل
وعليا مهِّل
عبدالله عبدالرحمن
03-01-2012, 11:58 PM
السلام عليكم ورحمة الله وبركاته ارجو ان تكونوا جميعا بخير وعافية
نعتذر عن الغياب الطويل
اسأل الله لكم الصحة والعافية
واتمنى ان تكون العودة قوية
تحياتى
عبدالله عبدالرحمن
04-01-2012, 12:01 AM
هو نحنا بنودع سنة

أهو نحـــنا بنودع سنة
وباكـــــر بنستقبل سنة
أصلو الوداع سنة حياة
وباكــــرنــــــودع كلنــا
ويُستقبل القــادم جــديد
يمكن يكــــون انت وانا
أو زول غــــريب
لى ناس هِنــــاك
ودعنا سافر مننا
ونبكــــى الوداع
بــــى حرقة ليه؟
ليه بس مفرق شمـــــــلنا؟
ويبقى الوداع فيهو العشم
لــى عودة تانــــــى تلمنا
***********
مرت سنة........
وقُبالا مرن كم سنة
كِدا لو نقيف ......
نجرد حِســابات المُنــــــى
قبال ننقِى حروف خــــيال
ونشد كمان وتر الغُنــــــا
ونطرب على لحن الجمال
ويفــــوح عبير السوسنة
************
كدا لونقيف ......
نجـــرُدْ حســابات المُنـــى
قــــــبال نطفِّيها الشمــوع
وفـــى لحظة نفــــرح كُلنا
ماننسى زول بذرف دموع
ما زول غــــريب زول مننا
علــى حسرة عايشها ابتدت
او محــــنة جاية فــى ظننا
ان شا الله تتلاشـــى المِحن
احــــزانا تتبدل هَـــــــــــنا
*************
دعواتــــى فى العام الجديد
دعواتـــــى لــــى كل الهِِنا
حتـــى الهِناك وكـُــــلْ بعيد
هاجر عشان يمحى الضنـى
ان شا الله يغشانا الســــلام
فـــارد ضراعـــو يضمــــنا
وتِنفـــــرْ وجيهاتنا ابتســام
أخـــوان واحــــــباب كلنـــا
ننعـــــمْ بخيرنــــا وفى وئام
وسمــــا السعــــادة تظلــــنا
*******
أهو نحنا بنودع سنة
وباكــر بنستقبل سنة
الفايته مــا تمت عشم
لى ناس كُتار فيهم انا
والجايه ما فيها الندم
جايانا بالخير والهنا