ألوو... فيصل القاسم "" ((أنا مُشاكِس... خُذني الى الأتجاه المُعاكِس ))

[منذر رشيد]

بسم الله الرحمن الرحيم

ألوو... فيصل القاسم "" ((أنا مُشاكِس... خُذني الى الأتجاه المُعاكِس ))


بقلم : منذر ارشيد

فيصل القاسم لا تهدأ الأتصالات به من قبل الكثيرين ممن يعشقون الظهور في برنامج الأتجاه المعاكس وهو يَعِد هذا, ويرفض ذاك" ويُبقى على بعض من يرى انهم يلزموه في ظروف...(ربما تأتي).! ومن يدري.!
فيبقيهم على لائحة الأنتظار(خليك جاهز لما نطلبك)
وهناك من يدفع لهم مصاريف السفر والأقامة ومصروف الجيب والذي منه حسب الوزن والموضوع طبعا.."
ولكن بالمقابل هناك من يدفعوا له لكي يثبتوا وجودهم أو موقفهم السياسي "
ليست هذه معلومات حصلت عليها .." وانما هي توقعات من خلال استقراء لما يجري في هذا البرنامج المثير للجدل "
وما دعاني لكتابة هذا الموضوع هو ظهور شخص فلسطيني يدعى عادل أبو هاشم في فضائية الأقصى وكأني به يستدرج فيصل القاسم لدعوته الى برنامج الأتجاه المعاكس والمعروف أنه ساعة متواصلة من الردح والقدح وحتى الشتم أحياناً
وكان أن ظهر السيد عادل أبو هاشم على فضائية الأقصى لساعة متواصلة من الردح والقدح للرئيس الفلسطيني ابو مازن ولحركة فتح بما يغري فيصل القاسم لجلبه مخفوراً الى قطر مع مكرمة فيصلية بما تجود به النفس وبعد ساعة من الردح المتواصل
وكيف لا وهو الألتجاه المعاكس والذي أعتقد ان شخص مثل عادل ابو هاشم لم يترك وسيلة للأتصال بفيصل القاسم الا واتصل عارضاً نفسه كأكبر رداح يمكن ان يفش خلق فيصل القاسم
وحسب ظني انه جرى مثل هذالأتصال ...طبعا والله اعلم .! واليكم ما يمكن أن يكون قد حدث ..

عادل هاشم : ألو دكتور فيصل ...انا الي حكى لك عنه ابو فلان
فيصل القاسم : مين ابو فلان وأبو علان .! يا اخي انت شو بدك .! خش في الموضوع على طول
عادل : بدي اطلع على الأتجاه المعاكس
فيصل تطلع كيف هي فوضى .! ومين حضرة جنابك .!أنا عمري ما سمعت فيك
عادل : يارجل انا بكتب كويس وبحكي كويس وبهاجم وبشتم وبلعن لك سنسفيل أتخن شنب وتنظيم ودولة مين بدك أهاجم.!
فتح انا حاضر حماس أنا جاهز كل الناس برضوا ما في مشكلة
فيصل : لا حماس سيبك منها والناس ما لنا ومالهم عندك شيء ضد فتح ...! احنا بيهمنا فتح " بدنا تهجم على فتح وبس بتعرف عندك قُدرة ..!
عادل : أوف أي انا شو بشتغل لعاد مش بقول لك رديح من الطراز الأول بس أنت افلتني عليهم

فيصل: دخلك شو مؤهلاتك يا زلمة وشو سجلك النضالي ممكن تخبرني

عادل : أنا ألفت كتاب بس ما قدرتش أحط مؤهلاتي خوف الحسد ...سواء المؤهلات الدراسية والجامعية أو المعارك التي خضتها" فمن الكرامة الى حصار بيروت ... وقبلها السويس وبعدها تورا بورا في افغانستان هذا طبعا غير معركة هارمجدون الي ابليت فيها بلاءً حسنا

فيصل : يخرب بيتك ما اكذبك كلهن اعرفناهم بس هارمجدون من وين جبتها هذه ..!
عادل : يا اخي شو بعرفني قرأت عنها مرة مش عارف وين .!
فيصل : ولك يا حم...ر " هذه معركة لسة بدها تحصل وهي خرافة توراتية لليهود
عادل : خلص ما تدقش كثير يا راجل مش بدك أحكي واصرخ والعن ابو فتح الأولاني
فيصل : صحيح بس انت بتعرف جبنا قبل شهر هاي الكلبة وفاء سلطان حتى تشتم المسلمين " راحت تشتم برب العالمين " وصارت فضيحتنا بجلاجل
عادل : هي ء شفت والله وكيف انت صرت مصخرة يا عم فيصل.

فيصل : مصخرة يا مصخرة " طيب يا كذاب" بس انا كيف بدي أعرف مهاراتك .!
وما بقدر أطلعك هيك بدون ما اعرف اسلوبك وقدراتك
عادل : يا اخي اسأل عني " وبعدين أقرأ لي انا بكتب لأفظع وأوسخ المقالات يا راجل
فيصل: هل تكتب في دنيا الوطن
عادل : لا... لا اكتب في دنيا الوطن " كنت أكتب في الحقائق بس طردوني
فيصل : مليح لأنه يوم بيكون الواحد هارون الرشيد ويوم آخر بيصير من العبيد ولكن ما علينا...أنا ما بدي كتب ومقالات بدي لسان " على فكرة كم طول لسانك ..!
عادل: لساني هيء.! شو لساني أطول من ذمتك يا ابو القاسم
فيصل : اخص عليك فعلا انك بذيء ولسانك زفر، وهيك احنا بيلزمنا" بس يا ريت تعطيني بروفه، يعني مقابلة مع أي جهة ولو كانت تافهة" مش مشكلة " المهم أشوف الكاريزما بتاعتك وأسلوبك " بالمناسبة انت الك كاريزما .!
عادل : كاريزما وبس" كيف لعاد.! ولا جمال نزال " بتشوفني شخصي وانت بتحكم
وكمان راح اظهر على فضائية الأقصى بعد يومين وياريت تشوفني أكيد راح اعجبك بس من الآن ابعث لي التذكرة والمصاريف لأن محسوبك كاحت
فيصل : شو كاحت وما كاحت .! اسمع شو انت من أولها بلشت نصب "! روح اتنيل على عينك خذ فلوس من أي داهيه...( خذ قََرْض خُذ قِرد ) وبعدين لما نجربك بنشوف كام بتستاهل... انت مفكرها لعبه ..!ما في دفع سلف حبيبي

.... ....

يظهر عادل ابو هاشم على قناة الأقصى وبالفعل كان رادحا بشكل رهيب ولم يترك للمذيع مجالا للأسألة فكان هو يسأل ويجيب في أكثر الأحيان وخبص تخبيصات ما لها اول ولا آخر ابو مازن قال... ابو مازن عمل ...ابو مازن راح يبيع القدس واللاجئين وكرت الطحين" والجولان والأندلس يعني ما خلى شيء

يتصل عادل هاشم بعدها بفيصل القاسم .... ...

عادل : ألووو مرحبا دكتور كيف شفتني ...! بالله عليك ما أنا مثل ما بدك .!

فيصل : كيف شفتك .! مثل الزفت المغلي "
يعني لو جبنا طبله كان أفضل منك " شو هذا الكلام الي حكيته ..! اكثر كلامك كذب ولا يستند الى حقائق وانت هاجمت أبو مازن بسبب وبدون سبب "أي نعم أحنا بدنا تهاجمة ولكن بدنا كلام صحيح مش كذب وتلفيق" وبعدين ياغبي المذيع سألك ثلاث مرات عن الي تئآمر على أبو عمار.! وانت تلف وتدور وتقول أبو مازن والراجل قصدو دحلان " وانت تروح وترجع وتقول
أبو مازن ..! يا عمي احكي عن ابو مازن بس احكي شيء مقنع يخرب بيتك ما أكذبك" أي نعم انا بدي واحد هليط وبليط بس مش هيك مجروم على الآخر ..!
وبعيدين بدي أقو لك
العالم بتعرف ان ابو مازن كان بعيد عن الصورة في أواخر ايام ابو عمار وان عمارة العار التي ذكرتها ما كان لبو مازن أي علاقه فيها " وكل ماسالك المذيع عن الي صار في غزة بتروح تركض لي على ابو مازن " شو انت عندك مرض مشكلة مع ابو مازن .! وانت ما حكيت ولا كلمه ولا ذكرت حتى أسم دحلان ؛ شو هالهبل هذا .! وبدك اجيبك على الأتجاه المعاكس ..!
وساعة وانت تعلك الحكي جملتين كررتهن عشرين مرة أبو مازن حكى وابو مازن عمل وما عرفنا شو حكى وشوعمل وكله كلام بدون دليل.!
من وين جبت الكلام عن اتفاق بين بوش وابو مازن .! وانهم راح يعلنوا عن اتفاق واعلان مباديء " يتنازل فيها ابو مازن عن الاجئين والقدس " أي انت كنت حاضر الجلسات السرية ..! انا بدي تخبيص كلام ولا بدي حقائق ..!
وبعدين لا تنسى ان الطرف الثاني الذي ستقابله شخص له لسان أطول من لسانك وعنده تعابير قوية وعليه زوج عيون دباحه وانت عدم المؤآخذه.!
بتأتيء بالحكي وعيونك عُمُص وما بيهزو ذبانه" يعني لا منظر ولا محضر ولا حتى منطق " شو انا بدي بس أضيع وقت وأمقت حالي وأخلي الناس تشتمني .!
عادل: يا ابو القاسم مش مشكلة يا زلمة بمُط لساني, وبكحل عيوني, مش مشكلة ولك يا زلمة انت حكمت علي من مقابلة واحدة .!
فيصل : ولك هذا دكتوراه مش حاي الله " كمان بيستعمل وسائل ايضاح "
وانت مبين عليك جاهل ويا دوب بتفك الخط روح يا ابني اتعلم كيف تحكي بالأول وحاول تجمع معلومات صحيحة
عادل : يازلمة انت ليش هيك بتهيني يا عمي جربني جربني
انا ما اعطيت كل الي عندي" خليت الخميرة عندك" عندي كلام كبير راح أحكيه
فيصل: لا ما هو باين والمكتوب بنقرأ من عنوانه روح يا عمي حل عني
عادل: يا دكتور انت بس جربني
أي شو اجربك بعد ما شفتك في الأقصى .... أي هو أنا عقلي مخرب...!


منذر ارشيد

[مي أحمد]

شلا تعليق حيث ان قناة الجزيرة اعتبرها قناة حيادية وليس كما تفضلت تعمل علي جمع اوراق ضد فتح
هذا المقال ساخر ولكني ل افضل الخوض في اشياء كهذه

[منذر رشيد]

شلا تعليق حيث ان قناة الجزيرة اعتبرها قناة حيادية وليس كما تفضلت تعمل علي جمع اوراق ضد فتح
هذا المقال ساخر ولكني ل افضل الخوض في اشياء كهذه
الأخت الكريمة مي تحية

اولاً يا أختي المقال ليس ساخرا لهذه الدرجة وانما يعبر عن حقيقة بالنسبة للأتجاه المعاكس وعندما قلت هذه ليست معلومات " لم ارغب بأن يكون كلامي مثبتاً لأسباب مهنية ولكن الحقيقة يا اختي واضحة من حلال استضافة بعض الأشخاص الذين نسمعهم يقولون
((دكتور فيصل احنا ما تفقنا على هيك)) او عندما يقوم المشارك ويغادر الحلقة لأسباب واضحة
وأما ان الجزيرة لا تجمع اوراق ضد فتح ...!
لا يا أختي كلامك ليس دقيق فالجزيرة تحمل على فتح وتعمل على اثارة الناس ضد فتح من خلال تصليت الضوء على السلبيات وهذا ليس خافياً على اي مراقب سواء في المقابلات "من خلال اعطاء الطرف المقابل الوقت الأطول في اي مقابلة " طبعا انا لا اقول ان فتح فيها الملائكة وحماس فيها غير ذالك
على العكس أنا من الذين يقولون ان في الجهتين يوجد شياطين وقليل من الملائكة
أما أنك لا تفضلين الخوض في الموضوع فأنت حرة يا أختي والغريب في قولك هنا انك لا تحبي الخوض في أشياء كهذه
وهنا اسمحي لي أن اسالك ....من طلب منك الخوض ؟..!

رغم أنه لم يخض أحد غيرك لحد الآن ...!مع تقديري لك وكل ا لأحترام