محمد علي محيي الدين
21-11-2008, 02:58 PM
انتو شعليكم بايدية إتريٌگت باگة صبر وگلاص هم وتوكلت يارب عليــــــــك غبشه .. نَعسانه الشوارع ومدري يانثيه إبفجر دم تشتهيـــك إتذكـٌرت تاجر أعرفه گلـٌي من إتبيع روحك مرلي بلكت أشتريـك وتمــٌت الصفقه إشتراني وحصـٌتي هم رد أخذهــا فكــٌر إبمشروع بي أدخــل شريك وصــار يمليلي إبشروطه ما أريد و .. ما أريــد وما أريد إيــدك طويله گتله أگــصرها وأجيـــك وابترتها من المتن ورجعت ابشره گتله عد عينك شلتها !! گــالٌي چا شِلٌي بيــك ومن هــذاك اليوم والتاجر نسه وسد القضيه وآنه منسي .. إمعلٌگ إعله إرفوف صبري وحتــى صار إتراب بيــــه راحت إيدي إتفلِشٌت أقوى الدفاعات وخطوطي الأوليـــــه ناس مقهوره إجت تبچي عليـــه وناس بطرانه إجت تحچي عليـــه إشلون غلطه إتسرعت گصٌيت إديـــه هاي إديـــٌه هاي إديـــٌه صار تفتيش بسنه من السنين وعوضٌت عن الهويــــــه هاي إديـــه ياما لعبت .. ياما قبل الريح هبٌت ياما بصدور الثلج نيران هبـٌت هاي إديــٌه وهيه مگصوصه شعر للناس كتبت وصـٌفوا جراٌح زين إبمنطقتنا حرٌكوا بعض الرماد إبعود شخاط وبعدها النار بيـــه عفيه جراٌح الحصار البيه حميـــٌه وحده يگدر يگطع الخيط اللٌي يربطني إبشرايين المنيـــه إتفقنا وصارت الصفقه بعيادة هالطبيب آخذ إيــد و أنطي كِليــه وباشر الجراح وتمدد شخص مو من أهلنه وخِذ دم وجيب دم وإصعد إنزل والوسيط الجابني إيصبــٌر عليه خِلَصْ مفعول المخدٌر فتٌحتْ ملگيـــت إديــٌه حصدوا الكليه ولا زرعولي إيـــد وقٌع الدكتور تقرير إبنسختين وتركنه ولازم الفراش باب الصيدليه الكادر إتجمٌع على أهل الغريب إيهنٌي بيهم وآنه بالسديه نسوني وياحزن ذيچ المسيه والمضمد راد حگــــٌه !! گتله مد إيدك بجيبي لا.. لا مد إيدك بصدري يجوز هم تحتاج ريـــٌه جابلي الفراش سر وعرفت منـٌه تفاصيل القضيه المريض الچان يمـٌي كليـِتي رهمت عليه وإيده مارهمت عليه وأهلي زعلوا طرٌدوني من العشيره ومن فشلتي گمت أصيــح آنه مامحتاج إديـــن إنتو شعليكم بدَيـــــــٌه إتبرٌعت بيهن لأن ماريد يوم أتوازى وأتنازل وأمد للناس إديــــــٌه كاظم اسماعيل الكاطع